யோவான் 21 விளக்கவுரை

யோவான் 21 விளக்கவுரை

5. இயேசு ஏரியினருகே காட்சி தருகின்றார் (யோவான் 21:1-25)

அ) அற்புதமாய் மீன்களைப் பிடித்தல் (யோவான் 21:1-14)

---

யோவான் 21:1-3
1 இவைகளுக்குப்பின்பு இயேசு திபேரியா கடற்கரையிலே மறுபடியும் சீஷருக்குத் தம்மை வெளிப்படுத்தினார்; வெளிப்படுத்தின விவரமாவது: 2 சீமோன்பேதுருவும், திதிமு என்னப்பட்ட தோமாவும், கலிலேயா நாட்டிலுள்ள கானா ஊரானாகிய நாத்தான்வேலும், செபெதேயுவின் குமாரரும், அவருடைய சீஷரில் வேறு இரண்டுபேரும் கூடியிருக்கும்போது,3 சீமோன்பேதுரு மற்றவர்களை நோக்கி: மீன்பிடிக்கப்போகிறேன் என்றான். அதற்கு அவர்கள்: நாங்களும் உம்முடனேகூட வருகிறோம் என்றார்கள். அவர்கள் புறப்பட்டுப்போய், உடனே படவேறினார்கள். அந்த இராத்திரியிலே அவர்கள் ஒன்றும் பிடிக்கவில்லை.

இயேசு உயிர்த்தெழுந்த பின்பு, திபேரியா ஏரியின் அருகே இருக்கும் தனது சொந்த ஊர் இருக்கும் கலிலேயா மாவட்டத்திற்கு தமது சீஷர்கள் செல்லும் போது அவர்களுடன் இணைந்து சென்றார். நல்ல மேய்ப்பனாக அவர்கள் முன் சென்று, அங்கே அவர்களை சந்தித்தார். அவர்கள் எருசலேமில் இருந்த போது அவர்களது பயங்களை போக்கினார். அவர்கள் மீது வைத்த அன்பின் நிமித்தம் மீண்டும் அவர்களை விரைவில் சந்தித்தார். பஸ்காவிற்கு பின்பு ஞாயிறு மாலையில் அவர் தெய்வீக சமாதானத்துடன் அவர்களை வாழ்த்தினார். அவர்களை உலகத்தை நற்செய்திமயமாக்கும்படி அனுப்பினார்.(மாற்கு:16:7, மத்தேயு:28:10)

மனுஷர்களை பிடிக்கிறவர்களாக்குவேன் என்ற அவரது கட்டளைக்கு சீஷர்கள் கீழ்படிந்து நடந்தார்களா? உயிர்த்தெழுதலின் அற்புதம் அவர்களது சிந்தனையை மாற்றி அமைத்ததா? நித்திய வாழ்வின் செய்தியோடு உலகத்தை நற்செய்திமயமாக்க அவர்கள் விரைந்து செயல்பட்டார்களா? துக்ககரமான விஷயம், இல்லையென்பதே. அவர்கள் தங்கள் பழைய பணிகளுக்குத் திரும்பினார்கள், குழுக்களாக பிரிந்தார்கள், சிலர் தனித்திருந்தார்கள், சிலர் மீனவர்களுடன் இணைந்து கொண்டார்கள்.

ஒரு நாள் மாலை பேதுரு தனது நண்பர்களிடம் கூறினார். “நான் மீன்பிடிக்கப் போகிறேன்”. அவனைப் பின்பற்றி இச் செயலைச் செய்ய வேண்டுமா? வேண்டாமா? என்று தீர்மானிக்க விட்டுவிட்டார். அவர்கள் கரையில் அவனுடன் இணைந்து கொண்டார்கள். படவில் ஏறி ஏரியின் மத்தியப்பகுதிக்கு சென்றார்கள். அவர்கள் தங்கள் வலைகளை அநேக முறை வீசினார்கள். இரவு முழுவதும் பிரயாசப்பட்டு சோர்ந்து போனார்கள். ஆனால் ஒன்றும் பிடிக்கவில்லை. அவர்கள் இயேசு கூறியதை மறந்து விட்டார்கள். “என்னாலேயல்லாமல் உங்களால் ஒன்றும் செய்யக்கூடாது”.

யோவான் 21:4-6
4 விடியற்காலமானபோது, இயேசு கரையிலே நின்றார்; அவரை இயேசு என்று சீஷர்கள் அறியாதிருந்தார்கள்.5 இயேசு அவர்களை நோக்கி: பிள்ளைகளே, புசிக்கிறதற்கு ஏதாகிலும் உங்களிடத்தில் உண்டா என்றார். அதற்கு அவர்கள்: ஒன்றுமில்லை என்றார்கள்.6 அப்பொழுது அவர்: நீங்கள் படவுக்கு வலதுபுறமாக வலையைப் போடுங்கள், அப்பொழுது உங்களுக்கு அகப்படும் என்றார். அப்படியே அவர்கள் போட்டு, திரளான மீன்கள் அகப்பட்டதினால், அதை இழுக்கமாட்டாதிருந்தார்கள்.

அவர்கள் இவ்விதமாய் வழிவிலகி அலைந்து கொண்டிருந்த இச் செயலுக்காக இயேசு அவர்களுடைய சீஷர்களை கடிந்து கொள்ளவில்லை. அவர்கள் திரும்பி வரும் வரை அவர் கடற்கரையில் காத்து நின்றார். அவர்களுடைய வலைகளில் அவரால் மீன்களை சிக்க வைத்திருக்க முடியும். ஆனால் அவர்களுக்கு கற்றுக்கொடுக்கும்படி அவர் விரும்பினார். இயேசுவினுடைய உயிர்ததெழுதலுக்குப் பின்பு அவர்கள் உணர்ச்சி வேகத்தில் செயல்படக் கூடாது என்றும் தங்கள் பழைய பணிகளுக்குத் திரும்பக் கூடாது என்றும் அவர்களுக்கு கற்றுக்கொடுக்க விரும்பினார். ஆனால் தங்கள் கவலைகளில், அனுதின வாழ்வின் பிரச்சினைகளில் அவர்கள் அவரை மறந்துவிட்டார்கள். அவர்கள் இல்லாததைப் போலவும் தூரத்தில் இருப்பதைப் போலவும் எண்ணி நடந்துகொண்டார்கள்.

அவர் தம்முடைய சீடர்களை அப்போஸ்தலர்கள் என்று அழைக்கவில்லை. ஆனால் பிள்ளைகளே என்று அழைத்தார். அவர் என்ன சொல்லியிருந்தார் என்பதை அவர்கள் மறந்து விட்டார்கள் மேலும் தங்கள் வாழ்வில் அதை நடைமுறைப்படுத்தவில்லை. இந்த வேதனை தரும் செயலை அவர்கள் செய்தாலும் இயேசு அவர்களை கண்டிப்பதற்குப் பதிலாக தாழ்மையுடன் அணுகினார். அவர்களிடம் சாப்பிட ஏதாகிலும் உண்டா? எனக் கேட்டார். தாங்கள் ஒன்றும் பிடிக்கவில்லை என்பதை அவர்கள் அறிக்கையிட வேண்டும். ஏனெனில் இறைவன் அவர்களுடன் இருக்கவில்லை. குறுகிய நேரத்தில் அவர்கள் தங்கள் தவறை ஒத்துக்கொண்டார்கள்.

அந்த காலை நேரத்தில் இயேசு அவர்களிடம் வந்தார். அவர்களிடம் ஒரு புதிய நம்பிக்கை உதிக்க ஆரம்பித்தது, “நீங்கள் தோற்றுப்போனதற்காக வருத்தப்பட வேண்டாம்”. அல்லது “மறுபடியும் முயற்சி செய்யுங்கள், நீங்கள் வெற்றி பெறுவீர்கள்” என்று அவர் சொல்லவில்லை. அவர் ஒரு ராஜரீக கட்டளையிட்டார். “படவின் வலது புறத்திலே உங்கள் வலைகளைப் போடுங்கள், நீங்கள் அதிக மீன்களைப் பிடிப்பீர்கள்”. என்று சொன்னார். அவர்கள் கரையை விட்டு வெகு தூரத்தில் இருக்கவில்லை. கரை அருகில் இருந்ததால் அங்கே பெரிய மீன்கள் கிடைப்பது அரிது. இருப்பினும் அவர்கள் இயேசு சொன்னதைக் கேட்டு வலையை வலதுபுறத்தில் போட்டார்கள்.

இயேசு தண்ணீரில் இருக்கும் மீனைக் கண்டார். அது போல இன்றும் அவருக்காக ஏங்குபவர்களை அவர் காண்கிறார். இன்றும் இயேசு அவ்விதமாக நம்மை அனுப்புகிறார். “உங்கள் வலைகளில் ஒவ்வொருவரையும் பிடியுங்கள்” என்று அவர் சொல்லுகிறதில்லை. “நான் சொல்லுகிற இடத்தில் உங்கள் நற்செய்தி வலையைப் போடுங்கள்” என்று அவர் சொல்கிறார். நீங்கள் என் வார்த்தைகள் நிறைவேறுவதைக் காண்பீர்கள்.

இயேசு சொன்ன இந்த வித்தியாசமான கட்டளைக்கு சீடர்கள் கீழ்ப்படிந்தார்கள். இருப்பினும் சாதாரண மனிதனாக காணப்பட்ட இயேசுவை அவர்கள் அடையாளம் கண்டு கொள்ளவில்லை. அவர் சாதாரணமாக உபயோகப்படுத்தும் வாழ்த்துதலை அவர்களுக்கு கூறினார். அவர்கள் அதில் நம்பிக்கை கொண்டார்கள். எனவே அவர்கள் சோர்ந்திருந்தாலும் தைரியம் பெற்றுக்கொண்டு தங்கள் வலைகளை வீசினார்கள். இப்போது அங்கு வலைகள் நிறைந்து விட்டது. அவர் எங்கு அனுப்புகிறாரோ அங்கு சென்று வலைகளை வீசும்போது, வலைகள் மீன்களால் நிறைகிறது. அவர்களால் அதை இழுக்க முடியவில்லை. உதவிக்காக அவர்கள் தங்கள் கூட்டாளிகளை அழைக்க வேண்டியதாய் இருந்தது.

அ) அற்புதமாய் மீன்களைப் பிடித்தல் (யோவான் 21:1-14)

---

யோவான் 21:7-8
7 ஆதலால் இயேசுவுக்கு அன்பாயிருந்த சீஷன் பேதுருவைப் பார்த்து: அவர் கர்த்தர் என்றான். அவர் கர்த்தர் என்று சீமோன்பேதுரு கேட்டவுடனே, தான் வஸ்திரமில்லாதவனாயிருந்தபடியினால், தன் மேற்சட்டையைக் கட்டிக்கொண்டு கடலிலே குதித்தான்.8 மற்றச் சீஷர்கள் கரைக்கு ஏறக்குறைய இருநூறுமுழத் தூரத்தில் இருந்தபடியினால் படவிலிருந்துகொண்டே மீன்களுள்ள வலையை இழுத்துக்கொண்டு வந்தார்கள்.

மிகுதியான மீன்களைப் பிடித்த நிகழ்வு தற்செயலான ஒன்று அல்ல என்பதை நற்செய்தியாளர் உணர்ந்தார். அவர் படவில் இருந்தார். கரையில் நிற்பவர் இயேசுவைத் தவிர வேறு யாருமில்லை என்பதை அவர் உணர்ந்துகொண்டார். யோவான் இயேசுவின் பெயரை உச்சரிக்கவில்லை. ஆனால் மரியாதையுடன் “அவன் கர்த்தர்” என்றான். மீன் பிடிப்பதின் மூலமாக இரண்டாவது முக்கிய பாடத்தை கிறிஸ்து கற்றுக்கொடுக்கிறார் என்பதை பேதுரு நினைத்துப் பார்த்தான். அவன் அரை நிர்வாணமாய் இருந்தபடியால் தனது ஆடைகளை எடுத்துப்போட்டுக் கொண்டு கர்த்தரிடம் வந்தான். அவன் தண்ணீருக்குள் குதித்து. நீந்தி கர்த்தரிடம் வந்து சேர்ந்தான். இப்போது அவன் படகு, நண்பர்கள், புதிதாக பிடிக்கப்பட்ட மீன்கள் அனைத்தையும் விட்டுவிட்டு வந்தான். அவன் எல்லாவற்றையும் மறந்துவிட்டான். ஏனெனில் அவனது இதயம் இயேசுவைப் பற்றிக் கொண்டது. யோவானின் அன்பு உண்மையானது தான் என்றாலும், அவன் படகிலேயே இருந்தார். இப்போது இந்த வாலிபன் தனது கூட்டாளிகளுடன் துடுப்பு போட்டு 100 மீட்டர் தொலைவில் இருக்கும் கரையை வந்து சேர்ந்தான். மிகப்பெரிய அளவில் மீன்களைப் பிடித்தபிற்பாடு அவர்கள் அனைவரும் கரையை அடைந்தார்கள்.

யோவான் 21:9-11
9 அவர்கள் கரையிலே வந்திறங்கினபோது, கரிநெருப்புப் போட்டிருக்கிறதையும், அதின்மேல் மீன் வைத்திருக்கிறதையும், அப்பத்தையும் கண்டார்கள்.10 இயேசு அவர்களை நோக்கி: நீங்கள் இப்பொழுது பிடித்த மீன்களில் சிலவற்றைக் கொண்டுவாருங்கள் என்றார்.11 சீமோன்பேதுரு படவில் ஏறி, நூற்றைம்பத்துமூன்று பெரிய மீன்களால் நிறைந்த வலையைக் கரையில் இழுத்தான்; இத்தனை மீன்கள் இருந்தும் வலை கிழியவில்லை.

சீஷர்கள் கரையை அடைந்த போது கரிநெருப்பு போட்டிருக்கிறதையும். அதின் மேல் மீன் வைத்திருக்கிறதையும் கண்டார்கள். இந்த அக்கினி, மீன், அப்பம் எல்லாம் எங்கிருந்து வந்தது? அவர்கள் தொலைவுக்கு அப்பால் இருந்தார்கள். அவர்களுக்கு சாப்பிட ஒன்றும் இல்லாதிருந்தது. இப்போது அவர்கள் வந்த போது மீன் பொரிக்கப்பட்டிருந்தது. அவர்களை சாப்பிடும்படி துரிதப்படுத்தினார். அவர் கர்த்தர், அதே சமயத்தில் விருந்து அளிப்பவராகவும் இருக்கிறார். தயார் செய்த உணவில் பரிவுடன் அவர்களுக்குரிய பங்கை கொடுத்தார். அவரது பணியிலும், ஆக்கத்திலும் நாம் பங்கு பெற நம்மை அனுமதிக்கிறார். அவருடைய ஆலோசனையை அவர்கள் கேட்டு, அதிக மீன்களைப் பிடிக்கவில்லையா? ஆனால் இங்கு அவர் சாப்பிடும்படி அவர்களை அழைக்கிறார். கர்த்தருக்கு இந்த உலக உணவு தேவையில்லை. ஆனால் ஆச்சரியப்படத்தக்க விதமாய் தமது அன்பை அவர்கள் உணரும்படி அவர்கள் நிலைக்கு இறங்கி, அவர்களுடன் அந்த உணவை பகிர்ந்துகொண்டார்.

அக்கால பாரம்பரியத்தின்படி 153 மீன்கள் என்ற எண்ணிக்கை, அப்போது இருந்த மொத்த மீன்களின் வகைகளை குறிப்பிடுகிறது. அது உண்மையென்றால் இயேசு இவ்விதம் கூறுகிறார், “ஒரே வகை மக்களை நீங்கள் பிடிக்க வேண்டாம், ஆனால் எல்லா தேசங்களின் மக்களையும் என்னிடம் கொண்டு வாருங்கள்”, எல்லோரும் இறைவன் தரும் வாழ்விற்குள் பிரவேசிக்க அழைக்கப்படுகிறார்கள். மீன்களின் மிகுதியால் வலைகள் கிழிந்து போகவில்லை, அதுபோல மக்களின் மிகுதியால் சபையும், அதனுள் இருக்கும் மக்களில் சிலர் சுயநலத்தோடு, அன்புக்குறைவோடு இருந்தாலும் உடைந்து போவதில்லை. பரிசுத்த ஆவியானவரின் ஐக்கியத்தை இழந்து போவதில்லை. உண்மையான சபை அவருக்கு சொந்தமானதாக, மேலானதாக இருக்கும்.

யோவான் 21:12-14
12 இயேசு அவர்களை நோக்கி: வாருங்கள், போஜனம்பண்ணுங்கள் என்றார். அவரைக் கர்த்தரென்று சீஷர்கள் அறிந்தபடியினால் அவர்களில் ஒருவனும்: நீர் யார் என்று கேட்கத் துணியவில்லை.13 அப்பொழுது இயேசு வந்து, அப்பத்தையும் மீனையும் எடுத்து, அவர்களுக்குக் கொடுத்தார்.14 இயேசு மரித்தோரிலிருந்தெழுந்த பின்பு தம்முடைய சீஷருக்கு அருளின தரிசனங்களில் இது மூன்றாவது தரிசனம்.

இயேசு தமது அன்பு என்னும் நெருப்பு வளையத்திற்குள் தமது சீஷர்களை கொண்டு வந்தார். யாருக்கும் அவரிடம் பேச துணிச்சல் இல்லை. இந்த அந்நியர் கர்த்தர் என்பதை அனைவரும் அறிந்திருந்தார்கள். அவரை அணைத்துக்கொள்ள அவர்கள் விரும்பினார்கள். ஆனால் பயமும், நடுக்கமும் அவர்களை தடுத்தது, இயேசு அந்த அமைதியை கலைத்து, அந்த உணவை ஆசீர்வதித்து அவர்களுக்குப் பரிமாறினார். அங்கே அவர்களை மன்னித்தார். அவர்களை புதுப்பித்தார். எல்லா சீஷர்களும் தொடர்ந்து அவர்களுடைய கர்த்தர் தரும் மன்னிப்பை பெற்றுக் கொள்கிறார்கள். அவர்கள் அந்த உடன்படிக்கைக்கு உண்மையற்று நடக்கும் போது அழிந்து போவார்கள். இப்போது அவர்கள் மெதுவாக நம்ப ஆரம்பிக்கிறார்கள். அவர் அவர்களை கடிந்துகொள்ளவில்லை, தனது அதிசயமான பராமரிப்பின் மூலம் அவர்களை அவர் பெலப்படுத்தினார். உங்கள் பாவங்கள், மந்தமான இருதயம் இவைகள் மத்தியிலும் நீங்கள் தொடர்ந்து இயேசு மற்றும் இறைவனைப் பற்றிய நற்செய்தியை பகிர்ந்து கொள்ள வேண்டும். உயிர்த்தெழுந்த பின்பு இயேசு நிகழ்த்திய அற்புதங்களின் வழிமுறை இப்படியாய் இருந்தது.

ஆ)மந்தையை மேய்க்கின்ற பணியில் பேதுரு உறுதிபடுத்தப்படுகிறார். (யோவான் 21:15-19)

---

யோவான் 21:15
15 அவர்கள் போஜனம்பண்ணினபின்பு, இயேசு சீமோன்பேதுருவை நோக்கி: யோனாவின் குமாரனாகிய சீமோனே, இவர்களிலும் அதிகமாய் நீ என்னிடத்தில் அன்பாயிருக்கிறாயா என்றார். அதற்கு அவன்: ஆம் ஆண்டவரே, உம்மை நேசிக்கிறேன் என்பதை நீர் அறிவீர் என்றான். அவர்: என் ஆட்டுக்குட்டிகளை மேய்ப்பாயாக என்றார்.

பேதுருவின் மறுதலிப்பை இயேசு மன்னித்தது போல, இப்போது சீஷர்களின் பாவங்களையும் தமது சமாதானத்தின் வார்த்தையினால் மன்னித்தார். ஆனால் பேதுருவின் மறுதலிப்பிற்கு சிறப்பான சிகிச்சை தேவைப்பட்டது. இருதயங்களை ஆராய்ந்து பார்க்கிற கர்த்தரின் வார்த்தைகளில் அவரது இரக்கம் தோன்றியது. சுய பரிசோதனை செய்யவோ அல்லது தன்னை உணர்ந்து கொள்ளவோ அவர் பேதுருவிடம் மறுதலிப்பு பற்றி ஒரு வார்த்தையும் பேசவில்லை. அவர் பேதுருவை அவனது உண்மையான பெயரைக் கொண்டு அழைத்தார். யோனாவின் குமாரனாகிய சீமோனே தன்னுடைய பழைய வழிகளுக்கு திரும்பினதால் இப்படி அழைத்தார்.

அதைப் போல இயேசு இன்று உன்னிடம் கேட்கிறார், “நீ என்னை நேசிக்கிறாயா?” என் வார்த்தையின்படி நடந்து, என் வாக்குத்தத்தஙகளை விசுவாசிக்கிறாயா? எனது பிரசன்னத்தை உணர்ந்து, என் அருகில் வருகிறாயா? எனது நிலைக்கு நீங்கள் வந்து இணைகின்றீர்களா? உங்களது சொத்து, நேரம் பெலன் அனைத்தையும் எனக்காக விட்டுக் கொடுக்கிறீர்களா? உங்கள் சிந்தனைகள் எப்போதும் என்னைப் பற்றியதாக உள்ளதா? நீங்கள் என்னுடன் ஒன்றாகி விட்டீர்களா? உங்கள் வாழ்வின் மூலம் நீங்கள் என்னை கனப்படுத்துகிறீர்களா?

இயேசு பேதுருவிடம் கேட்டார், “இவர்களிலும் அதிகமாய் நீ என்னை நேசிக்கிறாயா” பேதுரு இவ்விதம் பதிலளிக்கவில்லை. “இல்லை, கர்த்தாவே, நான் மற்றவர்களை விட சிறந்தவன் அல்ல, நான் உம்மை மறுதலித்திருக்கிறேன்”. பேதுரு இப்போதும் சுய நம்பிக்கûயுள்ளவராக காணப்பட்டான். ஆம் என்று பதிலளித்தான். ஆனால் அது குறைவான அன்பு என்பதை வெளிப்படுத்தும் கிரேக்கபதம் இங்கு பயன்படுத்தப்பட்டுள்ளது. பரிசுத்த ஆவியானவர் கொண்டுவரும் தெய்வீக அன்பு மற்றும் உறுதியான விசுவாசம் அல்ல அது.

தன்னுடைய பெலவீனமான அன்பிற்காக பேதுரு கடிந்து கொள்ளப்படவில்லை. ஆனாலும் தன்னைப் பின்பற்றுபவர்களை கரிசனையுடன் கவனிப்பதின் மூலம் அந்த அன்பை உறுதிப்படுத்தும்படி தொடர்ந்து கர்த்தர் அவனை வழி நடத்தினார். இந்த தடுமாற்றமடைகின்ற சீஷனிடம் மறுபடியும் தன்னுடைய ஆட்டுக்குட்டிகளை விசுவாசத்தில் நடத்தும்படி கட்டளை கொடுக்கிறார். ஆட்டுக்குட்டியானவர் ஆடுகளை தனக்கு சொந்தமாக வாங்கியிருக்கிறார். அப்படிப்பட்ட மந்தைக்கு சேவை புரிய நீ ஆயத்தமா? அவர்களை பொறுத்துக்கொண்டு, பொறுமையுடன் வழிநடத்த, முதிர்ச்சிக்காக காத்திருக்க ஆயத்தமா? அல்லது அவர்கள் நிலைக்கு அதிகமாக நீங்கள் அவர்களிடம் எதிர் பார்க்கிறீர்களா? அல்லது மந்தையை விட்டு அவர்கள் வெளியேறும்படி, பீறிப்போடப்படும்படி விட்டுவிடுகிறீர்களா? இயேசு பேதுருவிடம் இவ்விதம் கேட்டுக்கொண்டார். “என் ஆட்டுக்குட்டிகளை மேய்ப்பாயாக”.

யோவான் 21:16
16 இரண்டாந்தரம் அவர் அவனை நோக்கி: யோனாவின் குமாரனாகிய சீமோனே, நீ என்னிடத்தில் அன்பாயிருக்கிறாயா என்றார். அதற்கு அவன்: ஆம் ஆண்டவரே, உம்மை நேசிக்கிறேன் என்பதை நீர் அறிவீர் என்றான். அவர்: என் ஆடுகளை மேய்ப்பாயாக என்றார்.

இயேசு இவ்விதமாக பேதுருவிடம் பேசி அவனை அப்படியே விட்டுவிடவில்லை. “நீ எனக்கு பதிலளிக்கும் போது அவசரப்பட்டு சொல்லவில்லையா? நான் உம்மை நேசிக்கிறேன் என்று நீ சொல்வது மனித அன்பு மற்றும் குறைவுள்ள அன்பு அல்லவா? உனது அன்பு உணர்ச்சி சார்ந்து உள்ளதே. அல்லது உனது நேர்மையான நல் விருப்பத்தின் அடிப்படையில் வருகிற அன்பாக உள்ளதே.

இயேசுவின் கேள்வி பேதுருவின் இதயத்தை அசைத்தது. அவன் தாழ்மையுடன் பதிலளித்தான். “ஆண்டவரே, நீர் எல்லாவற்றையும் அறிந்திருக்கிறீர், எனது குறைவுகள், திறமைகள் உமக்குத் தெரியும். எனது அன்பு உம்மிடம் இருந்து மறைந்திருக்கவில்லை. நான் உண்மையாகவே உம்மை நேசிக்கிறேன். எனது வாழ்க்கையை உமக்காக கொடுக்க ஆயத்தமாக இருக்கிறேன். நான் தோற்றுப் போயிருக்கிறேன். மறுபடியும் தோற்றுப்போவேன். ஆனால் உமது அன்பு எனக்குள் முடிவற்ற அன்பைத் தூண்டிவிடும்.

இயேசு பேதுரு சொன்னதை மறுக்கவில்லை. நீ என்னை நேசிப்பது போல திருச்சபையின் முதிர்ந்த நபர்களை நேசி, அவர்களது போதகப் பணி என்பது எளிதானது அல்ல. அவர்களில் அநேகர் பிடிவாத குணமுடையோர், பின் வாங்கியவர்கள், தங்கள் சொந்த வழியில் செல்பவர்கள். உனது தோள்கள் மீது எனது ஆட்டை சோர்வுகள் மத்தியிலும் சுமக்க உனக்கு விருப்பமா?. நீ அவைகளுக்கு பொறுப்புள்ளவனாக இருக்கிறாய்.

யோவான் 21:17
17 மூன்றாந்தரம் அவர் அவனை நோக்கி: யோனாவின் குமாரனாகிய சீமோனே, நீ என்னை நேசிக்கிறாயா என்றார். என்னை நேசிக்கிறாயா என்று அவர் மூன்றாந்தரம் தன்னைக் கேட்டபடியினாலே, பேதுரு துக்கப்பட்டு: ஆண்டவரே, நீர் எல்லாவற்றையும் அறிந்திருக்கிறீர், நான் உம்மை நேசிக்கிறேன் என்பதையும் நீர் அறிவீர் என்றான். இயேசு: என் ஆடுகளை மேய்ப்பாயாக என்றார்.

பேதுரு தனது ஆண்டவரை மூன்று முறை மறுதலித்தான். எனவே இயேசு அவனது இருதயக் கதவை மூன்று முறை தட்டினார். இதன் மூலம் அவனது அன்பின் உண்மைத் தன்மையை சோதித்தார். பேதுரு தனக்குள் கண்டு கொள்ளும்வரை அவர் பரிசுத்த ஆவியானவரிடமிருந்து வரும் தெய்வீக அன்பின் தேவையை வலியுறுத்திக் கொண்டே இருந்தார். பெந்தேகொஸ்தே நாளில் பரிசுத்த ஆவியானவர் இறங்கி வரும் வரைக்கும் அவன் அதைப் பெற்றுக்கொள்ளவில்லை. அவர் தொடர்ந்து அவனிடம் பேசினார். “மற்ற எந்த மனித உறவுகளையும் விட நீ எனக்கு கட்டுப்பட்டு இருக்கிறாயா? உலகத்தின் இரட்சிப்பிற்காக உனது உயிரையும் கொடுக்கும் அளவிற்கு நீ ஆயத்தமா?” மூன்றாவது முறையாக துக்கம் மற்றும் வெட்கத்தோடு பேதுரு பதிலளித்தான். கர்த்தாவே நீர் என் இருதயத்தை அறிகிறீர் என்று சேர்த்து பதில் அளித்தான்.

தான் மறுதலிப்பதை இயேசு முன்பே சொன்னது சரியென்பதை பேதுரு அறிக்கை செய்தான். கிறிஸ்து அனைத்தையும் அறிந்துள்ளார். ஆகவே பேதுரு அவரை உண்மையான இறைவன் என்று அழைத்தார். மனிதனின் உள்ளான இருதயத்திற்குள் இருப்பதை அவர் அறிந்திருக்கிறார். பேதுருவுக்கு கொடுக்கப்பட்ட போதகப்பணி இதுதான். அவருடைய ஆடுகளை மேய்ப்பது.

நீங்கள் இறைவனின் மந்தையை கண்காணிக்கும் போதகரா? நீங்கள் மந்தையை அணுகும் ஒநாய்கள் மற்றும் தீய ஆவிகளை காண்கிறீர்களா? நாம் அனைவரும் பாவிகள் என்பதை நினைவில் வையுங்கள். இறைவனின் மக்களை மேய்ப்பதற்கு நாம் தகுதியற்றவர்கள். சிலுவையே நம்மை தகுதிப்படுத்துகிறது. சந்தேகமின்றி ஆடுகளை விட மேய்ப்பர்களுக்குத் தான் அதிக மன்னிப்பு தேவைப்படுகிறது. அடிக்கடி அவர்கள் தங்கள் பொறுப்புகளில் தவறுகிறார்கள்.

யோவான் 21:18-19
18 நீ இளயவதுள்ளவனாயிருந்தபோது உன்னை நீயே அரைகட்டிக்கொண்டு, உனக்கு இஷ்டமான இடங்களிலே நடந்து திரிந்தாய்; நீ முதிர்வயதுள்ளவனாகும்போது உன் கைகளை நீட்டுவாய்; வேறொருவன் உன் அரையைக் கட்டி, உனக்கு இஷ்டமில்லாத இடத்துக்கு உன்னைக் கொண்டுபோவான் என்று மெய்யாகவே மெய்யாகவே உனக்குச் சொல்லுகிறேன் என்றார்.19 இன்னவிதமான மரணத்தினாலே அவன் தேவனை மகிமைப்படுத்தப்போகிறானென்பதைக் குறிக்கும்படியாக இப்படிச் சொன்னார். அவர் இதைச் சொல்லியபின்பு, அவனை நோக்கி: என்னைப் பின்பற்றிவா என்றார்.

பேதுரு மற்றும் அவருடைய சீடர்களின் இதயம் வைராக்கியம் மற்றும் உணர்ச்சியினால் நிறைந்திருந்தது என்பதை இயேசு புரிந்து கொண்டார். முதலாவது கிறிஸ்துவின் மீது விசுவாசத்தைக் காண்பிக்கும் வாலிபர்களின் அனுபவத்தில் நாம் அடிக்கடி இப்படிப்பட்ட அக்கறையற்ற நிலையை காண்கிறோம். அவர்கள் பரிசுத்த ஆவியின் அனுபவத்தைப் பெற்ற போது, வெடித்துக் கிளம்பினார்கள், மற்றவர்களை இரட்சிக்க விரைந்தார்கள். அநேக சமயங்களில் அவர்கள் வெறும் மனித ஆர்வத்தை மட்டுமே வைத்து சேவை செய்கிறார்கள். இயேசுவின் வழி நடத்துதலின்படி செய்கிறதில்லை. அது நேர்மையானது, விண்ணப்பத்தால் நிறைந்தது, கூட்டுப்பணியாய் செயல்படுவது ஆகும்.

இருப்பினும் இயேசு பேதுருவைக் குறித்து தீர்க்கதரிசனம் உரைத்தார். அவன் சுய நம்பிக்கையை விட்டுவிடுவான். ஆவியில் முதிர்ச்சியடைவான். அவனுடைய ஆண்டவரிடம் சரணாகதி அடைவான். அன்புடன் செயல்படுவான். கிறிஸ்து விரும்புவதை மட்டுமே அவன் விரும்புவான்.

பேதுரு எருசலேமில் தங்கிவிட்டார். புறஜாதிகளிடம் அவர் செல்லவில்லை. அவர் அடிக்கப்பட்டார். பலமுறை சிறையில் தள்ளப்பட்டார். ஒரு முறை கர்த்தருடைய தூதனால் விடுவிக்கப்பட்டார். அவர் பரிசுத்த ஆவியினால் நடத்தப்பட்டு ரோம நூற்றுக்குஅதிபதி கொர்நேலியு வீட்டிற்கு சென்றார். அங்கு தான் அவர், சுத்தமற்ற மக்கள் என முன்பு கருதப்பட்ட மக்கள் மீதும் பரிசுத்த ஆவியானவர் இறங்குவதைப் பார்த்தார். நற்செய்தியின் இந்த படியில், அவர் உலகலாவிய அருட்பணிக்கு கதவை திறந்தார்.

ஏரோதுவின் சிறையிலிருந்து பேதுரு வெளியேறிய பின்பு, அவர் புதிதாக நிறுவப்பட்ட சபைகளுக்கு சென்றார். குறிப்பாக பவுல் சிறைச்சாலையில் தள்ளப்பட்ட போது இப்படிச் செய்தார். புற இனத்து மக்களில் இருந்த கிறிஸ்தவர்களான மக்களை முதன்மை அப்போஸ்தலர் சந்தித்து தகப்பனுக்குரிய செய்திகளைக் கூறி அவர்களை உற்சாகப்படுத்தினார். நீரோவின் துன்புறுத்தல் நிகழ்ந்த நேரம் ரோமில் பேதுருவின் மரணம் பற்றி பாரம்பரியம் கூறுகின்றது. ஆண்டவரைப் போல சிலுவையில் அறையப்படுவதற்கு நான் தகுதியற்றவன், தலைகீழாக என்னை சிலுவையில் அறையுங்கள் என்று பேதுரு அவர்களிடம் வேண்டிக்கொண்டான். இயேசு இதை முன்னுரைத்திருந்தார். பேதுரு இவ்விதமான மரணத்தினாலே தன்னை மகிமைப்படுத்துவான் என்று கூறினார். இதற்கு முன்பு பேதுரு இயேசுவிடம், ஆண்டவருக்காக தனது உயிரையும் கொடுக்க ஆயத்தம் என்று குறிப்பிட்டிருந்தார். இயேசு கூறினார். “நான் போகிற இடத்துக்கு இப்பொழுது நீ என் பின்னே வரக்கூடாது, பிற்பாடு என் பின்னே வருவாய்” (யோவான் 13:36) இயேசு தனது சொந்த வல்லமை மகிமை இவற்றோடு சீஷர்களை தன்னுடன் அடையாளப்படுத்திக் கொண்டார். அவருடன், பிதாவுடன், பரிசுத்த ஆவியானவருடன் இணைந்திருக்கும்படி செய்தார். அவர் தன்னுடைய பாடுகள், மரணத்தில் அவர்களை பங்காளிகளாக்கினார். இது மகிமையின் ஒரு முன்ருசி ஆகும். நற்செய்தியில் மகிமை என்பது புகழ்ச்சி, கனம் என்ற உலகப்பிரகாரமான அர்த்தத்தை கொடுக்கவில்லை. அது நம்மை நேசித்தவருக்காக பாடுபடுவது மற்றும் சிலுவை சுமப்பது ஆகும். பேதுரு தனது சொந்த முயற்சியால் இறைவனை மகிமைப்படுத்த முடியாது. ஆனால் கிறிஸ்துவின் இரத்தம் அவனை தூய்மைப்படுத்தியது. ஆவியானவரின் வல்லமை அவனை பரிசுத்தப்படுத்தியது. அவன் தன்னைத்தானே சுயமறுப்பு செய்யவும், ஆண்டவருக்காக வாழவும், மரித்து அவரை மகிமைப்படுத்தவும் ஆவியானவர் நடத்தினார்.

பிற்பாடு, கிறிஸ்து பேதுருவிற்கு இராணுவக் கட்டடையிட்டார் “என்னைப் பின்பற்றி வா” வாழ்விலும், மரணத்திலும் நாம் அவரை தொடர்ந்து பின்பற்ற வேண்டும். நாம் அன்பின் கனிகளை கொடுப்போம். இரக்கமுள்ள பிதாவின் நாமத்தை பரிசுத்தப்படுத்துவோம்.

) வருங்காலத்தைக் குறித்து இயேசு முன்னுரைக்கிறார் (யோவான் 21:20-23)

---

யோவான் 21:20-22
20 பேதுரு திரும்பிப்பார்த்து, இயேசுவுக்கு அன்பாயிருந்தவனும், இராப்போஜனம்பண்ணுகையில் அவர் மார்பிலே சாய்ந்து: ஆண்டவரே, உம்மைக் காட்டிக்கொடுக்கிறவன் யார் என்று கேட்டவனுமாகிய சீஷன் பின்னே வருகிறதைக் கண்டான்.21 அவனைக் கண்டு, பேதுரு இயேசுவை நோக்கி: ஆண்டவரே, இவன் காரியம் என்ன என்றான்.22 அதற்கு இயேசு: நான் வருமளவும் இவனிருக்க எனக்குச் சித்தமானால், உனக்கென்ன, நீ என்னைப் பின்பற்றிவா என்றார்.

பேதுரு இயேசுவினுடைய ஆடுகளையும், ஆட்டுக்குட்டிகளையும் மேய்க்கும்படி அவனுடைய எஜமானனிடம் இருந்து அழைப்பு பெற்றபோது அதற்கு செவி கொடுத்தார். யோவான் சீடர்களில் வயது குறைந்தவராக இருந்தார். யோவானைக் குறித்த இயேசுவின் நிலையை அறிய பேதுரு ஆர்வமாய் இருந்தான். அவன் வயது குறைந்தவனாய் இருப்பதால், அவனை வீட்டிற்கு அனுப்பி விடுவாரா? அல்லது சண்டையில் அவனை அதிகாரியாக நியமிப்பாரா?

ஒருவேளை பேதுருவின் வார்த்தைகளில் பொறாமையின் சாயல் காணப்பட்டிருக்கலாம். ஏனெனில் மற்றவர்களை விட தான் அதிகம் நேசித்த யோவானுக்கு இயேசு முன்னுரிமை கொடுக்கலாம் என்று எண்ணினான். அந்த கடைசி இராப்போஜனத்தில் இறுக்கமான சூழ்நிலை மத்தியில் காட்டிக்கொடுப்பவன் யார் என்று விசாரிக்கும்படி பேதுரு யோவானுக்கு சைகை காட்டினான்.

இயேசுவுக்கு மிகவும் நெருக்கமானவனாக யோவான் இருந்தான். எனவே சிலுவையின் அருகே, கிறிஸ்துவின் எதிரிகள் மத்தியில் தனது உயிரை பணயம் வைத்து நின்று கொண்டிருந்தான். ஆண்டவர் உயர்த்தெழுந்தார் என்பதை முதலில் விசுவாசித்தவன் அவன். மீன்களை பிடித்துக்கொண்டிருந்த சமயம் ஆண்டவரை முதலில் அடையாளம் கண்டு கொண்டவன் அவன். பேதுருவை இயேசு அழைக்கும் முன்பாகவே அவன் இயேசுவை பின்பற்றி நடந்து வந்தான். அவனது இருதயம் கிறிஸ்துவிடம் இணைக்கப்பட்டிருந்தது. சீஷர்கள் மத்தியில் ஆண்டவருக்கு மிகவும் நெருக்கமானவனாக அவன் இருந்தான். மேலும் பேதுரு இயேசுவிடம் கேட்டான். இதே விதமான கடினமான மரணத்தை அவனும் சந்திப்பானா என்று அவனைக் குறித்து முன்னுரைக்கும்படி கேட்டான். அல்லது தனக்கு மாத்திரம் அப்படிப்பட்ட மரணமா? என்பதை வினவினான். இயேசு முதன்மை அப்போஸ்தலனுக்கு இவ்விதம் பதிலளித்தார். மற்ற அனைவரையும் ஆளுகை செய்வது அல்ல, சகோதரனாக அவர்களுக்கு சமமாக இருக்க வேண்டும். கர்த்தருடன் நேரடியாக தொடர்பு கொண்டிருக்கும் யோவானின் முடிவைக் குறித்து கவலைப்படுவது பேதுருவின் வேலையல்ல. பேதுரு அப்போஸ்தலர்களின் செய்தியாளனாக இருந்தார். யோவான் அமைதியுடன் இருந்தான். ஜெபத்துடன் இருந்தான். திருச்சபையில் இறையியல் கோட்பாடுகளின் வளர்ச்சியில் பங்காற்றினான். விண்ணப்பத்தின் வல்லமையினால் தாக்கத்தை ஏற்படுத்தினான். (அப்போஸ்தலர் 3:1; 8:14; கலாத்தியர் 2:9)

யோவானைப் பற்றி இயேசு குறிப்பிட்ட வார்த்தைகளில் இருந்து நாம் ஒன்றை கற்றுக்கொள்கிறோம். நாம் கிறிஸ்துவின் பணியில் நீண்ட காலம் வாழுகிறோமா அல்லது அவருக்காக இந்த பூமியில் விரைவில் மரிக்கிறோமா என்பது முக்கியமல்ல. மிக முக்கியமானது நமது விசுவாசமும், அவருக்கு தொடர்ச்சியாக கீழ்ப்படிவதும் ஆகும். இயேசு அவரைப் பின்பற்றியவர்கள் அனைவரையும் ஒன்று போல் பாவிக்கவில்லை. ஒவ்வொருவரும் அவரது எஜமானரை மகிமைப்படுத்த சிறப்பான பாதையை ஆயத்தம்பண்ணுகிறார். யோவானின் மரணம் பற்றி நமக்கு எதுவும் தெரியவில்லை. ஒருவேளை இயற்கை மரணமாக அது இருக்கலாம்.

பேதுரு தன்னை மட்டும் பார்க்க வேண்டும் என்று இயேசு கூறினார். மற்றவர்களை அவன் பார்க்கக் கூடாது. இதற்காக நாம் மற்ற கிறிஸ்தவர்களை குறித்து அக்கறையற்றிருக்கக் கூடாது என்பது இதன் பொருள் அல்ல. நாம் நம்முடைய வாழ்க்கைக்கான இறைவனின் சித்தத்தை அறிய முற்படுகிறோம். எந்த நிபந்தனையுமின்றி அவரைப் பின்பற்றுகிறோம். ஒவ்வொரு கிறிஸ்தவனின் நோக்கமும் உண்மையாகப் பின்பற்றுவது ஆகும்.

மேலும் அவருடைய இரண்டாம் வருகையைக் குறித்து சீஷர்களுடன் இயேசு பேசினார். உலக வரலாற்றின் இலக்காக அந்த வருகை இருக்கிறது. இந்த எதிர்கால நிகழ்விற்கு நேராக எல்லா சீஷர்களின் சிந்தனைகளும் திசை திருப்பப்பட்டது. எல்லா சந்ததியினரது ஏக்கங்களும் நிறைவேறும். இறைவன் மக்கள் மத்தியில் பிரசன்னமாவார். இயேசு தமது மகிமையுடன் வருவார். நீங்கள் அவரை எதிர்பார்த்து இருக்கிறீர்களா? விண்ணப்பம், சேவை, புனிதப்பாடல்கள், மற்றம் பரிசுத்தப்படுத்தப்பட்ட உங்கள் சாட்சி இவைகளினால் நீங்கள் ஆயத்தமாய் உள்ளீர்களா? மற்றவர்களைப் பின்பற்றாமல் இயேசுவை விசுவாசத்துடன் பின்பற்றும் பெருந்திரளான விசுவாசிகளை அவரது பிரசன்னத்தில் நாம் காண்போம்.

யோவான் 21:23
23 ஆகையால் அந்தச் சீஷன் மரிப்பதில்லையென்கிற பேச்சு சகோதரருக்குள்ளே பரம்பிற்று. ஆனாலும், அவன் மரிப்பதில்லையென்று இயேசு சொல்லாமல், நான் வருமளவும் இவனிருக்க எனக்குச் சித்தமானால் உனக்கென்னவென்று சொன்னார்.

யோவான் வயது முதிர்ந்து மரிக்காமல் இருப்பான் என்ற கருத்து பரவியது. மேசியாவைக் குறித்த எதிர்பார்ப்புகள் நிறைந்த சபைகளுக்கு அவன் ஒரு அடையாளமாக மாறினான். கர்த்தர் வருமளவும் அவன் மரிப்பதில்லை என்ற நம்பிக்கை பரவியது. ஆண்டவரின் சீக்கிரமான வருகையை பவுலும் எதிர்பார்த்திருந்தார். அப்போது அவர் மரிக்காமல். நொடிப்பொழுதில் மறுரூபமாக்கப்பட்டு, பரலோகத்தினுள் எடுத்துக்கொள்ளப்படுவார் என்று எண்ணினார். யோவான் ஓர் உண்மைவாதி. இயேசு அவ்விதமாகக் குறிப்பிடவில்லை என்று எழுதுகிறார். வானங்கள் திறக்கும், மகிமையுள்ள கர்த்தர் தோன்றுவார். யோவானைக் குறித்த ஆண்டவனின் நோக்கங்கள், முடிவுகள் பேதுருவின் விருப்பங்களுக்கு உட்பட்டதல்ல. ஆண்டவர் தமது சீடர்களை வழிநடத்தும்படி ஒவ்வொருவருக்கும் குறிப்பிட்ட பாதையை வகுக்கிறார். அவர் மாத்திரமே நல்ல மேய்ப்பனாக இருக்கிறார்.

ஈ) யோவானின் சாட்சி மற்றும் அவனுடைய நற்செய்தி (யோவான் 21:24-25)

---

யோவான் 21:24
24 அந்தச் சீஷனே இவைகளைக் குறித்துச் சாட்சிகொடுத்து இவைகளை எழுதினவன்; அவனுடைய சாட்சி மெய்யென்று அறிந்திருக்கிறோம்.

இங்கு நாம் நான்கு முக்கிய சத்தியங்களை கண்டு கொள்கிறோம்.

தனது நற்செய்தி வெளியிடப்பட்ட போது, நற்செய்தியாளர் உயிருடன் இருந்தார். கிரேக்கம் பேசும் சபைகள் நடுவில் நன்கு அறியப்பட்டவராக இருந்தார். திருமுழுக்கு யோவானின் நாட்களில் இருந்து கிறிஸ்துவின் பரமேறுதல் வரை யோவான் இயேசுவின் சீடராக தொடர்ந்து இருந்து வந்தான்.

இயேசு கிறிஸ்துவிற்கு கண் கண்ட சாட்சியாக யோவான் இருந்தான். அவன் இயேசுவின் வார்த்தைகளைக் கேட்டு. அவைகளை பதிவு செய்துள்ளான். மேலும் அவரது அடையாளங்களையும் பதிவு செய்துள்ளான். திருச்சபைகளின் ஒரு உறுப்பினர் இந்த நற்செய்தியை எழுதவில்லை. ஆனால் இயேசுவுக்கு அன்பாயிருந்த சீஷன் யோவான் இதை எழுதியுள்ளார்.

அவன் கிரேக்க புலமை வாய்ந்தவன் அல்ல, ஆகவே தன்னைப் பின்பற்றுபவர்களில் மொழியியலில் திறமை வாய்ந்த ஒருவனிடம் தனது சிந்தனை ஓட்டங்களைப் பகிர்ந்து கொண்டான். அர்த்தங்கள் இன்னும் தெளிவாகின, சத்தியங்கள் மாற்றப்படவில்லை. அந்த நற்செய்தியை சுற்றறிக்கையாக அனுப்பியவர்கள் யோவானின் சாட்சி முற்றிலும் நம்பத்தக்கது என்று ஒரே குரலில் ஏற்றுக்கொண்டார்கள். இந்த ஏற்றுக்கொள்ளப்படுதல் தேவையாய் இருந்தது. ஏனெனில் யோவானின் நற்செய்தி அதன் உள்ளடக்கத்தில் மற்ற மூன்று நற்செய்திகளில் இருந்து வேறுபட்டதாக இருந்தது. இந்த ஒப்பற்ற நற்செய்தி அன்பாயிருந்த சீஷன் மூலம் நமக்கு கிடைத்துள்ளதால் நாம் மகிழ்ச்சி அடைகிறோம். இது நமக்குக் கிடைத்துள்ள பொக்கிஷங்களில் ஒன்றாகும்.

இந்த நற்செய்தியை வெளியிட்டவர்கள் ஒரே கருத்துடன் கிறிஸ்துவின் மெய்தன்மையை தங்கள் வாழ்வுகளில் வெளிப்படுத்தினார்கள். அவருடைய நாமத்தின் மேல் விசுவாசம் உள்ளவர்களாய் அவரை ஏற்றுக் கொண்டவர்கள் இறைவனுடைய பிள்ளைகளாகும்படியான அதிகாரத்தை பெற்றார்கள். தீய ஆவிகளைப் பகுத்தறியும் படியாக பரிசுத்த ஆவியானவர் அவர்கள் மீது இறங்கினார், அவர்களில் வாழ்ந்தார், அவர்களைப் பெலப்படுத்தினார். அவர்கள் பொய்கள், மிகைப்படுத்தல்கள் இவற்றிலிருந்து உண்மையை வேறுபிரித்து அறிந்திருந்தார்கள். எல்லா சத்தியத்திற்குள்ளும் வழிநடத்தும்படி தேற்றரவாளனை அவர்கள் பெற்றிருந்தார்கள்.

யோவான் 21:25
25 இயேசு செய்த வேறு அநேக காரியங்களுமுண்டு; அவைகளை ஒவ்வொன்றாக எழுதினால் எழுதப்படும் புஸ்தகங்கள் உலகம் கொள்ளாதென்று எண்ணுகிறேன். ஆமென்.'

நான்கு நற்செய்திகள் இருப்பதை சிலர் தடைகளாக பார்க்கிறார்கள். பவுலின் கடிதங்கள் இன்னொரு நற்செய்தி என்று அவர் கூறுவது போல நாம் இணைத்துக்கொண்டால். ஐந்து நற்செய்தி நூல்கள் என்றாகி விடுகிறது. ஒரு மெய் கிறிஸ்தவனின் வாழ்க்கை தன்னில்தானே ஒரு நற்செய்தியாக இருக்கிறது. சீஷர்களிடமிருந்து இயேசுவின் கூற்றுகள் மற்றும் செயல்களை கேட்டதாக நற்செய்தியாளர் யோவான் அறிக்கையிடுகிறார். இறைவனின் முழுமை அவருக்குள் வாசமாய் இருந்தது. இன்றும் அவர் தன்னுடைய திருச்சபையில் வாசம்பண்ணுகிறார். திருச்சபை அவருடைய அடிச்சுவடுகளில் நடக்கும்படி வழிநடத்துகிறார். இயேசு உயிர்த்தெழுந்தது முதல் இன்று வரை செய்யும் அனைத்து செயல்களையும் எழுத முற்பட்டால், எல்லா புத்தகங்களும் அந்த நோக்கங்களை நிறைவேற்ற போதுமானதாக இருக்காது. மனுக்குலத்தின் வரலாற்றில் செயல்படும் கிறிஸ்துவின் அன்பின் உயரம், அகலம், ஆழம் மற்றும் நீளத்தை புரிந்துகொள்ள கிறிஸ்தவர்களுக்கு நித்தியம் தேவை.

புதிய ஏற்பாட்டில் பதிவு செய்யப்பட்டுள்ள தம்முடைய வார்த்தைகள் மூலம் நமது உயிருள்ள ஆண்டவர் செயல்படுகிறார். நாம் பாக்கியவான்களாக எண்ணப்படுகிறோம். ஏனெனில் நாம் அவர் சத்தம் கேட்கிறோம், அவருடைய எண்ணங்களை கிரகித்துக் கொள்கிறோம், அவருடைய அழைப்பைக் கேட்டு பின்பற்றுகிறோம். எல்லோரும் அறிக்கையிடும்படி யோவான் ஆண்டவராகிய இயேசுகிறிஸ்துவின் அன்பை குறிப்பிடுகிறார். “நாங்கள் அவருடைய மகிமையைக் கண்டோம். அது பிதாவின் ஒரே பேறானவருடைய மகிமைக்கு ஏற்ற மகிமையாகவே இருக்கிறது. அவர் கிருபையினாலும், சத்தியத்தினாலும் நிறைந்தவராய் இருக்கிறார். அவருடைய பரிபூரணத்தினால் நாம் அனைவரும் கிருபையின் மேல் கிருபை பெற்றிருக்கிறோம்.

By

Wateroflife. org