யோவான் 10 விளக்கவுரை

யோவான் 10 விளக்கவுரை

3. நல்ல மேய்ப்பன் இயேசு (யோவான் 10:1–39)

அ) உண்மையான மேய்ப்பனின் சத்தத்தை ஆடுகள் கேட்கிறது (யோவான் 10:1-6)

---

இயேசு 7 மற்றும் 8-ம் அதிகாரங்களில் தன்னுடைய எதிரிகளின் உண்மையான நிலையை அவர்களுக்குக் காண்பித்தார். அவர் 9-ம் அதிகாரத்தில் இறைவனைப் பற்றியும் அவருடைய மகனைப் பற்றியும் தங்களைப் பற்றியும் அவர்களுக்கிருந்த குருட்டுத்தனத்தைக் காண்பித்தார். பத்தாம் அதிகாரத்தில் தம்முடையவர்கள் பாவமுள்ள தலைவர்களைப் பின்பற்றாமல் தம்மைப் பினபற்றும்படி அவர்களை அழைக்கிறார். அவர் மட்டுமே இறைவனிடம் மக்களை வழிநடத்தும் ஒரே வாசலாகவும், நல்ல மேய்ப்பனாகவும் இருக்கிறார்.

யோவான் 10:1-6
1 மெய்யாகவே, மெய்யாகவே நான் உங்களுக்குச் சொல்லுகிறேன்; ஆட்டுத்தொழுவத்துக்குள் வாசல்வழியாய்ப் பிரவேசியாமல், வேறுவழியாய் ஏறுகிறவன் கள்ளனும் கொள்ளைக்காரனுமாயிருக்கிறான். 2 வாசல்வழியாய்ப் பிரவேசிக்கிறவனோ ஆடுகளின் மேய்ப்பனாயிருக்கிறான். 3 வாசலைக் காக்கிறவன் அவனுக்குத் திறக்கிறான்; ஆடுகளும் அவன் சத்தத்துக்குச் செவிகொடுக்கிறது. அவன் தன்னுடைய ஆடுகளைப் பேர்சொல்லிக் கூப்பிட்டு, அவைகளை வெளியே நடத்திக்கொண்டு போகிறான். 4 அவன் தன்னுடைய ஆடுகளை வெளியே விட்டபின்பு, அவைகளுக்கு முன்பாக நடந்துபோகிறான், ஆடுகள் அவன் சத்தத்தை அறிந்திருக்கிறபடியினால் அவனுக்குப் பின்செல்லுகிறது. 5 அந்நியருடைய சத்தத்தை அறியாதபடியினால் அவைகள் அந்நியனுக்குப் பின்செல்லாமல், அவனை விட்டோடிப்போகும் என்றார். 6 இந்த உவமையை இயேசு அவர்களுடனே சொன்னார்; அவர்களோ அவர் சொன்னவைகளின் கருத்தை அறியவில்லை.

சில கிராமங்களில் விவசாயிகள் தங்களுடைய மந்தையைப் பட்டியில் அடைத்து இரவில் அதைப் பாதுகாப்பார்கள். காலையில் மேய்ப்பர்கள் மந்தைகளை அழைத்துக்கொண்டே அந்தக் கூடாரத்திற்குள் நுழைவார்கள். அப்போது ஒரு ஆச்சரியமான நிகழ்ச்சி நடக்கும். மேய்ப்பர்கள் தங்கள் தங்கள் மந்தைகளைத் தேடிக் கண்டுபிடிக்க மாட்டார்கள். ஒவ்வொரு மந்தையும் தங்கள் மேய்ப்பனுடைய சத்தத்தைக் கேட்டு அவர்களுக்குப் பின் செல்லும். ஒருவேளை மேய்ப்பன் மாறு வேடத்தில் வந்திருந்தால்கூட, அவனுடைய சத்தத்தை வைத்து மந்தை அவனை அடையாளம் கண்டுகொள்ளும். அதேவேளையில் ஒரு போலியான மேய்ப்பன் மேய்ப்பனுடைய உடையில் வந்து மந்ûதையை அழைத்தாலும் அவை அசையாது. உண்மையான மேய்ப்பனுடைய சத்தத்தை மந்தை சரியாகக் கேட்டு அவனையே பின்பற்றிச் செல்லும். இவ்விதமாக மேய்ப்பன் தன்னுடைய மந்தையை அழைத்து, பசுமையான மேய்ச்சலுக்கும், புத்துணர்வளிக்கும் தண்ணீர்களண்டைக்கும் அவற்றை நடத்திச் செல்வான். மேய்ப்பனுடைய மந்தை அவனை நெருங்கிச் சேரும், ஒன்றும் பின்வாங்காது, ஏனெனில் அவை முழுமையாக தங்கள் மேய்ப்பனை நம்பும்.

தன்னுடைய சத்தத்தைக் கேட்க ஆயத்தமாயிருக்கிற அனைவருக்கும் தானே தெய்வீக மேய்ப்பன் என்பதைக் காண்பிக்கவே இயேசு இந்த உதாரணத்தைப் பயன்படுத்துகிறார். பழைய உடன்படிக்கையின் மக்களை திருடவோ, கொள்ளையிடவோ அவர் வரவில்லை. அவர்களில் இருக்கும் தன்னுடைய மக்களை அவர் தெரிந்துகொண்டு அவர்களை அழைக்க வந்தார். அவர் அவர்களைக் காப்பாற்றி அவர்களுக்கு ஆவிக்குரிய உணவைக் கொடுக்கிறார். மற்ற “மேய்ப்பர்கள்” மந்தையை விழுங்கும் கொடிய ஓநாய்களைப் போல சுற்றித் திரிபவர்கள். அவர்கள் வஞ்சகமாக உள்ளே நுழைகிறார்கள். மந்தைகளைப் பிடித்து விழுங்குகிறார்கள். அவர்கள் தங்களுக்காக வாழ்ந்து, தங்களையே கனப்படுத்துகிறார்கள். அவர்கள் மந்தைக்கு உண்மையாகப் பணிசெய்வதில்லை. இறைவனால் தனிப்பட்ட முறையில் அழைக்ப்படாமலும், கிறிஸ்துவில் உண்மையாக நிலைத்திராமலும் இருக்கும் போதகர்களும் திருச்சபைப் பணியாளர்களும் கொள்ளைக்காரர்கள் என்று இயேசுவினால் அழைக்கப்படுகிறார்கள். அவர்கள் யாருக்கும் உதவாமல் அவர்களுக்கு ஊறுவிளைவிக்கிறார்கள். இயேசுவை உண்மையாகப் பின்பற்றுபவர்கள், ஆபத்தை உணர்ந்து அப்படிப்பட்ட அந்நிய மேய்ப்பர்களைவிட்டு விலகியிருக்க வேண்டும் என்று இயேசு இதை முன்னறிவித்தார். சங்கீதம் 23ல் கர்த்தரே தன்னுடைய மந்தையின் மேய்ப்பராயிருக்கிறார் என்ற வாக்குத்தத்தத்தை நம்பும்படியாகவும் அவர் அவர்களை ஊக்கப்படுத்தினார்.

தங்களுடைய மேய்ப்பர்கள் உண்மையற்றவர்கள் என்றும் தீயவர்கள் என்றும் உணராத அந்த மக்கள் (எரேமியா 2:8; 10:21; எசே. 34:1-10; சகரியா 11:4-6), இயேசுவின் வார்த்தைகளைப் புரிந்துகொள்ளவில்லை. இருப்பினும் அவர்களுக்கு தானே நல்ல மேய்ப்பனாயிருந்து, தன்னுடைய மக்களை இரட்சித்து, மோசேயையும் தாவீதையும் போன்ற நல்ல மேய்ப்பர்களை அவர்களுக்குத் தர இறைவன் ஆயத்தமாயிருக்கிறார். “மேய்ப்பன்”, “மந்தை”, “தேவனுடைய ஆட்டுக்குட்டி”, “இரத்தம்சிந்தி மீட்டெடுத்தல்” போன்ற வார்த்தைகள் மேய்ப்பர்கள் வாழம் பகுதிகளில் பயன்படுத்தப்படுபவை. இறைவன் தன்னுடைய மகனில் நல்ல மேய்ப்பராகத் தன்னை வெளிப்படுத்துவதன் மூலம் அவர் நம்மீது அடிப்படையில் வைத்திருக்கும் கரிசனையை வெளிப்படுத்துகிறார்.

ஆ) இயேசுவே அதிகாரபூர்வமான வாசல் (யோவான் 10:7-10)

---

யோவான் 10:7-10
7 ஆதலால் இயேசு மறுபடியும் அவர்களை நோக்கி: நானே ஆடுகளுக்கு வாசல் என்று மெய்யாகவே மெய்யாகவே உங்களுக்குச் சொல்லுகிறேன். 8 எனக்கு முன்னே வந்தவர்களெல்லாரும் கள்ளரும் கொள்ளைக்காரருமாயிருக்கிறார்கள்; ஆடுகள் அவர்களுக்குச் செவிகொடுக்கவில்லை. 9 நானே வாசல், என் வழியாய் ஒருவன் உட்பிரவேசித்தால், அவன் இரட்சிக்கப்படுவான், அவன் உள்ளும் புறம்பும் சென்று, மேய்ச்சலைக் கண்டடைவான். 10 திருடன் திருடவும் கொல்லவும் அழிக்கவும் வருகிறானேயன்றி வேறொன்றுக்கும் வரான். நானோ அவைகளுக்கு ஜீவன் உண்டாயிருக்கவும், அது பரிபூரணப்படவும் வந்தேன்.

இறைவனுடைய மந்தைக்குச் செல்லும் வாசல் என்று இயேசு தன்னைச் சித்தரிக்கிறார். கிறிஸ்துவினாலே அன்றி திருச்சபையில் இருக்கும் மீட்கப்பட்டவர்களோடு ஐக்கியம்கொள்ள வேறு வழியில்லை. யார் கிறிஸ்து இல்லாமல் மக்களை பக்தியுள்ளவனாக்க முயற்சித்தால்அவன் இறைவனுடைய மந்தையை தவறான காரியங்களினால் குழப்புகிற திருடனுக்கு ஒப்பாயிருக்கிறான். பரிசுத்த ஆவியானவர் வேற்று வழிகளில் நம்மை நடத்தாமல் கிறிஸ்துவாகிய இடுக்கமான வாசல் வழியாகவே நம்மை நடத்துகிறார். யார் அந்த வழியாகச் செல்லவில்லையோ, யார் அவருடைய மாம்சத்தில் உட்கொண்டு, இரத்தத்தில் பானம்பண்ணவில்லையோ, அவர்கள் இறைமக்களுக்கு ஊழியம் செய்ய உரிமையற்றவர்கள். நாம் நம்முடைய சுயத்திற்கு மரித்து, கிறிஸ்துவின் மந்தைக்குள் சேர வேண்டும். அப்போது நாம் அவருடைய மந்தையாவோம்.

கிறிஸ்துவுக்கு முன்பாகவோ அல்லது அவருக்குப் பின்பாகவோ வந்த புகழ்பெற்ற மக்கள் யாராயிருந்தாலும் அவர்கள் பரிசுத்த ஆவியானவரினால் வாழ்ந்திராவிட்டால், அவர்கள் ஏமாற்றுகிற திருடர்களோ. தத்துவ ஞானிகள், சிந்தனையாளர்கள் மற்றும் தேசிய தலைவர்கள் யாராயிருந்தாலும் அவர்கள் இயேசுவை விசுவாசிக்காமலும் அவருக்கு ஒப்புக்கொடாமலும் இருப்பார்கள் என்றால் அவர்கள் கொள்ளைக்காரர்களே என்று இயேசு கூறுகிறார். அவர்கள் தங்கள் போதனைகளினாலும் நடத்தையினாலும் மக்களைக் கெடுக்கிறார்கள். ஆனால் கிறிஸ்துவின் ஆவியில் நிலைத்திருக்கும் உண்மையான தீர்க்கதரிசிகளோ அவருக்கு முன்னிருந்தவர்களாகவும், நொருங்கிய இருதயமுடையவர்களாகவும் வாசல் வழியாக இறைவனிடம் வருகிறார்கள். இயேசுவே அவர்களை ஆயத்தப்படுத்தி தன்னுடைய மந்தைக்கு உண்மையான சேவை செய்யும்படி அனுப்பி வைக்கப்பட்டவர்கள். ஒருவன் சுயத்திற்கு மரித்து, தன்னுடைய இரட்சிப்புக்காக இயேசுவைச் சார்ந்துகொள்ளும்வரை இறைவனுடைய மந்தைக்குள் செல்ல முடியாது. இயேசு தனக்குக் கீழ்ப்படிந்துள்ள மந்தையை இராஜாக்களும் ஆசாரியர்களுமாக்குகிறார். உண்மையான மேய்ப்பர்கள் தங்கள் மந்தையை விட்டு வெளியே சென்று இரட்சிக்கப்படும்படி மக்களை அழைக்கிறார்கள். பிறகு அவர்கள் அவரில் நிலைத்திருக்கும்படியாகவும் அவர் அவர்களில் நிலைத்திருக்கும்படியாகவும் அவர்களை மந்தைக்குள் கொண்டு வருகிறார்கள். அப்படிப்பட்ட மேய்ப்பர்கள், தாங்களும் கிறிஸ்துவின் மந்தைக்குட்பட்டவர்களாயிருப்பதால் அவர்கள் மந்தைக்கு மேலானவர்களாகத் தங்களைக் கருதுவதில்லை. யார் தாழ்மையுள்ளவர்களாயிருக்கிறார்களோ அவர்கள் பெலத்தையும் ஞானத்தையும் தங்கள் ஆண்டவரில் முழுமையாகப் பெற்றுக்கொள்கிறார்கள். தாழ்மையான இருதயம் இயேசுவில் நிச்சயமான மேய்ச்சலைக் கண்டடையும்.

நான்கு முறை தங்கள் சுய மகிமையைத் தேடி மற்றவர்களைக் கெடுக்கும் வேதபாரகரையும் ஆசாரியர்களையும் குறித்து இயேசு தன்னுடைய மந்தைக்கு எச்சரிப்புக் கொடுக்கிறார்.

அதேவேளையில் அனைவரும் தன்னிடத்தில் வந்து உண்மையான நல்வாழ்வையும் சமாதானத்தையும் பெற்றுக்கொள்ள வேண்டும் என்றும் மற்றவர்களுக்கு ஆசீர்வாதமாக விளங்க வேண்டும் என்றும் அழைப்பு விடுக்கிறார். யார் கிறிஸ்துவினிடத்தில் வருகிறார்களோ அவர்கள் மற்றவர்களுக்கு நற்குணங்களின் ஊற்றாகத் திகழ்வார்கள். மேய்ப்பர்கள் தங்களுக்காக வாழாமல் தங்கள் நாட்களையும் வாழ்க்கையையும் தங்கள் மந்தைக்காக தியாகம் செய்கிறார்கள். நம்முடைய தனிப்பட்ட இரட்சிப்புக்காக மட்டுமல்ல இறைவனுடைய ஆவியானவர் நமக்கு தெய்வீக வாழ்வைக் கொடுப்பதில்லை. நாம் நம்முடைய சுயத்தை வெறுத்து மற்றவர்களையும் நேசிக்கும்படி நம்மைப் பணியாளர்களாகவும் மேய்ப்பர்களாகவும் ஏற்படுத்துகிறார். நம்மில் அன்பு அதிகரிக்கும்போது அது மற்றவர்களுக்கும் பாய்ந்தோடும். கர்த்தருக்கா சேவை செய்வதைக் காட்டிலும் மேன்மையானது வேறு எதுவும் இல்லை. “அவர்கள் ஜீவன் பரிபூரணப்படவும்” என்ற சொற்றொடர் இதைத்தான் குறிக்கிறது.

இ) இயேசுவே நல்ல மேய்ப்பன் (யோவான் 10:11–21)

---

யோவான் 10:11-13
11 திருடன் திருடவும் கொல்லவும் அழிக்கவும் வருகிறானேயன்றி வேறொன்றுக்கும் வரான். நானோ அவைகளுக்கு ஜீவன் உண்டாயிருக்கவும், அது பரிபூரணப்படவும் வந்தேன். 12 நானே நல்ல மேய்ப்பன்: நல்ல மேய்ப்பன் ஆடுகளுக்காகத் தன் ஜீவனைக் கொடுக்கிறான். 13 மேய்ப்பனாயிராதவனும், ஆடுகள் தனக்குச் சொந்தமல்லாதவனுமான கூலியாள் ஓநாய் வருகிறதைக் கண்டு ஆடுகளை விட்டு ஓடிப்போகிறான்; அப்பொழுது ஓநாய் ஆடுகளைப்பீறி, அவைகளைச் சிதறடிக்கும்.

இராஜாக்களும் கள்ளத்தீர்க்கதரிசிகளும் ஆசாரியர்களும் இறைவனுடைய மக்களை மேய்ப்பன் இல்லாத ஆடுகள்போல சிதறடித்ததை இறைவன் பொறுத்துக்கொண்டிருந்தார். ஆகவே நல்ல மேய்ப்பனாகிய தன்னுடைய மகனை அவர் அனுப்பினார். அவர் வந்தபோது, “நானே உங்களுடைய மெய்யான அரசன், பிரதான ஆசாரியன், உங்களுக்கு இறுதி வெளிப்பாட்டைக் கொடுக்கும் தீர்க்கதரிசி, நான் ஆயத்தமாயிருக்கிறேன்” என்று அறிவித்தார். ஒரு மேய்ப்பனுக்குரிய பணிகள் அனைத்துமே கிறிஸ்துவின் ஆள்த்துவத்தில் அடங்கியிருக்கிறது. “வருத்தப்பட்டுப் பாரம் சுமக்கிறவர்களே, நீங்கள் என்னிடத்தில் வாருங்கள் நான் உங்களுக்கு இளைப்பாறுதல் தருவேன்” என்று அவர் சொல்லுகிறார். நான் உங்களைச் சூரையாட மாட்டேன். தவறான பாதையில் சொல்லும் உங்கள் வாழ்வை அனைத்துத் தீமைகளிலிருந்தும் காப்பேன்.

ஆரம்பத்திலிருந்தே தன்னுடைய மந்தைக்காக அவர் தன்னுடைய உயிரைக் கொடுக்க ஆயத்தமாயிருப்பது அவரே நல்ல மேய்ப்பன் என்பதற்கான ஆதாரமாயிருக்கிறது. அவர் தன்னுடைய சரீரத்தை மட்டும் நமக்காகக் கொடுப்பேன் என்று சொல்லாமல், தன்னுடைய ஆவி, ஆத்துமா, சரீரம் அனைத்தையும் தன்னுடைய மந்தையின் மீட்புக்காகக் கொடுக்கிறார். ஆரம்ப தரணத்திலிருந்தே அவர் தன்னைப் பின்பற்றுபவர்களுக்கு சேவை செய்வதற்கான உழைக்கிறார். அவருடைய சரீர மரணம் அவருடைய சுய தியாகத்தின் மணிமகுடம். இயேசு தனக்காக வாழ்ந்து, தனக்காக மரிக்காமல், உங்களுக்காக வாழ்ந்து, உங்களுக்காக மரித்தார் என்பதை நினைத்துக் கொள்ளுங்கள்.

உண்மையற்ற மேய்ப்பர்கள் ஆபத்து வரும்போது தங்களைக் காத்துக்கொள்ள மந்தையை விட்டுவிட்டு ஓடிப்போவார்கள். மந்தையைத் தாக்க ஓநாய்கள் வரும்போது அவர்கள் மந்தையையக் கைவிட்டு விடுவார்கள். அவர்கள் மிருகங்கள் அல்ல, ஆனாலும் மிருகங்களைப் போல நடந்துகொள்கிறார்கள். அவர்களுடைய தகப்பன் சாத்தான். முதன்மையான ஓநாயாகிய சாத்தானின் நோக்கமே மந்தையை விழுங்குவதுதான். அவன் பயங்கரமாக மந்தையைத் தாக்கி உபத்திரவப்படுத்தி கொலை செய்கிறான். மக்களை அவர்களுக்கு பிடித்தமான காரியங்களைக் காட்டி வசப்படுத்தவும், மெய்போல தோன்றும் பொய்களைக் கொண்டு அவர்களை மயக்கவும் அவன் நன்கறிவான். அன்பைக் காரணம்காட்டி கள்ள உபதேசத்தை போதகர்கள் அனுமதிக்கக்கூடாது. அன்பின் காரணமாக நாம் ஞானத்துடனும் தைரியத்துடனும் கள்ள உபதேசத்தை எதிர்த்து நிற்க வேண்டும். பிசாசின் ஆவிக்கு கிறிஸ்து எப்போதும் எதிர்த்து நின்றார் என்று அவருடைய வாழ்க்கை நமக்குக் கற்றுத் தருகிறது. அன்புடன் முழுமையான சத்தியத்தை தம்முடைய பணியாளர்களுக்கு அவர் கற்றுக்கொடுத்தார். சாத்தானுடைய தாக்குதல்களிலிருந்து அவர்கள் மந்தையைக் காக்கும்படியே அப்படிச் செய்தார். கொடிய ஓநாயின் நோக்கம் நமக்கு தெளிவாகத் தெரியும். பொய்யான குற்றச்சாட்டுகளினாலும் உபத்திரவத்தினாலும் அவன் இறைவனுடைய சபையை அழிக்க நினைக்கிறான். நீங்கள் இறைவனுடைய மந்தையில் சேவையை விரும்புகிறீர்களா அல்லது உங்களுக்கு கனம் கிடைக்க வேண்டும் என்று நாடுகிறீர்களா? நீங்கள் சேவையை விரும்பும்போது பிரச்சனைகளும், பாடுகளும், தியாகமுள்ள ஒரு வாழ்க்கையே உங்களுக்குக் கிடைக்கும். ஓய்வையோ, ஆதாயத்தையோ, இன்பத்தையோ நீங்கள் பெற்றுக்கொள்ள முடியாது.

யோவான் 10:14-15
14 நானே நல்ல மேய்ப்பன்; பிதா என்னை அறிந்திருக்கிறதுபோலவும், நான் பிதாவை அறிந்திருக்கிறதுபோலவும்,15 நான் என்னுடையவைகளை அறிந்தும் என்னுடையவைகளால் அறியப்பட்டுமிருக்கிறேன்; ஆடுகளுக்காக என் ஜீவனையும் கொடுக்கிறேன்.

நான் ஒரு தனிச்சிறப்பான மேய்ப்பன் என்று கிறிஸ்து மறுபடியும் உரிமை கோருகிறார். நம்முடைய எதிரி யார் என்பதை நாம் முழுமையாகப் புரிந்துகொள்ளாமையினாலும், மந்தையின் மனப்பான்மை என்ன என்று சரியாக நமக்குப் புரியாததாலும், அவர்களை எப்படி மேய்ச்சலுக்கு நடத்திச் செல்வது என்று தெரியாததாலும் நாம் ஊழியம் செய்ய வேண்டியபடி செய்ய முடியாதவர்களாயிருக்கிறோம். கிறிஸ்து ஒவ்வொருவருடைய பெயரையும் அறிந்திருக்கிறார். அவர்களுடைய இறந்த காலத்தையும் அவர்களுடைய சிந்தனைகளையும் எதிர்காலத்தையும் அறிந்திருக்கிறார்.

இயேசு தன்னுடைய மந்தையைத் தெரிந்துகொண்டு, தம்மை அறியும் ஆசீர்வாதத்தை அவர்களுக்குக் கொடுத்திருக்கிறார். அவர்கள் மேலும் அவரை அறியும்போது, அவர்கள் ஏன் இன்னும் தங்களை புறக்கணிக்காமல் இருக்கிறார் என்று ஆச்சரியப்படுகிறார்கள். அவருடைய பிரசன்னமே அவர்களுடைய குறைகளைக் காண்பிக்கிறது. அவரைச் சந்தித்தல் அதிக அன்பையும், நன்றியறிதலையும், அவருடனான நித்திய பிணைப்பையும் அவருடன் நமக்கு ஏற்படுத்துகிறது.

இயேசுவுக்கும் அவருடைய மந்தைக்கும் இடையிலான அறிவு மேலோட்டமானதாகவோ, உலகப்பிரகாரமானதாகவோ இல்லாமல், பரிசுத்த ஆவியானவரின் வரத்தினால் கொடுக்கப்படுகிறது. ஏனெனில் குமாரன் பிதாவைக் காண்பதுபோலவும் பிதா குமாரனைக் காண்பதைப் போலவும் நாம் அவரை உணர ஆரம்பிக்கிறோம். இது கிறிஸ்துவின் மூலமாக வரும் தெய்வீக அறிவினால், பரிசுத்த ஆவியானவர் வரும்போது ஒவ்வொரு கிறிஸ்தவனும் பரிசுத்த ஆவியினால் பெற்றுக்கொள்ளும் சத்தியத்தின் வெளிப்பாடாகிய இரகசியமாகும். அதற்கு பரிசுத்த ஆவியானவர் தம்முடைய மந்தையில் வாழ்ந்து அவர்களை நிரப்புகிறார் என்றும் பொருள்படும். அவருடைய மந்தையைச் சேர்ந்த யாரும் புறக்கணிக்கப்படவில்லை.

யோவான் 10:16
16 இந்தத் தொழுவத்திலுள்ளவைகளல்லாமல் வேறே ஆடுகளும் எனக்கு உண்டு; அவைகளையும் நான் கொண்டுவரவேண்டும், அவைகள் என் சத்தத்துக்குச் செவிகொடுக்கும், அப்பொழுது ஒரே மந்தையும் ஒரே மேய்ப்பனுமாகும்.

கிறிஸ்து ஒரு குறிப்பிட்ட இனத்துக்காக மட்டும் மரிக்காமல் அனைவருக்காவும் மரித்தார். பழைய ஏற்பாட்டின் கடின இருதயமுடையவர்களை மட்டுமல்ல, பல மக்களினங்களில் வாழும் தீயவர்களையும் அவர் இரட்சிக்கிறார். தன்னுடைய மரணம் உலகெங்கிலுமுள்ள அவருடைய மந்தையை திரளான இரட்சிக்கும் என்று முன்னுரைத்தார். யாரும் இறைவனிடத்தில் தானாக வரமுடியாது. நல்ல மேய்ப்பனாகிய வழிகாட்டி அவர்களுக்குத் தேவை. கிறிஸ்துவே அந்த வழிகாட்டி. அவர் தனிப்பட்டவர்களையும் இனங்களையும் இரட்சிக்க வல்லவராயிருக்கிறார். அவர் தன்னுடைய வார்த்தையினால் ஆவிக்குரிய வழிகாட்டுதலை அவர்களுக்களிக்கிறார். மந்தை தங்கள் மேய்ப்பனுடைய சத்தத்தைக் கேட்பதைப் போல அவருக்காக ஆயத்தம் பண்ணப்பட்டவர்கள் எங்கிருந்தாலும் அவருடைய சத்தத்தைக் கேட்டு, உடனடியாக மனமாற்றம் அடைகிறார்கள். பழைய ஏற்பாட்டில் தெரிந்துகொள்ளப்பட்டவர்களும், மக்களினங்களில் இருந்து இரட்சிக்கப்பட்டவர்களும் இணைந்து கிறிஸ்துவின் தலைமையின் கீழாக ஒரு புதிய மனிதனை உருவாக்குகிறார்கள். புதிய ஏற்பாட்டின் மக்கள் இன்று இயேசுவைத் தங்கள் மேய்ப்பராகக் கொண்ட இறைவனுடைய மந்தையாகக் காணப்படுகிறார்கள். நற்செய்தியை மகிழ்வுடன் கேட்டு, இறைமைந்தனாகிய கிறிஸ்துவை விசுவாசிப்பவர்கள், வெவ்வேறு சபைப் பிரிவுகளைச் சேர்ந்தவர்களாயிருந்தாலும், மெய்யான திருச்சபையிலேயே அவர்கள் அங்கம் வகிக்கிறார்கள். நாம் ஒரே ஆவியையும், ஒரே கர்த்தரையும் ஒரே பிதாவையும் பெற்றிருக்கிறோம். கிறிஸ்துவின் இரத்தத்தினால் கழுவப்பட்ட அனைவரிடத்திலும் பரிசுத்த ஆவியானவர் வந்து வாசம்பண்ணுகிறார். கிறிஸ்துவைச் சேர்ந்தவர்களின் ஐக்கியம் நாம் கற்பனை செய்ய முடியாத அளவு பெரியது. பூமியின் நான்கு மூலைகளில் இருந்தும் அவருடைய மந்தை கூட்டிச் சேர்க்கப்படுகிறது. அவரை விசுவாசித்து, எளிமையாக அவரைப் பின்பற்ற முன்வருபவர்களை மகிமைவரை வழிநடத்த நல்ல மேய்ப்பன் அவர்கள் நடுவில் வருகிறார். அப்போது ஒரே மந்தையும் ஒரே மேய்ப்பனுமாயிருக்கும். மனிதனுடைய வழிகளினாலும் முறைகளினாலும் உலக நோக்கத்திற்காக இன்று திருச்சபையை உண்டாக்க நினைப்பவர்கள் கொடிய ஓநாயின் வலையில் சிக்கிவிடுவார்கள். மந்தையின் கவனத்தை அதன் மேய்ப்பரைவிட்டு தன்னிடமாகத் திருப்புவதுதான் அந்த ஓநாயின் நோக்கமாகும். நாம் கிறிஸ்துவை நெருங்கிச் சேராமல் ஒருவர் மற்றொருவரை நெருங்கிச் சேர முடியாது.

யோவான் 10:17
17 நான் என் ஜீவனை மறுபடியும் அடைந்துகொள்ளும்படிக்கு அதைக்கொடுக்கிறபடியினால் பிதா என்னில் அன்பாயிருக்கிறார். 18 ஒருவனும் அதை என்னிடத்திலிருந்து எடுத்துக்கொள்ளமாட்டான்; நானே அதைக் கொடுக்கிறேன், அதைக் கொடுக்கவும் எனக்கு அதிகாரம் உண்டு, அதை மறுபடியும் எடுத்துக்கொள்ளவும் எனக்கு அதிகாரம் உண்டு. இந்தக் கட்டளையை என் பிதாவினிடத்தில் பெற்றுக்கொண்டேன் என்றார்.

இறைவன் அன்பாக இருக்கிறார் என்றும் அவர் எப்போதும் தன்னுடைய மகனை நேசிக்கிறார் என்றும் நாம் விசுவாசிக்கிறோம். இயேசு எப்போதும் தன்னுடைய பிதாவுக்குப் பிரியமானதையே செய்கிறார். உண்மையில் இறைவனைப் பிரியப்படுத்துவது எது என்று நாம் இங்கே வாசிக்கிறோம். சிலுவை மட்டுமே அவரைப் பிரியப்படுத்தக் கூடியது. கிறிஸ்துவின் மரணம் என்பது இறைவனால் தீர்மானிக்கப்பட்ட ஒன்று. ஆட்டுக்குட்டியின் இரத்தத்தினால் உண்டாகும் பரிகாரமும் பரிசுத்தமாகுதலும் இல்லாமல், மந்தையை பாவத்திலிருந்து காப்பதற்கு வேறு வழி எதுவும் இல்லை.

இயேசுவின் மரணமும் உயிர்த்தெழுதலும் மாபெரும் அற்புதங்களாகும். அவர் உயிர்தெழும்படி மரிக்க வேண்டும் என்று அவர் ஏற்கனவே சொல்லியிருந்தார். அவர் பாவிகளின் மீட்பை விரும்பியதால், எந்த நிர்ப்பந்தமும் இல்லாமல் தாமாகவே தம்மை ஒப்புக்கொடுத்தார். அவர் உண்மையான அன்பாயிருக்கிறார். அவர் தன்னுடைய உயிரை உலகத்தின் மீட்பிற்காகக் கொடுக்கவும், அதைத் திரும்ப எடுத்துக்கொள்ளவும் பிதா அவருக்கு அதிகாரம் கொடுத்திருந்தார். சிலுவையில் இயேசுவுக்குக் கிடைத்த முழுமையான வெற்றியை யாராலும் தடுக்க முடியவில்லை. பிசாசும் அவனைப் பின்பற்றியவர்களும் அவருடைய மீட்பின் செயலைத் தடுக்க முயற்சித்தார்கள். கிறிஸ்துவின் வல்லமையுள்ள அன்பிற்கு முன்பாக அந்த கெட்ட காரியங்கள் தோற்றுப் போனது. காய்பாவோ, பிலாத்துவோ யாரும் அவரைக் கொலைசெய்யவில்லை. அவரே மரிப்பதற்குச் சித்தம்கொண்டார். ஓநாயைக் கண்டு அவர் ஓடிப்போகாமல், நம்மை மீட்கும்படி அவர் தன்னை ஒப்புக்கொடுத்தார். இது இறைவனுடைய பரிபூரண சித்தமாயிருந்தது. அவர் பரலோகத்திற்கும் நரகத்திற்கும் இடையிலான யுத்தத்தை சிலுவையினால் வெற்றிகொண்டார். அந்த நாளிலிலிருந்து அவருடைய மந்தைக்கு ஆட்டுக்குட்டியானவரின் இரத்தத்தினால் நிச்சயமான நம்பிக்கை உண்டாயிருக்கிறது. பாடுகள் துயரங்களிலிருந்து இயேசு நம்மை மகிமைக்குள் நடத்திச் செல்வார்.

யோவான் 10:19-21
19 இந்த வசனங்களினிமித்தம் யூதருக்குள்ளே மறுபடியும் பிரிவினையுண்டாயிற்று. 20 அவர்களில் அநேகர்: இவன் பிசாசு பிடித்தவன், பயித்தியக்காரன்; ஏன் இவனுக்குச் செவிகொடுக்கிறீர்கள் என்றார்கள். 21 வேறே சிலர்: இவைகள் பிசாசு பிடித்தவனுடைய வசனங்களல்லவே. குருடருடைய கண்களைப் பிசாசு திறக்கக்கூடுமா என்றார்கள்.

யூதத் தலைவர்களால் அனுப்பப்பட்டவர்கள் தங்கள் அதிகாரிகளை இயேசு கொள்ளைக்காரர்கள் என்றும் சாத்தானுடைய தூதர்கள் என்றும் சொன்னதைக் கேட்ட கோபமடைந்தார்கள். மேலும் அவர் தன்னை நல்ல மேய்ப்பன் என்றும் அதிலும் எல்லா இனங்களுக்கும் நல்ல மேய்ப்பன் என்று உரிமை பாராட்டியதும் அவர்களைக் கோபப்படுத்தியது. ஏனெனில் யூதர்கள் புறவினத்து மக்களை தங்களோடு இணைத்துப் பார்ப்பதைக் கொடிய பாவமாகக் கருதினார்கள். தாங்கள்தான் இறைவனால் தெரிந்துகொள்ளப்பட்டவர்கள் என்று கருதினார்கள். அவரைப் பிசாசு பிடித்தவர் என்றும் பைத்தியக்காரன் என்றும் கூறி அவரினிமித்தம் இடறலடைந்தார்கள். அங்கு நின்றுகொண்டிருந்தவர்களில் பலர் இந்தக் குற்றச்சாட்டை ஏற்றுக்கொண்டனர். இயேசுவின் தெய்வீக போதனைகளை மக்களால் புரிந்துகொள்ள முடியாத காரணத்தினால் அவர்கள் இயேசுவுக்கு எதிராகத் திரும்பினார்கள்.

ஆயினும் அவரைக் கேட்டுக்கொண்டிருந்தவர்களில் சிலர், இயேசுவின் வார்த்தைகளில் இறைவனுடைய வார்த்தைகளைத் தாங்கள் கேட்பதாக தைரியமாகப் பொதுமக்கள் நடுவில் அறிக்கை செய்தார்கள். அவருடைய வார்த்தைகள் பயனற்ற சிந்தனைகள் அல்ல, அவை வல்லமையும் படைப்பாற்றலும் மிக்கவை. அவர் குருடனுடைய பாவங்களை மன்னித்தார். கருத்தோடு அவருக்குச் செவிகொடுத்த சிலரிடத்தில் கிறிஸ்துவின் அன்பு வேர்கொண்டபோது மக்கள் நடுவில் அவர் மீதான வெறுப்பு அதிகரித்தது. இயேசு ஒரு குறிப்பான இலக்கை நோக்கி எப்போதுமே தன்னுடைய மந்தையை அமைதியாக நடத்துகிறார்.

ஈ) பிதாவோடும் குமாரனோடும் உள்ள ஐக்கியத்தில் நமக்கிருக்கும் பாதுகாப்பு (யோவான் 10:22-30)

---

யோவான் 10:22-26
22 பின்பு எருசலேமிலே தேவாலயப்பிரதிஷ்டைபண்டிகை வந்தது; மாரிகாலமுமாயிருந்தது. 23 இயேசு தேவாலயத்தில் சாலொமோனுடைய மண்டபத்திலே உலாவிக்கொண்டிருந்தார். 24 அப்பொழுது யூதர்கள் அவரைச் சூழ்ந்துகொண்டு: எதுவரைக்கும் எங்கள் ஆத்துமாவுக்குச் சந்தேகம் உண்டாக்குகிறீர், நீர் கிறிஸ்துவானால் எங்களுக்குத் தெளிவாய்ச் சொல்லும் என்றார்கள். 25 இயேசு அவர்களுக்குப் பிரதியுத்தரமாக: அதை உங்களுக்குச் சொன்னேன், நீங்கள் விசுவாசிக்கவில்லை; என் பிதாவின் நாமத்தினாலே நான் செய்கிற கிரியைகளே என்னைக்குறித்துச் சாட்சிகொடுக்கிறது. 26 ஆனாலும், நான் உங்களுக்குச் சொன்னபடியே, நீங்கள் என் மந்தையின் ஆடுகளாயிராதபடியினால் விசுவாசியாமலிருக்கிறீர்கள்.

தேவாலயப் பிரதிஷ்டைப் பண்டிகை என்பது கி. மு. 515ல் யூதர்கள் பாபிலோனுக்குச் சிறைப்பட்டுப் போய் திரும்பி வந்து தேவலாயத்தைப் புதுப்பித்ததை நினைவுகூர்ந்து கொண்டாடும் மகிழ்ச்சி ஆரவாரம் மிக்க ஒரு தருணமாகும். மக்கபேயர்கள்தான் அந்த தேவாலயத்தை கி. மு. 165 திரும்பக் கட்டினார்கள். அது டிசம்பர் மாதத்தின் ஆரம்பத்தில் கொண்டாடப்படும் பண்டிகையாகும். எருசலேம் 750 மீட்டர் உயரத்தில் இருப்பதால், அது குளிரும் மழையுமுள்ள காலமாகக் காணப்படும். ஏற்கனவே துன்பத்திற்குள்ளான இயேசு, இந்த சந்தர்ப்பத்தில் மறுபடியும் தேவாலயத்திற்குள் வந்து, அங்கு வருபவர்கள் கேட்கும்படி சாலமோனுடைய மண்டபத்தில் பிரசங்கித்துக்கொண்டிருந்தார். இந்த கிழக்கு மண்டபம் அப்போஸ்தலர் 3:11 மற்றும் 5:12 ஆகிய பகுதிகளில் மறுபடியும் குறிப்பிடப்படுகிறது.

இந்த சந்தர்ப்பத்தில் யூதர்கள் இயேசுவைத் தாக்க ஆயத்தப்பட்டார்கள். அவர் எதிர்பார்க்கப்படும் மேசியாவா இல்லையா என்பதை பொதுமக்களுக்கு அறிவிக்க வேண்டும் என்று அவர்கள் கேட்:டுக்கொண்டார்கள். மக்கள் எதிர்பார்த்திருந்த மேசியாவைக் காட்டிலும் மேன்மையான, பரந்துபட்ட காரியங்களைச் செய்யும் ஒருவராகவே அவர் தன்னை அறிவித்தார். அவர்கள் எதிர்பார்த்திருந்ததற்கும் அதிகமான காரியங்களை இயேசு சொன்னபோது அவர்கள் இடறலடைந்தார்கள். ஆனால் இயேசு மேசியாவாக இருக்க முடியும் என்று சிலர் நம்பினார்கள். அவருடைய ஆள்த்துவமும், அதிகாரமும், அவருடைய செயல்களும் மக்களை நம்ப வைத்தது.

அவர்கள் இவ்வாறு கேட்டதன் மூலமாக ஒரு கிறிஸ்தவ தேசிய இயக்கத்திற்கு அவர் மக்களை அழைக்கும்படி இயேசுவை வற்புறுத்தினார்கள். அந்தப் பண்டிகை மக்கபேயர்களுடைய புரட்சியின் நினைவாகத்தானே கொண்டாடப்பட்டது. அவர் தன்னை அரசனாக அதிகாரபூர்வமாக அறிவித்து, மக்களை ஆயுதமேந்த அழைப்பார் என்று அவர்கள் நம்பினார்கள். அவர்கள் ரோமப் பேரரசின் ஆட்சியைப் புறக்கணித்து அதற்கு எதிராகப் போரிடவும் ஆயத்தமாயிருந்தார்கள். இயேசுவின் திட்டமோ வேறுவிதமாக இருந்தது. அவர் தாழ்மையையும், அன்பையும், மனமாற்றத்தையும் பற்றி பேசினார். இயேசு தான் மேசியா என்பதை யூதர்களிடம் சொல்லவில்லை. ஆனால் சமாரியப் பெண்ணிடம் சொன்னார். குணமாக்கப்பட்ட குருடனிடத்திலும் தன்னுடைய மகிமையை அவர் அறிக்கை செய்தார். கொடூரமான அரசியல்வாதியாகிய ஒரு மேசியாவை யூதர்கள் எதிர்பார்த்தார்கள். அவரோ இரக்கமுள்ள ஆன்மீக இரட்சகராக காணப்பட்டார். மக்கள் அதிகாரத்தையும், விடுதலையையும், மகத்துவத்தையும் குறித்துக் கனவு கண்டுகொண்டிருந்தார்கள். இயேசுவோ சுய வெறுப்பையும், மனஸ்தாபத்தையும், புதுப்பித்தலையும் குறித்துப் பேசினார். அவர் தன்னுடைய மேன்மையை அவர்களுக்கு அறிவித்தார். ஆனால் அவர்கள் அதைப் புரிந்துகொள்ளாமல், அவரிடம் இல்லாததை எதிர்பார்த்தார்கள். அவர்களுடைய சிந்தையும் கிறிஸ்துவின் சிந்தையும் ஒத்துப்போகவில்லை. விசுவாசம் அவர்களுடைய இருதயத்தில் தோன்றவில்லை. இயேசுவின் ஆவிக்கு அவர்கள் தங்கள் இருதயத்தைத் திறந்துகொடுக்கவில்லை. அவரைத் தாங்கி, அவருக்கு வெற்றியளித்த பிதாவின் நாமத்திலே அவர் அற்புதங்களைச் செய்தார். யூதர்கள் பிதாவுக்கும் குமாரனுக்கும் இடையிலான உறவையே ஏற்றுக்கொள்ளவில்லை. அவர்கள் இன்றுவரை தீவிரவாதத்தையும், பணத்தையும், எல்லைகளை விரிவாக்குதலையுமே தேடுகிறார்கள்.

யோவான் 10:27-28
27 என் ஆடுகள் என் சத்தத்திற்குச் செவிகொடுக்கிறது; நான் அவைகளை அறிந்திருக்கிறேன், அவைகள் எனக்குப் பின்செல்லுகிறது. 28 நான் அவைகளுக்கு நித்தியஜீவனைக் கொடுக்கிறேன்; அவைகள் ஒருக்காலும் கெட்டுப்போவதில்லை, ஒருவனும் அவைகளை என் கையிலிருந்து பறித்துக்கொள்ளுவதுமில்லை.

இயேசு இறைவனுடைய தாழ்மையுள்ள ஆட்டுக்குட்டியாக இருக்கிறார். அவர் தன்னைப் பின்பற்றிவரும் மந்தைகளும் ஆட்டுக்குட்டிகளுமானவர்களைப் பார்த்து, தன்னுடைய தன்மையை அணிந்துகொள்ளும்படி அறிவுறுத்துகிறார். பரிசுத்த ஆவியானவர் அவர்களைப் புதிய படைப்புகளாக மாற்றி, இயேசுவின் சத்தத்தை கேட்கும்படி அவர்களுடைய மனதையும் இருதயத்தையும் திறந்திருக்கிறபடியால், அவருக்குச் செவிகொடுப்பதே அவர்களுடைய முதன்மையான குணாதிசயமாயிருக்கிறது. விருப்பத்துடன் செவிகொடுப்பதே சீஷத்துவத்தின் ஆரம்பமாகும்.

தன்னுடைய வார்த்தைக்குச் செவிகொடுப்பவர்களைக் கிறிஸ்து தனிப்பட்ட முறையில் அறிந்திருக்கிறார். அவர் அவர்களை நேசித்து, அவர்களுடைய இரகசியங்கள் அனைத்தையும், அவர்களை எவ்விதமான சாயலில் மாற்றப் போகிறார் என்பதையும் அறிந்திருக்கிறார். மெய்க்கிறிஸ்தவர்கள் இலக்கற்றவர்களாக, பொறுப்பற்றவர்களாக வாழமாட்டார்கள். அவர்கள் அறியப்பட்டிருக்கிறார்கள், அவர்களுடைய பெயர்கள் பரலோகத்தில் பதிவு செய்யப்பட்டிருக்கிறது. அவர்கள் ஒவ்வொருவரும் இறைவனுடைய புதிய படைப்புகளாகவும் அற்புதங்களாகவும் இருக்கிறார்கள்.

இயேசு நல்ல மேய்ப்பனைப் போல இருக்கிறார். அவருடைய மந்தைகள் அவருடைய சத்தத்தை அறிந்திருக்கிறது. அவரை மகிழ்வுடன் பின்சென்று அவருடைய தலைமைத்துவத்திற்கு மனப்பூர்வமாக ஒப்புக்கொடுக்கிறது. அவை தங்கள் மேய்ப்பனுடைய சித்தத்தைத் தவிர வேறு எதையும் விரும்புவதில்லை. எந்தத் தீமையான சிந்தனைகளுக்கும் அவர்களுடைய இருதயத்தில் இடமில்லை. அவைகள் சாந்தமுள்ள ஆடுகளாயிருக்கிறது.

கிறிஸ்து அவர்களில் செயல்பட்டதாலேயே இந்த மாற்றம் அவர்களில் ஏற்பட்டிருக்கிறது. பாவத்தையும் மரணத்தையும் வெல்வதற்கு வேண்டிய இறைவனுடைய அன்பையும் வல்லமையையும் அவர் அவர்களுக்குக் கொடுத்திருக்கிறார். அவர்கள் அவருடைய ஈவாகிய நித்திய வாழ்வைப் பெற்றிருப்பதால், மரிக்காமல் என்றும் பிழைத்திருப்பார்கள்.அவர்கள் நித்திய நியாயத்தீர்ப்பிலும் அழிவிலுமிருந்து காக்கப்பட்டிருக்கிறார்கள். கிறிஸ்துவின் இரத்தத்தினால் நீதிமான்களாக்கப்பட்டிருக்கிறார்கள்.

கிறிஸ்துவின் இரத்தத்தினால் விலைகொடுத்து வாங்கப்பட்ட எந்த மந்தையும் அழிந்து போகாது. அவர் தன்னுடைய மகிமையை விட்டு மனித குலத்தை மீட்கும்படியாக இறங்கி வந்து, அவர்களுக்கு வாழ்வளிப்பதற்காக தன்னுடைய உயிரைக் கொடுத்தார். எந்த விலைகொடுத்தாகிலும் அவர்களைக் காத்துக்கொள்ள வேண்டும் என்று அவர் தீர்மானித்திருக்கிறார். உங்கள் ஆண்டவருடைய கரத்தில் உங்களுக்கு நம்பிக்கையிருக்கிறதா? நீங்கள் கிறிஸ்துவின் திறமையையும் வல்லமையையும் நம்புகிறீர்களா? ஒன்று நீங்கள் இந்த உலகத்தில் பாவியாக அலைய வேண்டும் அல்லது பரிசுத்த ஆவியினால் நிறைந்து, கிறிஸ்துவினால் இறைவனுடைய பிள்ளையாக மாற்றப்பட வேண்டும். கர்த்தருடைய பாதுகாப்பு நம்முடைய செயல்களைக் காட்டிலும் வல்லமையுள்ளது. ஏனெனில் அது நம்முடைய அறிவையும் தாண்டி வேலைசெய்யும். நாம் வெற்றியாளராகிய கிறிஸ்துவின் அருகில் நிற்போம்.

யோவான் 10:29-30
29 அவைகளை எனக்குத் தந்த என் பிதா எல்லாரிலும் பெரியவராயிருக்கிறார்; அவைகளை என் பிதாவின் கையிலிருந்து பறித்துக்கொள்ள ஒருவனாலும் கூடாது. 30 நானும் பிதாவும் ஒன்றாயிருக்கிறோம் என்றார்.

இந்த வாலிபனாகிய கிறிஸ்து தங்களை மரணம், சாத்தான் மற்றும் இறைவனுடைய கோபம் ஆகியவற்றிலிருந்து நம்மைக் காப்பாரா என்ற சில விசுவாசிகளுக்குச் சந்தேகம் வரும். இது புரிந்துகொள்ளுதலுக்கு அப்பாற்பட்டது. அதனால்தான் இயேசு தன்னுடைய சீஷர்களுக்கு தனது பிதாவையும் அவருடைய சர்வவல்லமையையும் நினைப்பூட்டுகிறார். பிதாவே இயேசுவைப் பின்பற்றும் ஒவ்வொரு தனிமனிதனையும் தெரிந்துகொள்கிறார். பிதாவினுடைய தெரிந்துகொள்ளுதலும் சித்தமும் இல்லாமல் ஒருவரும் இயேசுவைப் பின்பற்ற முடியாது.

குமாரனை விசுவாசிக்கும் ஒவ்வொருவனுக்கும் பிதாவாகிய இறைவன் பொறுப்பாளியாயிருக்கிறார். பிதா மேன்மையானவரும் சர்வவல்லமையுள்ளவருமாயிருக்கிறார். இயேசு தன்னையே பிரியப்படுத்தி வாழாமல் தன்னுடைய பிதாவுக்குத் தன்னை ஒப்புக்கொடுத்திருக்கிறார்.

இதுதான் சுயவெறுப்பின் அளவுகோல். தெய்வத்துவத்தின் பரிபூரணம் முழுமையும் அவருக்குள் இருந்தது. சிலர் கிறிஸ்து பிதாவைக் காட்டிலும் சிறியவர் என்று பேசுகிறார்கள். ஆனால் பரிசுத்த ஆவியானவர் யார் தன்னை உயர்த்துகிறானோ அவன் தாழ்த்தப்படுவான் என்றும் யார் தன்னைத் தாழ்த்துகிறானோ அவன் உயர்த்தப்படுவான் என்றும் சொல்லுகிறார். இயேசு தன்னுடைய பிதாவிற்கு அனைத்து மகிமையையும் கொடுத்தபடியால், “நானும் என் பிதாவும் ஒன்றாயிருக்கிறோம்” என்று சொல்லும் உரிமையை அவர் பெற்றிருக்கிறார். இயேசு இவ்விதமாக வெளிப்படையாகப் பேசுவதால் நாங்கள் இன்னொரு இறைவனை உருவாக்குகிறோம் என்ற குற்றச்சாட்டு வலுவிழந்து போகிறது. நாங்கள் மூன்று தெய்வங்களை வழிபடவில்லை. ஒரே இறைவனைத்தான் வழிபடுகிறோம். கிறிஸ்துவுக்கும் பிதாவுக்கும் இருக்கும் இந்த ஒற்றுமையை புரிந்துகொள்ள முடியாதவர்கள் பெருமையுள்ளவர்களாயிருக்கிறார்கள். தாழ்த்துவதில்தான் மேன்மை ஆரம்பிக்கிறது என்பதை உணராதிருக்கிறார்கள்.

உ) இறைமகனில் பிதா, பிதாவில் இறைமகன் (யோவான் 10:31-36)

---

யோவான் 10:31-36
31 அப்பொழுது யூதர்கள் மறுபடியும் அவர்மேல் கல்லெறியும்படி, கல்லுகளை எடுத்துக்கொண்டார்கள். 32 இயேசு அவர்களை நோக்கி: நான் என் பிதாவினாலே அநேக நற்கிரியைகளை உங்களுக்குக் காண்பித்தேன், அவைகளில் எந்தக் கிரியையினிமித்தம் என்மேல் கல்லெறிகிறீர்கள் என்றார். 33 யூதர்கள் அவருக்குப் பிரதியுத்தரமாக: நற்கிரியையினிமித்தம் நாங்கள் உன்மேல் கல்லெறிகிறதில்லை; நீ மனுஷனாயிருக்க, உன்னை தேவன் என்று சொல்லி, இவ்விதமாக தேவதூஷணஞ்சொல்லுகிறபடியினால் உன்மேல் கல்லெறிகிறோம் என்றார்கள். 34 இயேசு அவர்களுக்குப் பிரதியுத்தரமாக: தேவர்களாயிருக்கிறீர்கள் என்று நான் சொன்னேன் என்பதாய் உங்கள் வேதத்தில் எழுதியிருக்கவில்லையா? 35 தேவவசனத்தைப் பெற்றுக்கொண்டவர்களை தேவர்கள் என்று அவர் சொல்லியிருக்க, வேதவாக்கியமும் தவறாததாயிருக்க, 36 பிதாவினால் பரிசுத்தமாக்கப்பட்டும், உலகத்தில் அனுப்பப்பட்டும் இருக்கிற நான் என்னை தேவனுடைய குமாரன் என்று சொன்னதினாலே தேவதூஷணஞ்சொன்னாய் என்று நீங்கள் சொல்லலாமா?

“நானும் என் பிதாவும் ஒன்றாயிருக்கிறோம்” என்று இயேசு சொன்னதைக் கேட்ட யூதர்கள் அவரை வெறுத்தார்கள். அவர் தன்னைக் குறித்து கொடுத்த சாட்சி அவர்களுக்குத் தேவதூஷணமாகத் தெரிந்தது. அதற்காக அவரைக் கல்லெறியும்படி முயற்சித்தார்கள். அல்லது யெகோவா இறைவனுடைய கோபம் தங்கள் இனத்தின் மீது பற்றியெரியும் என்று அவர்கள் நம்பினார்கள். ஆகவே அவர்கள் தேவாலயத்தின் வெளிப்பிரகாரத்திற்கு ஓடிவந்து அவர்மேல் எறியும்படி கல்லுகளை எடுத்துக்கொண்டார்கள்.

இயேசு அமைதியாக நின்று அவர்களைப் பார்த்துக் கேள்விகளைக் கேட்டார். “நான் உங்களுக்குச் செய்த தீமை என்ன? நான் உங்களுக்கு ஊழியம் செய்து, பிணியாளிகளைக் குணமாக்கி, குருடருடைய கண்களைத் திறந்தேன். குஷ்டரோகிகளைச் சுகமாக்கி ஏழைமக்களுக்கு நற்செய்தியைப் பிரசங்கித்தேன். இவற்றில் எந்தச் செயலுக்காக நீங்கள் என்மீது கல்லெறியப்பார்க்கிறீர்கள்? உங்களுக்கு நன்மை செய்பவரையே நீங்கள் அழிக்கப்பார்க்கிறீர்கள். நான் செய்த ஊழியத்திற்காக உங்களிடம் பணத்தையோ, மதிப்பையோ எதிர்பார்க்கவில்லை. நான் தாழ்மையுடன் அச்செயல்கள் என் பிதாவினுடையவைகள் என்று சொன்னேன். நான் உங்கள் ஊழியக்காரனாக இங்கு நிற்கிறேன்.”

“நீ செய்த அற்புதங்களுக்காக அல்ல, உன்னுடைய தேவதூஷணத்திற்காகவே நாங்கள் உன்மேல் கல்லெறிகிறோம். நீ எங்கள் நடுவில் ஒரு சாதாரண மனிதனாக நின்றுகொண்டு, உன்னை இறைவனுடைய நிலைக்கு உயர்த்தகிறாய். நீ அழியக்கூடிய மனிதன்தான் என்பதைக் காட்டும்படிக்கு நாங்கள் இப்போது உன்னுடைய இரத்தத்தைச் சிந்தப் போகிறோம். நானும் இறைவனும் ஒன்று என்று நீ எப்படிச் சொல்லாம்? நீ பிசாசு பிடித்தவனாயிருப்பதால் உடனடியாகக் கொல்லப்பட வேண்டியவன்” என்று யூதர்கள் அவர் மீது பாய்ந்தார்கள்.

இயேசு முழு நம்பிக்கையுடன் அவர்களுக்குப் பதில் சொன்னார். “நீங்கள் தேவர்கள் என்றும் உன்னதமானவரின் மக்கள் என்றும் நான் சொல்லியிருந்தேன் (சங்கீதம் 82:6) என்பதாக நீங்கள் உங்கள் நியாயப்பிரமாணத்தில் வாசிக்கிறதில்லையா? நீங்கள் அழிந்துபோகிறவர்களாகவும் பாவங்களில் விழுகிறவர்களாகவும் இருக்கிறீர்கள். அனைவருமே பாவிகள் என்பதில் சந்தேகம் இல்லை. அப்படிப்பட்டவர்களை இறைவன் தன்னுடைய தெய்வீக நாமத்தினிமித்தம் அவர்களை “தேவர்கள் என்றும் தேவமக்கள்” என்று அழைத்திருக்கிறார். நீங்கள் அழிவதை அல்ல என்றும் வாழ்வதையே அவர் விரும்புகிறார். நீங்கள் இறைவனிடம் திரும்பி அவர் பரிசுத்தராயிருப்பதைப் போல நீங்களும் பரிசுத்தராயிருங்கள்.”

“நீங்கள் ஏன் என்னைக் கல்லெறிய வேண்டும்? இறைவனே “தேவர்கள் என்றும் பிள்ளைகள்” என்றும் தம்மக்களை அழைக்கிறாரே. நான் உங்களைப் போல பாவம் எதையும் செய்யவில்லையே. நான் என்னுடைய வாழ்க்கையிலும் வார்த்தையிலும் பரிசுத்தமாயிருக்கிறேன். மெய்யான இறைமகனாக என்றும் வாழும் உரிமை எனக்கிருக்கிறது. நீங்கள் உங்கள் நியாயப்பிரமாணத்தை வாசித்துப் பாருங்கள். அப்பொழுது என்னைப் பற்றி தெரிந்துகொள்வீர்கள். நீங்கள் உங்கள் வேதவாக்கியங்களையே நம்பாதபடியால் என்னுடைய தெய்வீகத்தை உங்களால் ஏற்றுக்கொள்ள முடியவில்லை.”

“நான் என்னுடைய சுய விருப்பத்தின்படி வரவில்லை. என்னுடைய பரிசுத்த பிதாவே என்னை அனுப்பினார். நான் அவருடைய குமாரன். அவர் என்னுடைய பிதா. அவருடைய பரிசுத்தம் என்னில் தங்கியிருக்கிறது. ஆகவே, நான் இறைவனில் இறைவனாகவும், ஒளியிலிருந்து வரும் ஒளியாகவும், படைக்கப்படாமல் பெற்றெடுக்கப்பட்டவராகவும், பிதாவின் அதே தன்மையுடயவராகவும் இருக்கிறேன்.”

இயேசு அவர்களுடைய வேதாகமத்திலிருந்தே பகுதிகளை எடுத்துக் காண்பித்து, அவர்களுடைய வாதங்களை முறியடித்தார். அவர்களுடைய கண்களில் வெறுப்பு இன்னும் கனன்றுகொண்டிருந்தாலும், இயேசு அவர்களுடைய வேதாகமத்திலிருந்து தெய்வீக குமாரத்துவத்தைக் குறித்து நிரூபித்துக் காட்டியதால் ஓங்கிய கரங்களை இறக்கிக்கினார்கள்.

யோவான் 10:37-39
37 என் பிதாவின் கிரியைகளை நான் செய்யாதிருந்தால், நீங்கள் என்னை விசுவாசிக்கவேண்டியதில்லை. 38 செய்தேனேயானால், நீங்கள் என்னை விசுவாசியாதிருந்தாலும், பிதா என்னிலும் நான் அவரிலும் இருக்கிறதை நீங்கள் அறிந்து விசுவாசிக்கும்படி அந்தக் கிரியைகளை விசுவாசியுங்கள் என்றார். 39 இதினிமித்தம் அவர்கள் மறுபடியும் அவரைப் பிடிக்கத் தேடினார்கள், அவரோ அவர்கள் கைக்குத் தப்பி,

இயேசு தொடர்ந்து அவர்களுக்கு விளக்கிக் கூறினார். “இறைவனைப் போல நானும் இரக்கத்தின் செயல்களைச் செய்வதால் நீங்கள் என்னை விசுவாசிக்க வேண்டும். நான் இரக்கத்தின் செயல்களைச் செய்யாதபட்சத்தில் எனக்கு பிதாவின் அதிகாரம் இருக்காது. நான் அன்பின் மறுவுரவாதலாயிருக்கிற காரணத்தினால் இறைவனுடைய செயல்களைச் செய்யும் அதிகாரம் எனக்குக் கொடுக்கப்பட்டிருக்கிறது. அவை உண்மையில் பிதாவின் கிரியைகளே.”

“மனிதத் தன்மையில் தெய்வீகத்தைப் புரிந்துகொள்ள ஒருவேளை உங்களால் முடியாமல் இருக்கலாம். ஆயினும் என்னுடைய அற்புதமான செயல்களைப் பாருங்கள். மரித்தவர்களை யார் வார்த்தையினால் உயிருடன் எழுப்ப முடியும்? யாரால் பிறவிக் குருடனுடைய கண்களைத் திறக்கவும், ஐந்து அப்பங்கள் இரண்டு மீன்களைக் கொண்டு ஐயாயிரம் பேருக்கு உணவளிக்க முடியும்? இறைவன் என்னில் இருக்கிறார் என்பதை நீங்கள் அறிந்துகொள்ளும்படி பரிசுத்த ஆவியானவர் உங்கள் கண்களைத் திறக்க வேண்டும் என்று நீங்கள் விரும்புகிறீர்களா? நீங்கள் பரிசுத்த ஆவியினால் நிறைந்தால் மட்டுமே, என்னைப் பற்றிய அடிப்படையான அறிவை நீங்கள் பெற்று, தெய்வத்துவம் சரீரப்பிரகாரமாக என்னில் வாசமாயிருக்கிறது என்பதை அறிந்துகொள்வீர்கள்.”

அவரைக் கொல்லவந்த இந்தக் கூட்டத்தைப் பார்த்து இயேசு இந்த வல்லமையான வார்த்தைகளைக் கூறினார். கொடியானது செடியில் நிலைத்திருந்து தனக்கு வேண்டிய சத்தை செடியிலிருந்து பெற்றுக்கொள்வதைப் போல கிறிஸ்துவும் பிதாவிலிருந்து புறப்பட்டு வந்து அவரில் நிலைத்திருக்கிறார். அவர்கள் இருவரும் பிரிக்க முடியாதபடி ஒருவருடன் ஒருவர் இரண்டறக் கலந்திருக்கிறார்கள். பிதாவை வெளிப்படுத்தி அவரைக் கனப்படுத்தும்படி குமாரன் பிதாவில் மறைந்திருக்கிறார் என்று நாம் சொல்லலாம். அதனால்தான் இயேசு கற்பித்த ஜெபம், “பரலோகத்திலிருக்கிற எங்கள் பிதாவே உம்முடைய நாமம் மகிமைப்படுவதாக” என்ற ஆரம்பிக்கிறது.

தன்னுடைய தெய்வீகத்தைக் குறித்த இயேசுவின் சாட்சியை ஆழ்ந்து சிந்திக்கும் எவரும் பரிசுத்த திரித்துவத்திற்கு அது ஆதாரமாயிருக்கிறது என்பதை உணர்ந்துகொள்வர். பரிசுத்த திரித்துவம் என்பது மூன்று தனித்தனி தெய்வங்கள் அல்ல, மூவரும் ஒன்றாயிருக்கும் பிரிக்க முடியாத ஒருமை. ஆகவே மிகுந்த மகிழ்ச்சியுடன் இறைவன் ஒருவரே என்பதற்கு நாங்கள் சாட்சிபகருகிறோம்.

இயேசு தனக்கும் பிதாவுக்கும் இருக்கின்ற பிரிக்க முடியாத ஒருமையைப் பற்றி மீண்டும் மீண்டும் சாட்சியிடுவதைப் பார்த்து அவரைக் கல்லெறிவதிலிருந்து பின்வாங்கினார்கள். ஆயினும் அவர்களை அவரைக் கைதுசெய்து ஆலோசனைச் சங்கத்திற்கு அழைத்துச் சென்று அவருடைய கருத்துக்களை ஆராய விரும்பினார்கள். இயேசு அவர்கள் நடுவிலிருந்து தப்பிச் சென்றார். பிதாவின் சித்தம் இறைவனுடைய மக்களைக் காக்கும்போது அவர்களை யாரும் தாக்க முடியாது. “அவர்களை ஒருவரும் என் பிதாவின் கரத்திலிருந்து பறிக்க முடியாது” என்று இயேசு சொன்னார்.

4. லாசருவை உயிர்ப்பித்தலும் அதன் விளைவுகளும் (யோவான் 10:40 – 11:54)

அ) யோர்தானுக்கு அக்கரையில் இயேசு (யோவான் 10:40 – 11:16)

---

யோவான் 10:40-42
40 யோர்தானுக்கு அக்கரையிலே முன்னே யோவான் ஞானஸ்நானங்கொடுத்துக்கொண்டிருந்த இடத்துக்குத் திரும்பிப்போய், அங்கே தங்கினார். 41 அநேகர் அவரிடத்தில் வந்து: யோவான் ஒரு அற்புதத்தையும் செய்யவில்லை; ஆகிலும் இவரைக்குறித்து யோவான் சொன்னதெல்லாம் மெய்யாயிருக்கிறது என்றார்கள். 42 அவ்விடத்திலே அநேகர் அவரிடத்தில் விசுவாசமுள்ளவர்களானார்கள்.

இயேசுவுக்கும் பரிசேயருக்கும் இடையிலான பிரச்சனை வெடித்தது. பெதஸ்தா குளத்தருகே அவர் வியாதியஸ்தனைச் சுகமாக்கியதிலிருந்து பரிசேயர் மக்களுடைய தலைவர்களைத் தூண்டிவிட்டார்கள் (அதிகாரம் 5). இயேசு மூன்றாம் முறை எருசலேமிற்குச் சென்றபோது, இந்தப் பிரச்சனை உச்ச கட்டத்தை அடைந்திருந்தது. ஒளி இருளில் பிரகாசிக்கிறது. இருளானது அதைப் பற்றிக்கொள்ளவில்லை. ஒவ்வொரு சந்தர்ப்பத்திலும் இயேசு மரணத்தைச் சந்திக்கக்கூடிய ஆபத்திருந்தது. அவருடைய எதிரிகள் அவர் மீது வெறுப்புடன் அலைந்துகொண்டிருந்தாலும், தன்னுடைய சீஷர்களை அறிவிலும் விசுவாசத்திலும் முதிர்வடையச் செய்யும்படி அவர் திரும்பத் திரும்ப தேவாலயத்திற்குள் சென்று வந்தார்.

பிரதிஷ்டைப் பண்டிகைக்குப் பிறகு இயேசு எருசலேமைவிட்டு யோர்தானுக்கு அப்புறம் போனார். அந்தப் பகுதி ஆலோசனைச் சங்கத்தின் கட்டுப்பாட்டிற்கு உட்பட்டதல்ல. இந்தப் பகுதியில்தான் முன்பு யோவான் ஸ்நானகன் பிரசங்கம் பண்ணினான். அது யூதர்களுடைய அதிகாரத்திற்கு வெளியே ஏரோதின் அதிகாரத்திற்கு உட்பட்டபகுதியாயிருந்தது. யோவான் ஸ்நானகனும், அவன் இயேசுவுக்குச் சாட்சி பகர்ந்ததும் இப்பகுதியில் நன்கு அறியப்பட்ட காரியங்களாயிருந்தது. ஸ்நானகன் நிதித்தமாக விசுவாசித்தவர்கள் தங்கள் விசுவாசத்தில் நிலைத்திருந்தார்கள். அவர்களுடைய போதகர் சிரச்சேதம் பண்ணப்பட்டிருந்தார். இயேசு அங்கு வந்தபோது அவருடைய தாழ்மையையும், மகத்துவத்தையும், வல்லமையையும் அறிந்து அவர்கள் இயேசுவிடம் வந்தார்கள். இயேசு அவர்களுக்கு அடையாளங்களையும் இறைவனையும் மனிதனையும் பற்றிய உண்மையுள்ள பிரசங்கத்தையும் வழங்கினார். அநேகர் தங்கள் இருதயங்களைத் திறந்து நற்செய்தியை ஏற்றுக்கொண்டார்கள். ஸ்நானகன் அற்புதங்களைச் செய்யாவிட்டாலும் தீர்க்கதரிசியாக தன்னுடைய பங்கை நிறைவேற்றினார் என்று அவர்கள விசுவாசித்தபடியால் அப்படிச் செய்தார்கள். இயேசு அவர்களிடம் வந்தபோது அவர்கள் உடனடியாக அவரே ஆண்டவர் என்றும் இரட்சகர் என்றும் ஏற்றுக்கொண்டார்கள்.

யோவான் 11:1-3
1 மரியாளும் அவள் சகோதரியாகிய மார்த்தாளும் இருந்த பெத்தானியா கிராமத்திலுள்ளவனாகிய லாசரு என்னும் ஒருவன் வியாதிப்பட்டிருந்தான். 2 கர்த்தருக்குப் பரிமளதைலம் பூசி, தன் தலைமயிரால் அவருடைய பாதங்களைத் துடைத்தவள் அந்த மரியாளே; அவளுடைய சகோதரனாகிய லாசரு வியாதியாயிருந்தான். 3 அப்பொழுது அவனுடைய சகோதரிகள்: ஆண்டவரே, நீர் சிநேகிக்கிறவன் வியாதியாயிருக்கிறான் என்று சொல்ல, அவரிடத்திற்கு ஆள் அனுப்பினார்கள்.

யோர்தான் பகுதியில் இயேசு பிரசங்கித்துக்கொண்டிருந்தபோது, லாசரு என்று பெயருடைய ஒரு மனிதன் வியாதிப்பட்டான். அவன் ஒலிவமலைப் பகுதியிலுள்ள ஒரு கிராமத்தைச் சேர்ந்தவன். இயேசு அவனுடைய வீட்டில் அடிக்கடி விருந்தாளியாக வந்து சென்றிருக்கிறார். லாசருவின் சகோதரியாகிய மார்த்தாளிடம் இயேசு பேசியது மிகவும் பிரபலமானது. அந்த விவரங்கள் மற்ற நற்செய்தி நூல்களில் இருப்பதால் யோவான் அவற்றை இங்கு குறிப்பிடவில்லை. ஆயினும் இயேசுவின் பாதங்களில் பரிமள தைலத்தை ஊற்றிய மரியாளைப் பற்றி யோவான் குறிப்பிடுகிறார். இந்தப் பெண் கர்த்தருடைய வார்த்தைக்கான ஆவலுடன் காத்திருந்தாள் என்று நற்செய்தியாளர் குறிப்பிடுகிறார். அவள் இயேசுவின் பாதங்களை தைலத்தினால் கழுவிய பிறகு தன்னுடைய தலைமயிரினால் துடைத்தாள் (யோவான் 12:1-8). அவள் இறைமகனிடமான தன்னுடைய தாழ்மை, விசுவாசம், அன்பு ஆகியவற்றைக் காண்பித்தாள்.

லாசரு வியாதிப்பட்டான் என்ற செய்தியைக் கேட்டு இயேசு துக்கமடைந்தார். ஆயினும் அவனுடைய சகோதரிகளின் விசுவாசம் அவரை அழைத்தது. இயேசு வேகமாக வந்து தங்கள் சகோதரனைச் சுகமாக்க வேண்டும் என்பதற்காக அல்ல, அவர் தூரத்திலிருந்தே அவனைச் சுகமாக்க முடியும் என்பதற்காக அவருக்கு அவனுடைய நிலையைக் குறித்துச் செய்தியனுப்பினார்கள். லாசருவை இயேசு நேசித்தபடியால் அவர் ஏதாவது செய்வார் என்ற அவர்கள் அறிந்திருந்தார்கள். “லாசரு” என்றால் “இறைவன் உதவியிருக்கிறார்” என்று பொருள். ஆகவே யோவான் நற்செய்தியில் எழுதப்பட்டுள்ள கடைசி அற்புதத்தின் நோக்கம் இந்தப் பெயரில் வெளிப்படுகிறது.

யோவான் 11:4-10
4 இயேசு அதைக் கேட்டபொழுது: இந்த வியாதி மரணத்துக்கு ஏதுவாயிராமல் தேவனுடைய மகிமை விளங்குவதற்கு ஏதுவாயிருக்கிறது; தேவனுடைய குமாரனும் அதினால் மகிமைப்படுவார் என்றார். 5 இயேசு மார்த்தாளிடத்திலும் அவளுடைய சகோதரியினிடத்திலும் லாசருவினிடத்திலும் அன்பாயிருந்தார். 6 அவன் வியாதியாயிருக்கிறதாக அவர் கேள்விப்பட்டபொழுது, தாம் இருந்த இடத்திலே பின்னும் இரண்டுநாள் தங்கினார். 7 அதன்பின்பு அவர் தம்முடைய சீஷரை நோக்கி: நாம் மறுபடியும் யூதேயாவுக்குப் போவோம் வாருங்கள் என்றார். 7 அதற்குச் சீஷர்கள்: ரபீ, இப்பொழுதுதான் யூதர் உம்மைக் கல்லெறியத் தேடினார்களே, மறுபடியும் நீர் அவ்விடத்திற்குப் போகலாமா என்றார்கள். 8 இயேசு பிரதியுத்தரமாக: பகலுக்குப் பன்னிரண்டு மணிநேரம் இல்லையா? ஒருவன் பகலிலே நடந்தால் அவன் இந்த உலகத்தின் வெளிச்சத்தைக் காண்கிறபடியினால் இடறமாட்டான். 10 ஒருவன் இரவிலே நடந்தால் தன்னிடத்தில் வெளிச்சம் இல்லாதபடியினால் இடறுவான் என்றார்.

இயேசுவுக்கு அந்த செய்தி எட்டியபோது, அவருக்கும் மரணத்தின் சக்திகளுக்கும் இடையிலுள்ள போராட்டத்தை அவர் உணர்ந்தார். அந்த வியாதிக்காரன் மரணத்திற்குப் பலியாகாமல், இறைவனுடைய நாமத்தின் நாமம் அவன் மூலமாக மகிமைப்படும் என்று அவர் முன்னறிவித்தார். தான் செய்யப்போவது என்ன என்பதை அவர் பரிசுத்த ஆவியின் மூலம் அறிந்திருந்தார். எருசலேம் நகரத்தின் வாசலுக்கு அருகில் அவர் ஒருவனை உயிரோடு எழுப்புவதன் மூலம் அவருடைய அதிகாரம் நன்கு விளங்கும். அப்போது எருசலேமிலிருப்பவர்கள் தங்கள் அவிசுவாசத்திற்கு எந்தக் காரணமும் கூறமுடியாது.

இறைவனுடைய மகிமையும் கிறிஸ்து மகிமைப்படுவதும் ஒன்றே. அவர் மரணத்தைச் சந்தித்து அதை மேற்கொண்டபடியால் அவருடைய மகிமை பெருகியது. மனுக்குலம் முழுவதுமே மரணத்தினால்தான் வேதனையடைகிறது. மரணம் நேரடியாக இல்லாமையினத்திற்கு மக்களை வழிநடத்துகிறது என்று அவர்கள் நினைக்கிறார்கள். இயேசு தம்முடைய பிதாவின் சித்தத்தை அறிந்திருந்தார். மரணத்தினாலோ அதன் விளைவுகளினாலோ அவர் கலங்கவில்லை. மரணத்தின் காரணத்தையும் அவர் அறிந்திருந்தார். அவர் மரணத்தின் பிடியில் உள்ள இவ்வுலகத்திற்கு வாழ்வளிப்பவர்.

இயேசு உடனடியாக பெத்தானியாவிற்குப் போகாமல், இரண்டு நாட்கள் காலதாமதம் செய்தார். மரணம் தன்னுடைய நண்பனை விழுங்க அவர் அனுமதித்தார். யூதேயாவில் அவரைக் கல்லெறிய மக்கள் முயற்சித்த காரணத்தினால், அவர் மறுபடியும் யூதேயாவுக்குச் செல்வோம் என்று சொன்னபோது அவருடைய சீஷர்கள் ஏமாற்றமடைந்தார்கள். அவர்கள் இறந்துபோன லாசருவுக்காக கவலைப்படவும் இல்லை, இறைவனுடைய மகிமையைக் காண விரும்பவும் இல்லை, தங்கள் உயிருக்காக மட்டும் பயந்தார்கள்.

இத்தருணத்தில் இயேசு ஒரு உதாரணத்தைப் பயன்படுத்தினார். ஒருவன் பகலில் பிரயாணம் செய்யும்போது பாதுகாப்பாக பயணிக்க முடியும். ஆனால் இரவுப் பயணத்தில் பல தடைகளும் பள்ளங்களும் பிரயாணத்தைக் கடினமாக்கும். சிலுவையின் நேரம் நெருங்கிவருதால், அவருடைய பகல்பொழுது இன்னும் முடிவடையவில்லை. அவர்கள் இறைவனுடைய கரத்தில் பாதுகாப்பாக, எருசலேமுக்குள் அமைதியாகச் செல்ல வேண்டும். இறைவனுடைய பராமரிப்பை நம்பாதவர்கள், இயேசுவின் எதிரிகளைப் போல இருளில் வாழ்கிறார்கள். ஏனெனில் விசுவாசத்தின் ஒளி அவர்களிடத்தில் உதிக்கவில்லை. ஆகவே, அவருடைய சீஷர்கள் அவருடைய தலைமையை முழுவதுமாக நம்ப வேண்டும் என்று இயேசு கேட்டுக்கொண்டார். இல்லையெனில் அவிசுவாசம் அவர்களை இருளுக்குள் கொண்டு செல்லும். கர்த்தருடைய சித்தமில்லாமல் நமக்கு எதுவும் நடக்காது என்பதுதான் இருள் நிறைந்த தருணத்தில் ஒரே ஆறுதல். நம்முடைய நம்பிக்கை அவரே.

நன்றி:

Water of life