யோவான் 9 விளக்கவுரை

யோவான் 9 விளக்கவுரை

2. பிறவிக் குருடனைக் குணமாக்குதல் (யோவான் 9:1-41)

அ) ஓய்வு நாளில் குணமாக்குதல் (யோவான் 9:1-12)

---

யோவான் 9:1-5
1 அவர் அப்புறம் போகையில் பிறவிக்குருடனாகிய ஒரு மனுஷனைக் கண்டார். 2 அப்பொழுது அவருடைய சீஷர்கள் அவரை நோக்கி: ரபீ, இவன் குருடனாய்ப் பிறந்தது யார் செய்த பாவம், இவன் செய்த பாவமோ, இவனைப் பெற்றவர்கள் செய்த பாவமோ என்று கேட்டார்கள். 2 இயேசு பிரதியுத்தரமாக: அது இவன் செய்த பாவமுமல்ல, இவனைப் பெற்றவர்கள் செய்த பாவமுமல்ல, தேவனுடைய கிரியைகள் இவனிடத்தில் வெளிப்படும்பொருட்டு இப்படிப் பிறந்தான். 4 பகற்காலமிருக்குமட்டும் நான் என்னை அனுப்பினவருடைய கிரியைகளைச் செய்யவேண்டும்; ஒருவனும் கிரியை செய்யக்கூடாத இராக்காலம் வருகிறது. 5 நான் உலகத்திலிருக்கையில் உலகத்திற்கு ஒளியாயிருக்கிறேன் என்றார்.

யூதர்கள் இயேசுவைக் கல்லெறிய வந்தபோது, அந்த இக்கட்டான நிலையில்கூட இயேசு வேகமாகத் தப்பித்து ஓடிவிட எத்தனிக்காமல் ஒரு துயரப்படும் சகோதரனைக் கண்ணுற்றார். அவர் மன்னிப்பருளுகிற அன்பாயிருப்பதோடு, உண்மையுள்ளவரும் ஆசீர்வாதத்தினால் நிறைந்தவருமாயிருக்கிறார். சீடர்களும் அந்தக் குருடனைப் பார்த்தார்கள், அந்தக் காட்சி அவர்களைப் பெரிதாகப் பாதிக்கவில்லை. மாறாக அந்த குருடனுடைய பரிதாப நிலைக்கு அவன் செய்த குற்றம் என்ன என்று அவர்கள் சிந்திக்க ஆரம்பித்தார்கள். ஏனெனில் அக்காலத்தில் நோய்கள் மனிதர்களுடைய பாவங்களுக்காக அவர்களுக்கு இறைவன் கொடுக்கும் தண்டனை என்று மக்கள் கருதினார்கள். அந்த வாலிபனுடைய அங்கவீனத்திற்கான காரணத்தை இயேசு குறிப்பிடவில்லை. அவனோ அல்லது அவனுடைய பெற்றோரோ குற்றமற்றவர்கள் என்றும் அவர் கூறவில்லை. ஆனால் அந்த மனிதனுடைய துன்பம் இறைவனுடைய செயல்பாட்டிற்கான ஒரு வாய்ப்பாக இருந்தது என்பதை மட்டும் அவர் குறிப்பிட்டார். அந்தக் குருடனை நியாயம் தீர்க்கவோ, அவனுடைய குருட்டுத் தன்மைக்கான காரணத்தை ஆராய்ந்து பார்க்கவோ அவர் தன்னுடைய சீடர்களை அனுமதிக்கவில்லை. இறைவனுடைய சித்தம் இரட்சிப்பும் குணமாக்குதலுமே என்பதைக் காணும்படி இயேசு அவர்களை உற்சாகப்படுத்தினார்.

“நான் செயல்பட வேண்டும்” என்று இயேசு சொன்னார். அன்பு அவரை நெருக்கி ஏவியது, ஏனென்றால் நியாயம்தீர்ப்பதையோ அழிப்பதையோ அவர் விரும்பாமல், குணமாக்க வேண்டும் என்று அவருடைய இரக்கமுள்ள மனது ஏங்கியது. அதன்மூலம் அவர் தம்முடைய மீட்கும் அன்பையும், எண்ணங்களையும் நோக்கங்களையும் வெளிப்படுத்தினார். மக்களை தெய்வீக வாழ்விற்குள் வழிநடத்த விரும்பும் உலக இரட்சகர் அவர். இயேசுவின் வார்த்தைகளை நாமும் கேட்கிறோம்: “நான் என்னுடைய நாமத்தினாலோ, என்னுடைய சுய பெலத்தினாலோ செயல்படுவதில்லை. மாறாக நான் என்னுடைய பிதாவின் செயல்களை, அவருடைய நாமத்தினாலே, அவருடைய விருப்பப்படி நிறைவேற்றுகிறேன்.” தன்னுடைய செயல்களை இறைவனுடைய செயல்கள் என்று அவர் அழைத்தார். தன்னுடைய காலம் குறுகிறது என்றும் தன்னுடைய மரணம் நெருங்கிவிட்டது என்றும் அவருக்குத் தெரியும். இருப்பினும் அந்தக் குருடனைச் சுகப்படுத்தும்படி தன்னுடைய நேரத்தைச் செலவிட்டார். அந்தக் குருடனுக்கு ஜீவ ஒளியைக் கொடுத்து அவனை ஒளிர்விக்க விரும்பிய உலகத்தின் ஒளி அவரே. அவரோ வேறு எந்த பரிசுத்தவானோ எதுவும் செய்யமுடியாத ஒரு காலம் வருகிறது. பகல்பொழுதாயிருக்கும்போதே, சந்தர்ப்ப சூழ்நிலைகள் வாய்க்கும்போதே அவருக்கு சாட்சிபகர்வோமாக. இருள் பெருகிக்கொண்டே போகிறது. கிறிஸ்துவின் வருகையில் மட்டுமே நமக்கு நம்பிக்கை இருக்கிறது. யார் அவருக்கு வழியை ஆயத்தம் செய்வார்?

யோவான் 9:6-7
6 இவைகளைச் சொல்லி, அவர் தரையிலே துப்பி, உமிழ்நீரினால் சேறுண்டாக்கி, அந்தச் சேற்றைக் குருடனுடைய கண்களின்மேல் பூசி: 7 நீ போய், சீலோவாம் குளத்திலே கழுவு என்றார். சீலோவாம் என்பதற்கு அனுப்பப்பட்டவன் என்று அர்த்தமாம். அப்படியே அவன் போய்க் கழுவி, பார்வையடைந்தவனாய்த் திரும்பிவந்தான்.

இதற்கு முன்பு இயேசு வெறும் வார்த்தைகளினாலேயே அற்புதங்களைச் செய்தார். ஆனால் இந்தக் குருடனைக் குணமாக்கும்போது, அவர் தரையிலே துப்பி, சேறுண்டாக்கி, அவனுடைய கண்களில் பூசினார். கிறிஸ்துவின் சரீரத்திலிருந்து ஏதோ ஒன்று தனக்குத் தரப்பட்டிருப்பதை அந்தக் குருடன் உணர வேண்டும் என்று இயேசு விரும்பினார். இயேசு அந்தக் குருடன்மேல் இரக்கம்கொண்டு, அவனைக் குணமாக்குவதற்கான சிறந்த முறையைக் கையாண்டார். ஆனால் அவனுடைய கண்கள் உடனடியாகத் திறக்கப்படவில்லை என்பது ஆச்சர்யமான ஒன்று. அவன் ஒரு பள்ளத்தாக்கின் ஆழத்திற்கு நடந்துசென்று “சீலோவாம்” என்ற குளத்தில் தன்னைக் கழுவ வேண்டியிருந்தது. சீலோவாம் என்றால் “அனுப்பப்பட்டவன்” என்று அர்த்தம். அவனுடைய குணமாக்குதல் அவர் தன்னுடைய மக்களிடத்திற்கு அனுப்பப்பட்டவர் என்ற பொருளைக் கொடுத்தது. அவர்களும் தங்களுடைய பாவங்களினாலும் அக்கிரமங்களினாலும் குருடாகப் பிறந்தவர்களாக இருப்பதால், இயேசுவினால் சுகமாக்கப்பட வேண்டியவர்களாகவும், இரட்சிக்கப்பட வேண்டியவர்களாகவும் இருக்கிறார்கள்.

அந்தக் குருடன் கிறிஸ்துவின் அன்பின் மீது நம்பிக்கையுள்ளவனாக கிறிஸ்துவின் வாக்குறுதியை ஏற்றுக்கொண்டான். அவன் உடனடியாகக் கீழ்ப்படிந்தான். கிறிஸ்து தன்னிடம் சொல்லியவற்றை மனதில் தியானித்தவனாக மெதுவாக நடந்து சென்றான். அவன் நடந்து சென்று தன்னுடைய கண்களைக் கழுவி சுகத்தைப் பெற்றுக்கொண்டான். உடனடியாக அவன் மக்களையும், வெளிச்சத்தையும், தண்ணீரையும், தன்னுடைய கைகளையும், வானத்தையும் எல்லாவற்றையும் பார்த்தான். மிகுந்த ஆச்சரியத்தோடு அவற்றை எல்லாம் பார்த்தான். அவன் அல்லேலூயா என்று கத்தி இறைவனுடைய இரக்கத்திற்காக அவரைத் துதித்தான்.

யோவான் 9:8-12
8 அப்பொழுது அயலகத்தாரும், அவன் குருடனாயிருக்கையில் அவனைக் கண்டிருந்தவர்களும்: இவன் உட்கார்ந்து பிச்சை கேட்டுக்கொண்டிருந்தவனல்லவா என்றார்கள். 9 சிலர்: அவன்தான் என்றார்கள். வேறு சிலர்: அவனுடைய சாயலாயிருக்கிறான் என்றார்கள். அவனோ: நான்தான் அவன் என்றான். 10 அப்பொழுது அவர்கள் அவனை நோக்கி: உன் கண்கள் எப்படித் திறக்கப்பட்டது என்றார்கள். 11 அவன் பிரதியுத்தரமாக: இயேசு என்னப்பட்ட ஒருவர் சேறுண்டாக்கி, என் கண்களின்மேல் பூசி, நீ போய் போய்க் கழுவி, பார்வையடைந்தேன் என்றான். 12 அப்பொழுது அவர்கள்: அவர் எங்கே என்றார்கள். அவன்: எனக்குத் தெரியாது என்றான்.

அந்த அற்புதத்தை மறைக்க முடியவில்லை. ஏனெனில் அதை அநேகர் பார்த்து ஆச்சரியப்பட்டனர். கண் தெரியாமல் தடுமாறுகிறவனாகவும், நடமாட முடியாதவனாகவும், நடப்பதற்கு மற்றவர்களுடைய உதவியை நாடியவனாகவும் காணப்பட்ட குருடன்தான் இப்போது எழுந்து நேராக நடந்து செல்கிறான் என்று அவர்களில் சிலருக்கு நம்ப முடியவில்லை. அவர்கள் கண்டறிந்திருந்த அதே குருடன்தான் இன்று காண்கிறான் என்பதற்கு அவனே சாட்சியாகக் காணப்பட்டான்.

அவன் எவ்விதமாக குணமடைந்தான் என்று மக்கள் கேட்டார்கள். ஆனால் யார் அவனைக் குணப்படுத்தியது என்று அவர்கள் கேட்கவில்லை. அது எவ்விதமாக நடந்தது என்பதை மட்டும் அவர்கள் அறிய ஆவலாயிருந்தார்கள். கண் திறக்கப்பட்ட குருடன் தன்னைக் குணமாக்கியவர் இயேசு என்று அறிந்திருந்தான். அதைத் தவிர அவனுக்கு வேறு எதுவும் தெரிந்திருக்கவில்லை. கிறிஸ்துவின் தெய்வீகத்தை அவன் அறியவில்லை. சேறுண்டாக்கிப் பூசி தன்னுடைய கண்களைத் திறந்த அவர் ஒரு மனிதன் என்றே அவன் நினைத்திருந்தான்.

ஆலோசனைச் சங்கத்தின் உளவாளிகள் “யார் இந்த இயேசு?” என்று அவனிடம் கேட்டபோது, “எனக்குத் தெரியாது. முன்பு நான் குருடனாக இருந்தேன். இப்போது காண்கிறேன். அவர் என்னிடம் பணத்தையோ என்னுடைய நன்றியையோ எதிர்பார்க்கவில்லை. நான் அவர் சொன்னபடி குளத்தில் சென்று கழுவினேன். அதனால் இப்போது எனக்குக் கண் தெரிகிறது. அவர் யார் என்றோ, இப்போது அவர் எங்கிருக்கிறார் என்றோ எனக்குத் தெரியாது” என்று பதிலுரைத்தான்.

ஆ) குணமாக்கப்பட்ட மனிதனை யூதர்கள் விசாரித்தல் (யோவான் 9:13–34)

---

யோவான் 9:13-15
13 குருடனாயிருந்த அவனைப் பரிசேயரிடத்திற்குக் கொண்டுபோனார்கள். 14 இயேசு சேறுண்டாக்கி, அவன் கண்களைத் திறந்த நாள் ஓய்வுநாளாயிருந்தது. 15 ஆகையால் பரிசேயரும் அவனை நோக்கி: நீ எப்படிப் பார்வையடைந்தாய் என்று மறுபடியும் கேட்டார்கள். அதற்கு அவன்: அவர் என் கண்களின்மேல் சேற்றைப் பூசினார், நான் கழுவினேன், காண்கிறேன் என்றான்.

யூதர்களுடைய வாழ்க்கை சட்டவாதத்தின் அடிமைத்தனத்திற்கு உட்பட்டதாக இருந்தது. அவர்கள் ஒரு மனிதன் குணமாக்கப்படுவதைவிட ஓய்வு நாளைக் கடைப்பிடிப்பதையே அதிக மகிழ்ச்சியானதாகக் கருதினார்கள். இந்த சுகம் இறைவனால் கிடைக்கப்பெற்றதா அல்லது சாத்தானுடைய செயலா என்பதை தீர்மானிக்கும்படி மக்களும் உளவாளிகளும் அந்த மனிதரைப் பரிசேயரிடத்தில் கொண்டுபோனார்கள்.

இவ்வாறு அவர்கள் அந்த மனிதனிடத்தில் இயேசுவைக் குறித்த தங்களுடைய விசாரணையை ஆரம்பித்தார்கள். தனக்கு எவ்வாறு சுகம் கிடைத்தது என்பதை அந்த வாலிபன் விவரித்துச் சொன்னான். இயேசுவின் எதிரிகளிடம் காணப்பட்ட பகைமை காரணமாக அவன் குணமடைந்ததால் உண்டான மகிழ்ச்சி பாழ்பட்டபடியால் அவன் தன்னுடைய வார்த்தைகளைச் சுருக்கிக்கொண்டான்.

யோவான் 9:16-17
16 அப்பொழுது பரிசேயரில் சிலர்: அந்த மனுஷன் ஓய்வுநாளைக் கைக்கொள்ளாததினால் அவன் தேவனிடத்திலிருந்து வந்தவனல்ல என்றார்கள். வேறுசிலர்: பாவியாயிருக்கிற மனுஷன் இப்படிப்பட்ட அற்புதங்களை எப்படிச் செய்வான் என்றார்கள். இவ்விதமாய் அவர்களுக்குள்ளே பிரிவினையுண்டாயிற்று. 17 மறுபடியும் அவர்கள் குருடனை நோக்கி: உன் கண்களைத் திறந்தானே, அவனைக்குறித்து நீ என்ன சொல்லுகிறாய் என்றார்கள். அதற்கு அவன்: அவர் தீர்க்கதரிசி என்றான்.

அவனுடைய சாட்சியைக் கேட்டவுடன் சட்டவாதிகள் வாதாட ஆரம்பித்துவிட்டார்கள். இயேசு இறைவனுடைய கட்டளையை மீறியபடியால் அவரிடத்தில் இறைவனுடைய சக்தி எதுவும் இருக்க முடியாது. தங்களுடைய சட்டவாதச் சிந்தனையின்படி அவர்கள் இயேசுவை இவ்வாறு நியாயம்தீர்த்தார்கள்.

மற்றவர்கள் அந்தக் குருடனுடைய பாவத்திற்கும் அவனுக்குக் கிடைத்த பாவமன்னிப்பு மற்றும் சுகம் ஆகியவற்றிற்கும் இடையில் என்ன தொடர்புள்ளது என்று சிந்தித்தார்கள். இந்த குணமாக்குதல் இறைவனுடைய பாவமன்னிப்புடன் தொடர்புள்ள காரணத்தினால், அதற்கு அதிக ஆழமான அர்த்தம் இருக்க வேண்டும் என்று அவர்கள் கருதினார்கள். ஆகவே பாவங்களை மன்னித்து, துயரத்துக்கான காரணத்தைத் தீர்த்துவைத்த இயேசு பாவியாக இருப்பதற்கு வாய்ப்பில்லை என்றனர்.

இருதரப்பினருக்கும் சமரசம் ஏற்படவில்லை. இன்று இயேசுவைக் குறித்து அர்த்தமற்ற முறையில் உரையாடும் பலரைப் போலவே இரண்டு தரப்பினரும் அறியாமையில் பேசினர். இயேசுவிடம் வேறு ஏதாவது இருக்கிறதா என்றும் அந்தக் குருடன் இயேசுவைப் பற்றி என்ன நினைக்கிறான் என்றும் அறிந்துகொள்ளும்படி அவர்கள் அவனிடத்தில் கேள்விகளைக் கேட்டார்கள். இயேசுவைப் பற்றி ஏதாவது அறிந்தவர்களுக்கு இப்படிப்பட்ட கேள்விகள் பயனுள்ளதாக இருக்கும். மறுபடியும் பிறந்தவர்களால் இந்தக் கேள்விகளுக்கு பதிலளிக்க முடியும். ஏனெனில் அவர்கள் பாவத்திலிருந்தும் இறைவனுடைய கோபத்திலிருந்தும் தப்பிப்பது எப்படி என்று அவர்கள் அறிவார்கள். நாம் ஆவிக்குரிய நிலையில் பிறக்காவிட்டால் நம்மால் இறைவனைக் காண முடியாது.

குணமாக்கப்பட்ட மனிதன் பேச ஆரம்பித்தான். “யார் இந்த இயேசு?” அவன் வரலாற்றில் வாழ்ந்த இறைவனுடைய மனிதர்களுடன் இயேசுவை ஒப்பிட்டான். அந்த வரலாற்றுக் காலத்தில் பல அற்புதங்கள் நிகழ்த்தப்பட்டுள்ளது, ஆனால் யாரும் பிறவிக்குருடனுடைய கண்களைத் திறந்ததில்லை. இயேசுவின் செயல்களைப் பார்க்கும் எந்த சிந்தனையுள்ள மனிதனும் அவர் ஒப்பற்ற இரட்சகர் என்பதை நிச்சயமாக காணமுடியும். ஆகவே அந்த மனிதன், எதிர்காலத்தைக் காணவும் தற்காலத்தை இறைவனுடைய வல்லமையினால் தீர்மானிக்கக்கூடியவருமாயிருந்த அவரைத் தீர்க்கதரிசி என்று அழைத்தான். அவர் மனிதருடைய இருதயத்தை ஆராய்ந்து இறைவனுடைய சித்தத்தை வெளிப்படுத்துபவர்.''

யோவான் 9:18-23
18 அவன் குருடனாயிருந்து பார்வையடைந்ததை யூதர்கள் நம்பாமல், பார்வையடைந்தவனுடைய தாய்தகப்பன்மாரை அழைப்பித்து, 19 அவர்களை நோக்கி: உங்கள் குமாரன் குருடனாய்ப் பிறந்தான் என்று சொல்லுகிறீர்களே, அவன் இவன்தானா? இவனானால், இப்பொழுது இவன் எப்படிப் பார்வையடைந்தான் என்று கேட்டார்கள். 20 தாய்தகப்பன்மார் பிரதியுத்தரமாக; இவன் எங்கள் குமாரன்தான் என்றும், குருடனாய்ப் பிறந்தான் என்றும் எங்களுக்குத் தெரியும். 21 இப்பொழுது இவன் பார்வையடைந்த வகை எங்களுக்குத் தெரியாது; இவன் கண்களைத் திறந்தவன் இன்னான் என்பதும் எங்களுக்குத் தெரியாது; இவன் வயதுள்ளவனாயிருக்கிறான், இவனைக் கேளுங்கள், இவனே சொல்லுவான் என்றார்கள். 22 அவனுடைய தாய்தகப்பன்மார் யூதர்களுக்குப் பயந்ததினால் இப்படிச் சொன்னார்கள். ஏனெனில் இயேசுவைக் கிறிஸ்து என்று எவனாவது அறிக்கைபண்ணினால் அவனை ஜெப ஆலயத்துக்குப் புறம்பாக்கவேண்டுமென்று யூதர்கள் அதற்குமுன்னமே கட்டுப்பாடு செய்திருந்தார்கள். 23 அதினிமித்தம்: இவன் வயதுள்ளவனாயிருக்கிறான், இவனையே கேளுங்கள் என்று அவன் தாய்தகப்பன்மார் சொன்னார்கள்.

கிறிஸ்துவின் தெய்வீகமான அற்புத செயல்களை பழைய ஏற்பாட்டு அற்புதங்களுடன் ஒப்பிடும் முறையை யூதர்கள் ஏற்றுக்கொள்ளவில்லை. அவர் ஒரு தீர்க்கதரிசி என்றோ, இறைவனால் அனுப்பப்பட்டவர் என்றோ அவர்கள் நம்பவில்லை. அதை அவர்கள் ஏற்றுக்கொண்டால் அவர்களுடைய நிலைப்பாடு தவறானது என்றும் கண்டிக்கப்பட வேண்டியது என்று நிரூபணமாகிவிடும்.

அந்த அற்புதம் போலியானது என்றும் அவன் குருடனாகவே இருக்கவில்லை என்றும் அவர்கள் பொய் கூற ஆரம்பித்தார்கள். இயேசுவின் அற்புதத்தை மறுதலிப்பதற்காக அது ஒருபோதும் சாத்தியமற்றது என்று சாதித்தார்கள். ஒருவன் பிறவியிலேயே குருடனாகப் பிறப்பது அவனுடைய மூதாதையர்கள் செய்த பாவமாகும். எனவே அப்படிப்பட்ட ஒருவனுக்கு சுகம் கிடைப்பது சாத்தியமாகாத ஒன்று என்று அவர்கள் வாதிட்டார்கள். அதிகாரிகள் மூலம் தங்கள் மகனுடைய பிரச்சனையைப் பற்றிக் கேள்விப்பட்ட பெற்றோர் அங்கு வந்தார்கள். அவர்கள் பரிசேயருக்குப் பயந்ததினால், முன்பு தங்கள் மகன் சொன்ன காரியங்களை மறுதலித்து, கவனமாகப் பேசினார்கள். தாங்கள் சிக்கலில் மாட்டிக்கொள்ளக் கூடாது என்பதற்காக அவர்கள் அவனைக் கைவிட்டு விட்டார்கள். ஆகவே, இப்போது மகன் தன்னுடைய காரியத்திற்கு தானே பொறுப்பாளியாக விடப்பட்டான். ஆலோசனைச் சங்கத்தினால் தள்ளி வைக்கப்படுதல் என்பது மிகவும் பயங்கரமான காரியமாகும். அது ஒரு குஷ்டரோகி சமூகத்தினால் தள்ளி வைக்கப்படுவதைப் போன்றது. அவ்வாறு தள்ளிவைக்கப்பட்டவர்களுக்கு திருமணம் போன்ற உரிமைகள் மறுக்கப்படும். இயேசுவைப் பின்பற்றுபவர்களை இவ்வாறு தண்டிக்கும் அளவுக்கு இயேசுவின் மீதான அவர்களுடைய வெறுப்பு அதிகரித்திருந்தது.

யோவான் 9:24-25
24 ஆதலால் அவர்கள் குருடனாயிருந்த மனுஷனை இரண்டாந்தரம் அழைத்து: நீ தேவனை மகிமைப்படுத்து; இந்த மனுஷன் பாவியென்று நாங்கள் அறிந்திருக்கிறோம் என்றார்கள். 25 அவன் பிரதியுத்தரமாக: அவர் பாவியென்று எனக்குத் தெரியாது; நான் குருடனாயிருந்தேன், இப்பொழுது காண்கிறேன்; இது ஒன்றுதான் எனக்குத் தெரியும் என்றான்.

இயேசுவில் குற்றம் கண்டுபிடித்து அவரை நியாயம்தீர்க்க பரிசேயர்கள் முயன்றார்கள். அவர்கள் மறுபடியும் சுகமாக்கப்பட்ட மனிதனைக் கொண்டுவந்து, அவனை இயேசுவுக்கு விரோதமாகப் பேசவைத்து, அவரைக் குற்றப்படுத்த முனைந்தார்கள். இயேசு பாவிதான் என்று நியாயப்பிரமாணத்தை நன்கு அறிந்த தங்களுக்குத் தெரியும் என்றும் அவர்களுக்குத் தேவையானது தெளிவான சாட்சி மட்டுமே என்றும் அவர்கள் வலியுறுத்தினார்கள். அவர்கள் சொல்வதை ஏற்றுக்கொண்டு இயேசுவை அவன் குற்றப்படுத்த வேண்டும் என்று அவர்கள் அவனை நிர்ப்பந்தித்தார்கள். அவனுடைய சுகமாகுதல் நசரேயனுடைய மகிமைக்குரியதல்ல என்று அறிக்கையிடும்படி அவனை வற்புறுத்தினார்கள். அதற்கு அந்த மனிதன், “அவர் பாவியா என்பது எனக்குத் தெரியாது. அது கடவுளுக்குத்தான் தெரியும். எனக்குத் தெரிந்ததெல்லாம் நான் குருடனாயிருந்தேன், இப்போது நான் காண்கிறேன் என்பதே” என்று பதிலளித்தான். அந்த உண்மையை மறுதலிக்க முடியாது. ஆகவே அது அற்புதம் நடந்திருக்கிறது என்பதையும், தெய்வீக வல்லமையும் பாவமன்னிப்பின் கிருபையும் செயல்பட்டுள்ளது என்பதையுமே காண்பிக்கிறது. இந்த வாலிபனுடைய சாட்சியை ஆயிரக்கணக்கான விசுவாசிகள் உறுதிசெய்வார்கள். அவர்கள் பரலோகம் மற்றும் நரகம் ஆகியவற்றின் இரகசியங்களை அறியாவிட்டாலும், அவர்கள் மறுபிறப்பைப் பெற்றிருக்கிறார்கள். அவர்கள் ஒவ்வொருவரும், “முன்பு நான் குருடனாயிருந்தேன், இப்போது காண்கிறேன்” என்று அறிக்கையிடக் கூடியவர்கள்.

யோவான் 9:26-27
26 அவர்கள் மறுபடியும் அவனை நோக்கி: உனக்கு என்னசெய்தான், உன் கண்களை எப்படித் திறந்தான் என்றார்கள். 27 அவன் பிரதியுத்தரமாக: முன்னமே உங்களுக்குச் சொன்னேன், நீங்கள் கேளாமற்போனீர்கள்; மறுபடியும் கேட்கவேண்டியதென்ன? அவருக்குச் சீஷராக உங்களுக்கும் மனதுண்டோ என்றான்.

இந்த வாலிபனுடைய பதிலில் நம்பிக்கையற்றவர்களாக, அவனுடைய பதிலில் முரண்பாடுகளைக் கண்டுபிடிக்கும்படி, அவனுடைய கதையைத் திரும்பச் சொல்லும்படி கேட்டார்கள். அவன் கோபமுற்றவனாக, “நான் முதல்முறை சொன்னபோது உங்களுக்குப் புரியவில்லையா? நீங்கள் மறுபடியும் கேட்க விரும்புவதால், நீங்களும் அவருக்குச் சீஷராக விரும்புகிறீர்களா?” என்று கேட்டான்.

யோவான் 9:28-34
28 அப்பொழுது அவர்கள் அவனை வைது: நீ அவனுடைய சீஷன், நாங்கள் மோசேயினுடைய சீஷர். 29 மோசேயுடனே தேவன் பேசினாரென்று அறிவோம், இவன் எங்கேயிருந்து வந்தவனென்று அறியோம் என்றார்கள். 30 அதற்கு அந்த மனுஷன்: அவர் என் கண்களைத் திறந்திருந்தும், அவர் எங்கேயிருந்து வந்தவரென்று நீங்கள் அறியாதிருக்கிறது ஆச்சரியமான காரியம். 31 பாவிகளுக்குத் தேவன் செவிகொடுக்கிறதில்லையென்று அறிந்திருக்கிறோம்; ஒருவன் தேவபக்தியுள்ளவனாயிருந்து அவருக்குச் சித்தமானதைச் செய்தால் அவனுக்குச் செவிகொடுப்பார். 32 பிறவிக்குருடனுடைய கண்களை ஒருவன் திறந்தானென்று உலகமுண்டானது முதல் கேள்விப்பட்டதில்லையே. 33 அவர் தேவனிடத்திலிருந்து வராதிருந்தால் ஒன்றும் செய்யமாட்டாரே என்றான். 34 அவர்கள் அவனுக்குப் பிரதியுத்தரமாக: முழுவதும் பாவத்தில் பிறந்த நீ எங்களுக்குப் போதிக்கிறாயோ என்று சொல்லி, அவனைப் புறம்பே தள்ளிவிட்டார்கள்.

வேதபாரகரையும் அறிஞர்களையும் அந்த வாலிபன் ஏளனம் செய்தவுடன், அவன்மீது வெறுப்புற்று அவனைப் பார்த்துக் கத்த ஆரம்பித்தார்கள். “இந்த ஏமாற்றுக்காரனுக்கு நாங்கள் சீஷர்கள் அல்ல. நீதான் அவனுடைய சீஷன். நாங்கள் இறைவனுடன் பேசிய மனிதனாகிய மோசேயைப் பின்பற்றுகிறோம்” என்றார்கள். அவர்கள் மோசேயைச் சரியாகப் புரிந்துகொண்டிருந்தால் தன்னுடைய வார்த்தைகளுக்கு செவிகொடுத்திருப்பார்கள் என்று இயேசு ஏற்கனவே அவர்களிடம் கூறியிருந்தார். ஆயினும் அவர்கள் மோசேயின் வார்த்தைகளைத் திரித்து, தங்களை நியாயப்படுத்த முயற்சித்தார்கள். மோசேயையோ, மோசேயின் மூலமாகப் பேசிய ஆவியையோ அவர்கள் அறிந்திருக்கவில்லை.

இதற்கு பதிலாக சுகமாக்கப்பட்ட மனிதன், “பிறவிக் குருடனுடைய கண்களைத் திறக்கக்கூடிய ஒருவர் படைப்பாற்றல் உடையவர். அவர் வல்லமையுள்ளவர். அவர் பெருந்தன்மையானவராக என்னைக் குற்றப்படுத்தவில்லை. என்னிடத்தில் பணம் கேட்கவில்லை. அன்புள்ளத்துடன் இலவசமாகவே என்னைக் குணமாக்கினார். நான் அவருக்கு நன்றி சொல்ல வேண்டும் என்றுகூட அவர் எதிர்பார்க்கவில்லை. அவரில் எனக்கு எந்தக் குறையும் தெரியவில்லை” என்று கூறினான்.

அதன் பிறகு அந்த வாலிபன், “பெருமையுள்ளவர்களுடைய விண்ணப்பங்களுக்கு இறைவன் செவிகொடுப்பதில்லை என்பதை பழைய உடன்படிக்கைக்குட்பட்ட ஒவ்வொருவரும் அறிந்திருக்கிறார்கள். மனிதனிலிருக்கும் பாவம் இறைவனுடைய ஆசீர்வாதத்தின் ஊற்றைத் தடைசெய்யும். ஆனால் ஒருவன் பரிசுத்தமுள்ள இறைவனுக்கு முன்பாக நொருங்குண்ட இருதயத்தோடு தன்னுடைய பாவங்களை அறிக்கை செய்து, நன்றியடன் விசுவாசிக்கும்போது, அவனிடத்தில் இறைவன் பேசுகிறார்.” “உங்களில் யாரும் என்னுடைய கண்களைத் திறக்க முடியவில்லை. எந்த மனிதனாலும் இதைச் செய்யமுடியாது. ஏனெனில் இயேசுவைத் தவிர அனைவருமே பாவம் செய்தவர்கள். அவர் என்னைச் சுகப்படுத்தியதே அவர் பாவமற்றவர் என்பதற்கான அத்தாட்சியாகக் காணப்படுகிறது. இறைவன் அவரில் வாசம்பண்ணுகிறார்.” இந்த விசாரணையில் இயேசுவைப் பற்றி சிந்திக்கும்படி நிர்ப்பந்திக்கப்பட்ட அந்த மனிதன் இயேசுவின் பாவமின்மையையும் தெய்வீகத்தையும் அறிந்துகொண்டான்.

இதைக் கேட்ட சுயநீதிக்காரர்களாகிய அந்தப் பரிசேயர், “உன்னைப் போல கேடானவன் யாருமில்லை. உன்னுடைய பெற்றோரும் அப்படிப்பட்டவர்களே. உன்னுடைய இழிவான பாவத்தினால்தான் நீ குருடனாகப் பிறந்தாய்” என்று அவனைச் சபிக்கத் தொடங்கினார்கள். அந்த ஏழை மனிதனைவிட இவர்கள் அதிக குருடர்களாயிருந்தார்கள் என்பதை அவர்கள் அறியவில்லை. அந்தக் குருடன் இயேசுவின் சார்பில் ஒரு அப்போஸ்தலனாக அவர்களிடத்தில் அனுப்பப்பட்டான். அவர்களுக்கு அவர் என்ன சொல்ல விரும்பினாரோ அதை அவன் அவர்களுக்குச் சொன்னான். குணமாக்கப்பட்ட அந்த செய்தியாளனை அவர்கள் புறக்கணித்ததன் மூலமாக கிறிஸ்துவின் போதனைகளை அவர்கள் புறக்கணித்தார்கள். முதலில் அவன் ஆலோசனைச் சங்கத்திற்குப் புறம்பாக்கப்பட்டான், பிறகு அவன் தன்னை இயேசுவின் தாசன் என்று அழைத்தபோது சமூகத்தைவிட்டு அவன் தள்ளிவைக்கப்பட்டான். அந்த நாளில் அவன் சுகமாக்கப்பட்டவனாக இருந்தாலும் அவனுடைய சொந்த இனத்தாரால் புறக்கணிக்கப்பட்டான். இது அவர்களுடைய ஆவியினால் கிறிஸ்துவின் ஆவியை ஏற்றுக்கொள்ள முடியவில்லை என்பதன் அத்தாட்சியாயிருக்கிறது.

இ) குணமாக்கப்பட்டவனுக்கு இயேசு தன்னை இறைமைந்தனாகத் தன்னை வெளிப்படுத்துகிறார் (யோவான் 9:35–41)

---

யோவான் 9:35-38
35 அவனை அவர்கள் புறம்பே தள்ளிவிட்டதை இயேசு கேள்விப்பட்டு, அவனைக் கண்டபோது: நீ தேவனுடைய குமாரனிடத்தில் விசுவாசமாயிருக்கிறாயா என்றார். 36 அதற்கு அவன்: ஆண்டவரே, அவரிடத்தில் நான் விசுவாசமாயிருக்கும்படிக்கு அவர் யார் என்றான். 37 இயேசு அவனை நோக்கி: நீ அவரைக் கண்டிருக்கிறாய், உன்னுடனே, பேசுகிறவர் அவர்தான் என்றார். 38 உடனே அவன்: ஆண்டவரே, விசுவாசிக்கிறேன் என்று சொல்லி, அவரைப் பணிந்துகொண்டான்.

இந்த ஆறுதலளிக்கும் கதையை நாம் வாசிக்கிறோம். குணமாக்கப்பட்ட அந்த மனிதன் தள்ளிவைக்கப்பட்டதை இயேசு கேள்விப்பட்டு, அவனைத் தேடி, அவனுடைய துயர நேரத்தில் அவனைக் கண்டு விசாரித்தார். கிறிஸ்துவின் நிமித்தமாக தங்கள் குடும்பத்தையும் நண்பர்களையும் விட்டுப் பிரிக்கப்பட்டுள்ள விசுவாசிகள் ஒவ்வொருவருக்கும் இது ஒரு ஆறுதலான காரியம். நீங்கள் அந்நிலையில் இருப்பீர்களாயின், இயேசு உங்களுடைய அழுகையைக் கேட்டு, உங்களிடத்தில் வருவார், அவர் உங்களை விட்டுவிட மாட்டார் என்று நாங்கள் உங்களுக்கு உறுதியளிக்கிறோம். உங்கள் மக்களை நீங்கள் நம்பாதீர்கள். அப்படி நம்பினால் ஏமாந்து போவீர்கள். இயேசுவை மட்டுமே நம்புங்கள். வானத்திலும் பூமியிலும் நீங்கள் நம்பத் தகுந்த ஒரே நபர் அவர் மட்டுமே. அவர் உங்களை நேசிக்கிறார்.

அதன்பிறகு இயேசு, அந்த வாலிபனிடம் முக்கியமான கேள்வியைக் கேட்கிறார். “இறைவனுடைய மகனும், மனித குமாரனுமாயிருக்கிறவரை நீ விசுவாசிக்கிறாயா?” அந்த வாலிபன் பழைய ஏற்பாட்டின் தானியேல் 7:13-14ஐ அறிந்திருந்தான் என்று இயேசுவுக்குத் தெரியும். மனித குமாரனே பூமியை நியாயம் தீர்ப்பவரும் இறைமகனும் ஆவார் என்று அந்த வேதப்பகுதி கூறுகிறது. அந்த வாலிபன் இவ்வுலக வாழ்விற்கும் நித்தியத்திற்கும் இறைமகனுடைய மகத்துவத்திற்கு, பின்வாங்காமல் தன்னை ஒப்புக்கொடுக்க விருப்பமா என்று இயேசு அவனிடம் கேட்டார். இயேசு சாதாரண மனிதனல்ல என்பதை அந்த வாலிபன் ஏற்கனவே அறிந்திருந்தான் என்பது “ஆண்டவரே” என்று அவன் இயேசுவை அழைப்பதிலிருந்து தெரிகிறது. இருப்பினும் அவன் இறைமைந்தன் யார் என்பதை இன்னும் அதிகம் அறிய விரும்பினான். ஏனெனில் சாதாரண மனிதனை ஆராதிப்பது விக்கிரக ஆதாரனையல்லவா?

அவனுடைய இந்தக் கேள்விக்கு இயேசு மகிமையான பதிலைக் கொடுத்தார். “நீ அவரை உன்னுடைய சரீரக் கண்களினால் பார்ப்பதற்கு முன்பாகவே, உன்னுடைய விசுவாசக் கண்களினால் அவரைப் பார்த்திருக்கிறாய். உன்னுடனே இப்போது பேசுகிறவரே இறைமைந்தன்” என்று குறிப்பிட்டார். இதைக் கேட்டவுடன் அந்த வாலிபன் சற்றும் தாமதிக்காமல் தன்னை முழுவதும் இயேசுவிடம் ஓப்படைத்து விட்டான். “ஆண்டவரே, நான் உம்முடையவன், நீர் என்னுடைய அரசன், என்னுடைய எஜமான், என்னுடைய கர்த்தர். நீரே மாம்சத்தில் வெளிப்பட்ட அன்பு. இன்றிலிருந்து உம்முடைய அடிமையாக இருக்கும்படி நான் என்னை மனப்பூர்வமாக உமக்கு ஒப்புக்கொடுக்கிறேன்” என்று கூறும் வண்ணமாக அவரை விழுந்து பணிந்துகொண்டான். சகோதரனே, மாம்சத்தில் வந்த இறைமைந்தன் இயேசுவே என்பதை நீங்கள் அறிந்திருக்கிறீர்களா? நீங்கள் ஒரு விசுவாசியாக அவருக்கு உங்களை ஒப்புக்கொடுத்திருக்கிறீர்களா? ஒரு அடிமையாக நீங்கள் அவருக்கு ஆராதனை செய்திருக்கிறீர்களா?

யோவான் 9:39-41
39 அப்பொழுது இயேசு: காணாதவர்கள் காணும்படியாகவும், காண்கிறவர்கள் குருடராகும்படியாகவும் நியாயத்தீர்ப்புக்கு நான் இந்த உலகத்தில் வந்தேன் என்றார். 40 அவருடனேகூட இருந்த பரிசேயரில் சிலர் இவைகளைக் கேட்டபொழுது: நாங்களும் குருடரோ என்றார்கள். 41 இயேசு அவர்களை நோக்கி: நீங்கள் குருடராயிருந்தால் உங்களுக்குப் பாவமிராது; நீங்கள் காண்கிறோம் என்று சொல்லுகிறபடியினால் உங்கள் பாவம் நிலைநிற்கிறது என்றார்.

அந்த வாலிபன் இயேசுவை இவ்வாறு விழுந்து பணிந்துகொண்டபோது, அவனை யாரும் தடைசெய்யவில்லை. ஏனெனில் இயேசு அனைத்து கனத்துக்கும் பாத்திரராயிருக்கிறார். ஆனால் இயேசு தன்னுடைய வருகை பெருமையுள்ளவர்களுக்கும் சத்தியத்தை அறியாமல் தங்களை அறிவாளிகள் என்று நினைத்துக்கொண்டிருக்கும் போலி பக்தர்களுக்கும் நியாயத்தீர்ப்பைக் கொண்டுவரும் என்று குறிப்பிட்டார். பாவிகளும் குருடர்களும் இதையறிந்து மனந்திரும்புகிறார்கள். விபச்சாரிகள் சுத்திகரிக்கப்படுகிறார்கள். மனந்திரும்பாதவர்களை இயேசு நியாயந்தீர்க்கவில்லை. அவருடைய இரட்சிப்பைப் புறக்கணிப்பதன் மூலம் அவர்களே தங்களை நியாயந்தீர்த்துக்கொள்கிறார்கள். தீர்க்கதரிசிகளின் மூலமாகவும் வேதாகம ஆதாரங்கள் மூலமாகவும் முன்பு அவர்கள் ஓரளவு வெளிச்சத்தைப் பெற்றிருந்தார்கள். இயேசுவின் பிரசங்கத்தை அவர்கள் மனப்பூர்வமாகப் புறக்கணித்த காரணத்தினால் அவர்களுக்கு ஏற்கனவே இருந்த வெளிச்சத்தையும் புறக்கணிக்கிறார்கள். அவர்கள் குருடர்களாகவும், கடின இருதயமுள்ளவர்களாகவும், பிடிவாதக்காரராகவும், வெறுப்புள்ள கொலைகாரராகவும் மாறிப் போனார்கள். கிறிஸ்துவின் வருகையும் அவருடைய பிரசங்கமும் இரண்டு விளைவுகளை உண்டுபண்ணுகிறது. ஒன்று இரட்சிப்பு மற்றது நியாயத்தீர்ப்பு. ஆசீர்வாதம் அல்லது சாபம். உங்களுடைய இருதயத்தில் அது என்ன விளைவை உண்டுபண்ணியிருக்கிறது?

இயேசு தன்னுடைய வார்த்தைகள் மூலமாக தங்களைத்தான் குறிப்பிடுகிறார் என்று அங்கிருந்த பரிசேயர் உணர்ந்துகொண்டார்கள். “நாங்கள் குருடரா?” என்று இயேசவிடம் அவர்கள் கேட்டார்கள். இயேசு அவர்களுடைய மாய்மாலத்தைத் தோலுரித்துக் காட்டினார். “உண்மையில் உங்கள் குருட்டுத்தனம் என்ன என்பதை நீங்கள் கண்டு, உங்கள் ஆவிக்குரிய நிலைக்காக மனம்வருந்தியிருந்தால், நீங்கள் யோவான் ஸ்நானகனுக்கு முன்பாகவே மனந்திரும்பியிருப்பீர்கள். பாவ மன்னிப்பையும் ஆசீர்வாதத்தையும் பெற்றிருப்பீர்கள். ஆனால் நீங்கள் உங்களை நீதிமான்களாகக் கருதிக்கொண்டு, உங்களுக்கு எல்லாம் தெரியும் என்று நீங்கள் உரிமை பாராட்டுவதால், உங்களை நீங்களே ஏமாற்றிக்கொள்கிறீர்கள். அவ்வித பெருமையினால் நீங்கள் உங்கள் குருட்டுத் தனத்தையும் கடினமனதையும் காண்பிக்கிறீர்கள். நீங்கள் உலகத்தின் ஒளியானவரிடத்திலிருந்து சிறிய அளவிலான ஒளியைக்கூட நீங்கள் பெற்றுக்கொள்ள மாட்டீர்கள்” என்றார்.

இது  water of life  இணையதளத்தில் இருந்து எடுக்கப்பட்டது