யோவான் 15 விளக்கவுரை

யோவான் 15 விளக்கவுரை

ஈ - எருசலேமிற்குச் செல்லும் வழியில் பிரியாவிடை (யோவான் 15:1 - 16:33)

1. கிறிஸ்துவில் நிலைத்திருத்தல் அதிக கனிகளைக் தரும் (யோவான் 15:1–8)

---

யோவான் 15:1-2
1 நான் மெய்யான திராட்சச்செடி, என் பிதா திராட்சத்தோட்டக்காரர். 2 என்னில் கனிகொடாதிருக்கிற கொடி எதுவோ அதை அவர் அறுத்துப்போடுகிறார்; கனிகொடுக்கிற கொடி எதுவோ, அது அதிக கனிகளைக் கொடுக்கும்படி, அதைச் சுத்தம்பண்ணுகிறார்.

கர்த்தருடைய பந்தியை அனுசரித்தபிறகு, இயேசுவும் அவருடைய சீடர்களும் பரிசுத்த மலையாகிய எருசலேமைவிட்டு இறங்கி, அதன் வாசல்களைக் கடந்து, கதரோன் பள்ளத்தாக்கைக் கடந்து, ஒலிவ மலைக்கு ஏறிச்செல்லும் திராட்சைத் தோட்டங்களின் பதையில் நடந்தார்கள். அவ்விதமாக அவர்கள் நடந்துபோகும்போது, திராட்சைச் செடியின் உதாரணத்தைப் பயன்படுத்தி, சீஷர்களுடைய விசுவாசத்தின் பொருளையும் அவர்களுடைய அன்பின் நோக்கத்தையும் இயேசு அவர்களுக்கு இன்னும் விளக்கிச் சொன்னார்.

உலகம் முழுவதும் திராட்சைச் செடிகளை நட்ட ஒரு திராட்சைத் தோட்டக்காரனாக இயேசு இறைவனைச் சித்தரித்தார். சங்கீதம் 80:8-16 மற்றும் ஏசாயா 5:1-7 ஆகிய வேதப்பகுதிகளில் வாசிப்பதைப்போல பழைய ஏற்பாட்டு மக்களும் அவ்விதமான திராட்சைத் தோட்டமாயிருக்கிறார்கள். அவைகள் நல்ல கனிகளைக் கொடாத காரணத்தினால் இறைவன் அத்தோட்டத்தின் மீது பிரியமாயிருக்கவில்லை. ஆகவே இறைவன் ஒரு புதிய கிளையை நட்டுவைத்தார். வளர்ந்து மெய்யான திராட்சைச் செடியாகி, ஆவிக்குரிய கனிகளை அதிகமாக தரும்படி நாட்டப்பட்ட அந்த கிளை பரிசுத்த ஆவியினால் பிறந்த அவருடைய குமாரனே. பரிசுத்த ஆவியானவர் மனிதர்களுடைய வாழ்வில் உண்டுபண்ணுகிற கனிகளாகிய விலையேறப்பெற்ற ஆவிக்குரிய குணாதிசயங்களைப் பற்றியே இயேசு தம்முடைய சீஷர்களின் கவனத்திற்குக் கொண்டுவர விரும்புகறார். மனிதனுக்குள் ஒரு மிருகம் காத்துக்கொண்டிருக்கிறது. யாராவது அதைத் தூண்டிவிட்டால் அது வெளிப்பட்டு மற்றவர்களை மிதித்து, அவர்களை விழுங்கிப்போடும் என்ற மனித போதனை வஞ்சனையானது என்பதை அவர் அறிந்திருந்தார். இயேசு இந்த நிலையில் தம்முடைய போதனைகளின் ஆரம்ப நிலையையே முன்வைக்கிறார். அவர் மட்டுமே இறைவன் ஏற்றுக்கொள்ளத்தக்க கனிகளைத் தருபவர். அவர் மட்டுமே சமாதானம் பண்ணுகிறவரும் திருச்சபையைக் கட்டுகிறவருமாயிருக்கிறார். இந்த உதாரணத்திலுள்ள எதிர்மறையான காரியத்தை இயேசு முதலில் காண்பிக்கிறார். யார் ஒருவன் தன்னுடைய மனதைத் திறந்து, திராட்சைச் செடியிலிருந்து வரும் உயிர்திரவத்தைத் தன்னுள் செல்ல அனுமிக்கவில்லையோ, அவன் ஆவிக்குரிய கனிகளைக் கொடுக்க மறுப்பதால், அவன் பயனற்ற கிளை என்று இறைவனால் வெட்டிப்போடப்படுவான். நற்செய்தியின் கனிகளை இறைவன் உங்களில் காணாவிட்டால், அல்லது கிறிஸ்துவின் மரணம் மற்றும் உயிர்த்தெழுதலின் விளைவுகளை உங்களில் காணாவிட்டால், அவர் உங்களைத் தம்முடைய குமாரனாகிய திராட்சைச் செடியிலிருந்து வெட்டிப்போடுவார்.

ஆயினும் பரிசுத்த ஆவியானவரின் உயிர்ச்சாறை உங்கள் வாழ்வில் கண்ட மாத்திரத்திலேயே உங்களிலுள்ள வளர்ச்சியின் அடையாளத்தைக் கண்டு, ஒரு கொடியாக உங்களை நிலைநிறுத்துவார். அந்த உயிர்ச்சாறு உங்களில் இலைகளையும் கனிகளையும் உண்டுபண்ணும். நீங்கள் அதிக கனிகளைக்கொடுக்கும்படி திராட்சைத் தோட்டக்காரன் உங்களிலுள்ள பயனற்ற பாகங்களை நீக்கி உங்களைச் சுத்தம்செய்கிறார். இந்தக் கனிகள் உங்களுடையவைகள் அல்ல, அவை கிறிஸ்துவினால் உங்களில் தோன்றுகிற கனிகள். நாம் பயனற்ற பணியாளர்கள்; அவரே எல்லாவற்றிற்கும் எல்லாமுமாக இருக்கிறார். திராட்சைச் செடிகள் அடுத்த வருடத்தில் அதிக கனிகளைக்கொடுக்கும்படி ஒவ்வொரு இலையுதிர்க்காலத்திலும் அவற்றைச் சுத்தம் செய்ய வேண்டும் என்பது உங்களுக்குத் தெரியுமா? மனிதர்களுடைய தவறுகளையும் இறைவன் இவ்வாறு வெட்டியெறிய வேண்டியிருக்கிறது. அப்போதுதான் அவர்களுடைய கடினத்தன்மை நீங்கி அவர்களுடைய பாவங்கள் அழிந்துபோகும். அப்போதுதான் கிறிஸ்துவின் சாயல் உங்களில் முதிர்ச்சி பெறும். உங்களிடமிருந்து உங்களைக் காப்பதற்கு இறைவனிடம் பல்வேறு வழிமுறைகள் உண்டு. உங்களை உடைக்கக்கூடிய நிகழ்ச்சிகள், தோல்விகள் மற்றும் வேதனைகள் உங்களுக்கு நேரிடலாம். நீங்கள் உங்களுக்காக வாழாமல், கிறிஸ்துவில் வாழக்கற்றுக்கொள்ளுங்கள்; அப்போது அவருடைய வல்லமையினால் ஒரு அன்புள்ள நபராக நீங்கள் மாறுவீர்கள்.

யோவான் 15:3-4
3 நான் உங்களுக்குச் சொன்ன உபதேசத்தினாலே நீங்கள் இப்பொழுதே சுத்தமாயிருக்கிறீர்கள். 4 என்னில் நிலைத்திருங்கள், நானும் உங்களில் நிலைத்திருப்பேன்; கொடியானது திராட்சச்செடியில் நிலைத்திராவிட்டால் அது தானாய்க் கனிகொடுக்கமாட்டாததுபோல, நீங்களும் என்னில் நிலைத்திராவிட்டால், கனிகொடுக்கமாட்டீர்கள்.

இயேசு உங்களுக்கு இளைப்பாறுதலைத் தருகிறார். இயற்கையான பாவ சுபாவத்தின் காரணமாகவும் பல்வேறு பாவங்களினிமித்தமாகவும் இறைவன் திராட்சைக் கொடிகளை வெட்டிப்போடுவதில்லை. நாம் அவரை விசுவாசித்தபோது அவர் ஆரம்பத்தில் நம்மைத் தீவிரமாகச் சுத்திகரிக்கித்திருக்கிறார். “எங்களுடைய சடங்குகளினாலும் விண்ணப்பங்களினாலும் எதிர்காலத்தில் நாங்கள் சுத்திகரிக்கப்படுவோம்” என்று நாம் சொல்வதில்லை. அவர் நம்மை அப்போது சுத்திகரித்தார். நம்முடைய பாவங்கள் அனைத்தையும் முற்றிலுமாக மன்னித்து நம்மை தம்முடைய சிலுவையில் மீட்டுக்கொண்டவர் அவரே. சுத்திகரிப்பின் வல்லமை நற்செய்தியிலிருக்கிறது. நம்முடைய முயற்சிகளோ, நம்முடைய பாடுகளோ, நம்முடைய முதிர்ச்சியோ அல்ல, இறைவனுடைய வார்த்தை மட்டுமே நம்மைச் சுத்திகரிக்கிறது. இறைவன் ஆதியிலே தம்முடைய வார்த்தையினால் படைத்ததைப்போல, நாமும் நம்முடைய இருதயத்தை கிறிஸ்துவின் வார்த்தைக்குத் திறந்துகொடுக்கும்போது, நம்மைத் தம்முடைய வார்த்தையினால் சுத்திகரிக்கிறார். ஞானஸ்நானமோ கர்த்தருடைய பந்தியோ நம்மைச் சுத்திகரிப்பதில்லை, இயேசுவின் வார்த்தைகளில் நாம் வைக்கும் விசுவாசமும் அதை நாம் ஆழமாகத் தியானித்தலுமே நம்மைச் சுத்திகரிக்கிறது. நீங்கள் வேதாகமத்தின் ஏதாவது ஒருபகுதியை ஒவ்வொரு நாளும் வாசியுங்கள். ஒரு குறிப்பிட்ட நேரத்தை அதற்காக ஒதுக்கினால் நல்லது. அவ்வாறு நீங்கள் ஆவிக்குரிய போஷாக்கைப் பெற்றுக்கொள்ளவில்லை என்றால் காய்ந்துபோய்விடுவீர்கள்.

நம்முடைய வளர்ச்சியும் கனிகொடுத்தலும் ஒரு வார்த்தையிலேயே தங்கியிருக்கிறது என்கிறார். அது “நிலைத்திருங்கள்” என்ற வார்த்தையாகும். இந்த வார்த்தை 15-ம் அதிகாரத்தில் 10 முறை பயன்படுத்தப்பட்டுள்ளது. இதிலிருந்து பல அர்த்தங்களை நாம் பெற்றுக்கொள்ளலாம். நாம் அவரில் நிலைத்திருக்கிறோம்; அவர் நம்மில் நிலைத்திருக்கிறார். அவரில் நாம் நிலைத்திருப்பதால் நாம் பரிசுத்தமாக்கப்படுகிறோம். அவருடைய வல்லமையும் உயிர்ச்சாறும் நம்மில் பாய்ந்தோடுகிறது. அனைத்தும் அவரிடத்திலிருந்தே புறப்பட்டு வருவதால் நாம் அவரில் நிலைத்திருக்க வேண்டும். நாம் அவரைவிட்டு விலகியிருந்தால் அவருடைய அன்பின் வல்லமை நம்மில் அற்றுப்போகும். ஒரு கொடி நொடிப்பொழுதேனும் கொடியைவிட்டு நீங்கமானால் அது தன்னுடைய சாரத்தை இழந்து வாடிப்போகும். ஒரு திருச்சபை வாடி, செத்து காணப்படுமானால் அது எவ்வளவு அசிங்கமான காட்சியாயிருக்கும். நாம் அவரில் நிலைத்திருக்க வேண்டும் என்றும், நம்முடைய வளர்ச்சிக்காக அவர் எப்போதும் நம்மில் செயல்பட வேண்டும் என்றும், நாம் கனிகொடுக்கவும், செயல்படவும் தக்கதாக அவர் நம்மை இரவு பகலாகக் காத்துக்கொள்ள வேண்டும் என்றும் விண்ணப்பம் செய்வதுதான் விசுவாசிகளுக்கு மிகவும் முக்கியமானதாகும். நிலைத்திருப்பதும் நம்முடைய சொந்தச் செயல் அல்ல, அது பரிசுத்த ஆவியானவருடைய கிருபை. யாரும் சுயமாகக் கிறிஸ்துவில் நிலைத்திருக்க முடியாது. ஆனால் நாம் கிறிஸ்துவில் நிலைத்திருப்பதற்காக நன்றி சொல்லவும் விண்ணப்பிக்கவும் வேண்டும். அப்போது அவருடைய கிருபையினால் நாம் மட்டுமல்ல மற்றவர்களும் அவரில் தொடர்ந்து நிலைத்திருப்பார்கள்.

யோவான் 15:5
5 நானே திராட்சச்செடி, நீங்கள் கொடிகள். ஒருவன் என்னிலும் நான் அவனிலும் நிலைத்திருந்தால், அவன் மிகுந்த கனிகளைக் கொடுப்பான்; என்னையல்லாமல் உங்களால் ஒன்றும் செய்யக்கூடாது.

அவருடைய இதயத்திலிருந்து வரும் கொடிகளாக நாம் அவருடைய சாயலில் இருக்க வேண்டும் என்று அவர் நம்மை ஏற்படுத்தியிருப்பது எவ்வளவு பெரிய கனத்திற்குரிய காரியம். அவரே நம்மில் ஆவிக்குரிய வாழ்வை ஆரம்பித்து வைத்தவர். ஒரு திராட்சைச் செடியில் எவ்வாறு முதலில் ஒரு முளைதோன்றி பிறகு அது பெரிய ஆரோக்கியமான செடியாக வளருகிறதோ அதேபோலதான் இதுவும். அவ்வாறே அனைத்துக் கிறிஸ்தவ குணாதிசயங்களோடும் வளருகிற ஒரு கிறிஸ்தவன் இயேசுவுக்கே நன்றிசொல்ல வேண்டியவனாயிருக்கிறான். நமக்கு விசுவாசத்தை மட்டுமல்ல, தொடர்ச்சியாக கிருபையின் மேல் கிருபைகளை அவர் நமக்கருளுகிறார். நாமோ அவரில் நிலைத்திருக்க வேண்டிய பொறுப்புடையவர்களாயிருக்கிறோம்.

“நாம் அவரில்” என்ற வித்தியாசமான கூற்று இந்த நற்செய்தியில் 175 முறை இடம்பெறுவதை நாம் கவனிக்கிறோம். அதற்கு இணையாக “அவரில் நாம்” என்ற சொற்றொடரும் பலதடவை இடம் பெறுவதைக் கவனிக்கலாம். புதிய உடன்படிக்கையில் ஒவ்வொரு விசுவாசியும் கிறிஸ்துவுடன் இணைக்கப்படுவதற்குத் தகுதியுள்ளவர்களாக்கப்பட்டிருக்கிறார்கள். நாம் கிறிஸ்துவோடு கலந்தொன்றாகி விடுவதால் இந்த ஐக்கியம் மிகவும் உறுதியானதாக மாறிவிடுகிறது.

நாம் கர்த்தரை விசுவாசிப்பதால் நம்முடைய தனித்தன்மையை நாம் இழந்துபோவதில்லை. நாம் ஒரு மாய நிலைக்குள் அமிழ்ந்துபோய்விடுவதுமில்லை. அவர் உங்கள் சித்தத்தை வலுப்படுத்தி, உங்கள் வாழ்வை அவருடைய ஆவியினால் நிரப்புகிறார். கிறிஸ்து உங்களை முதிர்ச்சிக்குள் வழிநடத்தவும், உங்களுக்காக ஆதிமுதல் ஆயத்தப்படுத்தப்பட்ட சாயலில் உங்களை வனையவும் விரும்புகிறார். அவருடைய தன்மைகளை அவர் ஒரு விசுவாசியின் இருதயத்திற்குள் செலுத்துகிறார். அப்போது நம்முடைய விசுவாசமும் அன்பும் எங்கேயிருக்கும்?

இறைவனுடைய மகன் மானிடர்களுடன் இணைந்திருப்பதன் நோக்கம் என்ன? இயேசு ஏன் சிலுவையில் அறையப்பட்டார்; பரிசுத்த ஆவியானவர் ஏன் விசுவாசிகள் மீது பொழிந்தருளப்படுகிறார்? கர்த்தர் உங்களிடத்தில் எதைக் கேட்கிறார்? உங்கள் மீது அருளப்பட்டுள்ள ஆவிக்குரிய கனிகள் இறைவனிடத்திலிருந்துதான் வருகிறது. அன்பு, சந்தோஷம், சமாதானம், பொறுமை, இரக்கம், நற்குணம், உண்மை, சாந்தம் மற்றும் இச்சையடக்கம் ஆகியவையே பரிசுத்த ஆவியின் கனிகள் ஆகும்.

இந்தக் குணாதிசயங்களில் ஒன்றைக்கூட நாம் நம்முடைய சொந்த முயற்சியினால் பெற்றுக்கொள்ள முடியாது என்பதை நாம் அறிய வேண்டும். சுவாசிப்பது, நடப்பது, பேசுவது போன்ற காரியங்களை நாமாக எவ்வாறு உருவாக்க முடியாதோ அவ்விதமாகவே ஜெபம், விசுவாசம், அன்பு போன்ற காரியங்களையும் நம்மால் உருவாக்க முடியாது. இயேசுவிடம் இருந்து மட்டுமே புறப்பட்டுவரும் ஆவிக்குரிய வாழ்வைப் பெற்றனுபவிக்கும் பாக்கியம் விசுவாசிகளாகிய நமக்கு அருளப்பட்டிருக்கிறது. நம்முடைய ஆவிக்குரிய வாழ்வுக்காகவும், அவர் நமக்கு அருளிய தெய்வீக வல்லமைக்காகவும் நாம் அவருக்கு நன்றி செலுத்த வேண்டும். இந்த வல்லமைகள் மற்றும் ஊழியங்கள் அனைத்தும் இறைவனிடமிருந்து நமக்கு ஈவாகக் கிடைக்கிறது. அவராலேயன்றி நம்மால் ஒன்றும் செய்யக்கூடாது.

யோவான் 15:6
6 ஒருவன் என்னில் நிலைத்திராவிட்டால், வெளியே எறியுண்ட கொடியைப்போல அவன் எறியுண்டு உலர்ந்துபோவான்; அப்படிப்பட்டவைகளைச் சேர்த்து, அக்கினியிலே போடுகிறார்கள்; அவைகள் எரிந்துபோகும்.

கிறிஸ்துவில் நிலைத்திருப்பது உங்கள் பொறுப்பாயிருக்கிறது. ஒருபுறம் ஆவிக்குரிய வாழ்வும் கிறிஸ்துவில் நிலைத்திருத்தலும் இறைவனுடைய கொடைகள் என்று பார்த்தோம். மறுபுறம் கிறிஸ்துவை விட்டு விலகுகிற எவனும் தற்கொலை செய்கிறவனுக்குச் ஒப்பாயிருக்கிறான் என்பதையும் நாம் பார்க்கிறோம். இறைவனை விட்டு விலகுகிறவன் கடினமடைந்தவனாக இறைவனுடைய கோபத்தின் நெருப்பில் போடப்பட வேண்டியவனாயிருக்கிறான். இயேசுவைப் புறக்கணித்தவர்கள் அனைவரையும் உரிய காலத்தில் சேகரித்து அவர்களைப் புறம்பான இருளிலிலே போடுவார்கள். அவர்களுடைய குற்ற மனசாட்சி அவர்களை ஓய்வெடுக்க விடாது. நித்திய காலம் முழுவதும் இரக்கமுள்ள இறைவனை அவர்கள் காண்பார்கள், ஆனால் அவரிடத்தில் அவர்களால் போக முடியாது. அவர்கள் முன்பு எவ்விதமாக இறைவனுடைய அன்பைப் புறக்கணித்தார்கள் என்று அப்போது அவர்கள் உணர்ந்துகொள்வார்கள். அவர்கள் அவரைப் புறக்கணித்து, தங்கள் இரட்சகரை அசட்டை செய்த காரணத்தினால் அவர்கள் நித்திய அழிவுக்குள்ளாக்கப்படுவார்கள்.

யோவான் 15:7
7 நீங்கள் என்னிலும், என் வார்த்தைகள் உங்களிலும் நிலைத்திருந்தால், நீங்கள் கேட்டுக்கொள்ளுவதெதுவோ அது உங்களுக்குச் செய்யப்படும்.

கிறிஸ்துவில் நிலைத்திருப்பவன் அவருடன் ஒரு அறிவுபூர்வமான உறவில் வாழ்கிறான். ஒரு கணவனும் மனைவியும் தங்கள் நீண்டகால உறவில் ஒருவர் மற்றவருடைய சிந்தனைகளையும் நோக்கங்களையும் அறிந்திருப்பார்களோ அவ்விதமாகவே இதுவும் காணப்படும். யார் கிறிஸ்துவை நேசிக்கிறார்களோ அவர்கள் அவருடைய சித்தத்தை அறிந்து, அவரோடு ஒருங்கிணைந்து வாழ்வார்கள். நாம் வேதாகமத்தை அதிக ஆழமாகக் கற்று தியானிக்கும்போது, நம்முடைய உள்ளுணர்வுகளை அவருடைய வார்த்தையால் நிரப்புவதால், அவருடைய விருப்பத்தை நாம் எளிமையாக அறிந்துகொள்வோம்.

அப்போது நாம் நம்முடைய சுயநல விருப்பங்களின்படி விண்ணப்பிக்காமல், இறைவனுடைய இராஜ்யத்தின் வளர்ச்சியை ஆவலுடன் கவனிப்பவர்களாயிருப்போம். ஆவிக்குரிய போராட்டத்தில் பொறுப்புடன் பரிந்துபேசி ஜெபிப்பவர்களாயிருப்போம். அப்போது நம்முடைய இருதயம் நன்றியினாலும் துதியினாலும் நிரம்பும். நம்முடைய பிரச்சனைகளையும் பரிசுத்த ஆவியானவர் நம்முடைய கவனத்திற்குக் கொண்டுவருகிற தேவையுள்ள, துன்பமளிக்கிற மக்களுக்காவும் நாம் பரிசுத்தரை நோக்கி நம்முடைய விண்ணப்பங்களை ஏறெடுப்போம். நம்முடைய விசுவாசமுள்ள விண்ணப்பத்தின் அடிப்படையில்தான் இறைவன் இந்த உலகத்தில் செயல்படுகிறார். அவர் தம்முடைய இரட்சிப்பின் செயலில் பங்குபெறும்படி நமக்கு அனுமதியளிக்கிறார். நீங்கள் விண்ணப்பம் பண்ணுகிறீர்களா? எவ்வாறு? பரிசுத்த ஆவியில் நீங்கள் விண்ணப்பம் செய்கிறீர்களா? இறைவனுடைய சித்தம் பல்வேறுபட்டது. அதில் ஒன்று உங்களுடைய பரிசுத்தம்; இன்னொன்று அனைவரையும் இரட்சித்து சத்தியத்தை அறிகிற அறிவிற்குள் கொண்டுவருவது. நாம் தாழ்மையாக நடந்துகொண்டால் அதன் மூலம் இறைவனுடைய நாமம் பரிசுத்தப்படுகிறது. நீங்கள் அதிக கனிகளைக் கொடுக்கவும், உங்கள் பரலோக பிதாவையும் உங்கள் வழிகாட்டியாகிய கிறிஸ்துவையும் மகிமைப்படுத்தவும் விண்ணப்பத்தின் ஆவியைக் கர்த்தர் உங்களிடத்தில் ஊற்ற வேண்டும் என்று கர்த்தரிடம் கேளுங்கள்.

யோவான் 15:8
8 நீங்கள் மிகுந்த கனிகளைக் கொடுப்பதினால் என் பிதா மகிமைப்படுவார், எனக்கும் சீஷராயிருப்பீர்கள்.

நீங்கள் அதிகமான கனிகளைக் கொடுக்க வேண்டும் என்று இயேசு விரும்புகிறார். அவர் உங்கள் வாழ்வில் சிறிதளவான பரிசுத்தத்தைப் பார்த்து, அல்லது சில உண்மையான ஆத்துமாக்களை நீங்கள் ஆதாயப்படுத்தியதைப் பார்த்து, அல்லது உங்கள் குறைவான நன்றியுணர்வைப் பார்த்து அவர் திருப்தியடைவதில்லை. இல்லை. அவர் உங்கள் பரிசுத்தமாகுதலை விரும்புகிறார். பிதா பூரண சற்குணராயிருப்பதுபோல நீங்களும் பூரண சற்குணராயிருக்க வேண்டும் என்றும் எல்லா மனிதரும் இரட்சிக்கப்பட வேண்டும் என்றும் அவர் விரும்புகிறார். நீங்கள் ஒருபோதும் சுயதிருப்தியடைந்து விடாதீர்கள்.

2. நாம் ஒருவர் மீது ஒருவர் பாராட்டும் அன்பில் பிதாவின் ஐக்கியத்தில் நாம் நிலைத்திருப்பது வெளிப்படுகிறது (யோவான் 15:9-17)

---

யோவான் 15:9
9 பிதா என்னில் அன்பாயிருக்கிறதுபோல நானும் உங்களில் அன்பாயிருக்கிறேன்; என்னுடைய அன்பிலே நிலைத்திருங்கள்.

இயேசு யோர்தானில் ஞானஸ்நானம் எடுத்தபோது பிதா குமாரனில் வைத்த அன்பினால் வானத்தைத் திறந்து அவருக்குச் சாட்சி கொடுத்தார். பரிசுத்த ஆவியானவர் அவர் மீது புறாவைப்போல இறங்கினார். “இவர் என்னுடைய நேச குமாரன்; இவரில் நான் பிரியமாயிருக்கிறேன்” என்ற பிதாவின் சத்தம் கேட்கப்பட்டது. பரிசுத்த திரித்துவ இறைவனுடைய இந்த அறிவிப்பானது இயேசு ஞானஸ்நானம் பண்ணப்பட்டு, இறைவனுடைய ஆட்டுக்குட்டியாக பலியிடப்படும்பாதையில் பயணிக்க ஆரம்பித்து விட்டார் என்பதை எடுத்துக்கூறியது. குமாரன் நம்முடைய மீட்புக்காகத் தம்மைத் தாமே வெறுமையாக்கி பிதாவின் சித்தத்தை நிறைவேற்றும்படி தம்மை ஒப்புக்கொடுத்தார். இந்த அன்பு பிதாவோடும் குமாரனோடும் மட்டும் நின்றுவிடவில்லை. அவர்களுடைய அன்பு ஒன்றாக இணைந்து தீய உலகத்தின் மீட்புக்கான மாபெரும் திட்டத்தை ஆயத்தப்படுத்தியது.

பிதாவின் அன்பிற்கொப்பாக குமாரன் நம்மை நேசிக்கிறார். அவர் தம்முடைய பிதாவிற்குக் கீழ்ப்படிந்தார். நாமோ அவ்வாறு கீழ்ப்படியத் தவறினோம். உலகத்தோற்றத்திற்கு முன்பாக நம்மில் யாரும் பிறக்கவில்லை. ஆனால் அக்காலத்தில்தானே குமாரன் நம்மைத் தெரிந்தெடுத்து, பரிசுத்தப்படுத்தினார். அவர் ஆவியானவரின் இரண்டாம் பிறப்பை நமக்குக் கொடுத்து நம்மைப் பரிசுத்தப்படுத்தினார். நாம் அவருடைய கையில் அவருடைய விருப்பத்தின்படி தூக்கி எறியப்படும் விளையாட்டுப் பொருட்களாக இருக்கவில்லை. அவர் நாள் முழுவதும் நம்மை நினைத்து, தெய்வீக கரிசனையினால் நம்மை விசாரிக்கிறார். அவர் நமக்காகப் பரிந்துபேசி, நமக்கு அன்பின் கடிதங்களைத் தம்முடைய நற்செய்தி நூல்களில் எழுதிக்கொடுத்துள்ளார். விசுவாசம், நம்பிக்கை, அன்பு ஆகிய குணாதிசயங்களை நாம் கொண்டிருக்கும்படி அவர் நம்மைத் தூண்டுகிறார். இவ்வுலகத்திலுள்ள அனைத்துத் தாய் தந்தையருடைய தூய்மையான அன்பையும் ஒன்றாக இணைத்தாலும் என்றும் மாறாத கிறிஸ்துவின் அன்போடு அது ஒப்பிடத்தக்கதல்ல.

யோவான் 15:10
10 நான் என் பிதாவின் கற்பனைகளைக் கைக்கொண்டு அவருடைய அன்பிலே நிலைத்திருக்கிறதுபோல, நீங்களும் என் கற்பனைகளைக் கைக்கொண்டிருந்தால், என்னுடைய அன்பிலே நிலைத்திருப்பீர்கள்.

இயேசு இவ்வாறு நம்மை எச்சரிக்கிறார்: “என்னடைய அன்பைவிட்டுப் பிரிந்து செல்லாதீர்கள். நான் உங்களை நேசிக்கிறேன், அத்துடன் நீங்கள் என்னை நேசிப்பதற்கான அடையாளங்களை நான் உங்களில் தேடுகிறேன். உங்கள் விண்ணப்பங்கள் எங்கே? அவை பரலோகத்துடன் உங்களுக்கிருக்கும் தொலைபேசி இணைப்பைப் போல இருக்கிறதா? எனது இரட்சிப்புக் உகந்த பதில் செயலாக நீங்கள் தேவையுள்ளவர்கள் மீது காட்ட வேண்டிய கரிசனை எங்கே? நன்மையானதையும் செம்மையானதையும் நீங்கள் செய்து, இரக்கமாகவும் பரிசுத்தமாகவும் இருங்கள். என்னில் நிலைத்திருங்கள். இறைவன் எப்போதும் நன்மையைச் செய்வதைப்போல நீங்களும் நன்மையையே செய்யும்படி பரிசுத்த ஆவியானவர் உங்களைத் தூண்டுவாராக.”

இறைவன் நேசிப்தைப்போல நாமும் நேசியாமல் இருப்பது பாவமாகும். இறைவனுடைய இரக்கத்தின் அளவுக்கு கிறிஸ்து நம்மை உயர்த்த விரும்புகிறார். “நானும் என் பிதாவும் இரக்கமுள்ளவர்களாயிருப்பதைப் போல நீங்களும் இரக்கமுள்ளவர்களாயிருங்கள்.” இது நடைபெறுவது சாத்தியமில்லை என்ற நீங்கள் கருதலாம். மனிதனுடைய சிந்தனையின்படி இது நடைமுறைக்குச் சாத்தியமானதல்ல என்பது உண்மைதான். ஆனால் கிறிஸ்து விரும்புவதை அவரால் உங்களில் செயல்படுத்த முடியும் எனபதை நீங்கள் அறிவீர்களா? இறைவன் நேசிப்பதைப் போல நீங்களும் நேசிக்க வேண்டும் என்பதற்காக அவர் தம்முடைய ஆவியானவரை நமக்கு அருளியிருக்கிறார். இந்த ஆவியினால்தான் பவுல், “என்னை பெலப்படுத்துகிற கிறிஸ்துவினாலே எல்லாவற்றையும் செய்ய எனக்குப் பெலனுண்டு” என்று கூறுகிறார்.

இயேசு எப்போதும் தம்முடைய பிதாவின் சித்தத்தைவிட்டு விலகாமல், எப்போதும் அவருடைய அன்பில் நிலைத்திருந்தார் என்பதற்கு அவரே சாட்சியிடுகிறார். இறைவனுடனான சமாதானத்தையும், பரிசுத்த ஆவிக்குள்ளான விண்ணப்பத்தையும், அன்புடன்கூடிய சேவையையும் கிறிஸ்து நம்மில் ஏற்படுத்துகிறார்.

யோவான் 15:11
11 என்னுடைய சந்தோஷம் உங்களில் நிலைத்திருக்கும்படிக்கும், உங்கள் சந்தோஷம் நிறைவாயிருக்கும்படிக்கும், இவைகளை உங்களுக்குச் சொன்னேன்.

இறைவனைவிட்டு வெகுதூரம் விலகியிருக்கும் மனித இதயம் தாகத்தினால் அவதியுறும். பிதாவின் அன்பில் எப்போதும் நிலைத்திருக்கும் கிறிஸ்துவோ மகிழ்ச்சியினாலும் ஆசீர்வாதத்தினாலும் நிறைந்திருக்கிறார். அவருக்குள் எப்போதும் பாடலும் துதியும் இருந்துகொண்டே இருக்கும். நமக்கு அவர் அருளும் இரட்சிப்புடன் ஒரு உள்ளன்பின் பெருக்கையும் உங்களுக்குக் கொடுக்க விரும்புகிறார். இறைவன் மகிழ்ச்சியின் இறைவனாவார்.

அன்பைத் தொடர்ந்து சந்தோஷம் என்பது ஆவியின் கனிகளின் வரிசையில் இரண்டாவதாக வருகிறது. எங்கிருந்து பாவம் அகற்றப்படுகிறதோ அங்கே மகிழ்ச்சிப் பெருக்கெடுக்கிறது. கிறிஸ்து நமது இரட்சிப்பின் மகிழ்ச்சியை இன்னும் அதிகப்படுத்தி மற்றவர்களுக்கும் அது கிடைக்கும்படி செய்கிறார். மகிழ்ச்சியுள்ள மனிதனால் தனது மகிழ்ச்சியைத் தனக்குள் மட்டும் அடக்கிக்கொள்ள முடியாது. அவன் மற்றவர்களையும் பாவ மன்னிப்பின் ஆசீர்வாதத்திற்குள்ளும், இறைவனில் உண்டாகும் நிச்சயத்தில் கிடைக்கும் மகிழ்ச்சிக்கும் அவர்களைக் கொண்டுவர முயற்சிப்பான். பலர் இரட்சிக்கப்படும்போது நம்முடைய மகிழ்ச்சி பெரியதாக இருக்கும். “எல்லாரும் இரட்சிக்கப்படவும் சத்தியத்தை அறிகிற அறிவை அடையவும் வேண்டும்” என்று அப்போஸ்தலனாகிய பவுல் கூறுகிறார். போராட்டங்களும் பாடுகளும் காணப்பட்டாலும் நற்செய்திப்பணி அவற்றின் நடுவில் நம்முடைய மகிழ்ச்சிக்கான நிரூற்றாகத் திகழும்.

யோவான் 15:12-13
12 நான் உங்களில் அன்பாயிருக்கிறதுபோல நீங்களும் ஒருவரிலொருவர் அன்பாயிருக்க வேண்டுமென்பதே என்னுடைய கற்பனையாயிருக்கிறது. 13 ஒருவன் தன் சிநேகிதருக்காகத் தன் ஜீவனைக் கொடுக்கிற அன்பிலும் அதிகமான அன்பு ஒருவரிடத்திலுமில்லை.

இயேசு நம்மை நேசித்து, நம்முடைய பெயர்களையும், நமது குணாதிசயங்களையும், இறந்த காலங்களையும் அறிந்து வைத்திருக்கிறார். அவர் நம்முடைய பாடுகளையும் துன்பங்களையும் அறிந்திருக்கிறார். அவர் நம்முடைய எதிர்காலத்தைக் குறித்த ஒரு திட்டத்தையும் அதற்கான ஒத்தாசையையும் வைத்திருக்கிறார். அவர் எப்போதும் விண்ணப்பத்தில் நம்முடன் உரையாட விருப்பமுள்ளவராயிருக்கிறார். அவர் நம்முடைய பாவங்களை மன்னித்து சத்தியத்தின்படி பரிசுத்த வாழ்க்கை வாழும்படி நம்மை இழுத்துக்கொள்கிறார்.

இயேசு நம்மை நேசிப்பதைப்போல நாமும் ஒருவரை ஒருவர் நேசிக்க வேண்டும் என்ற விரும்புகிறார். நாம் நமது உறவினர் நண்பர்களைப் பற்றி கருத்துள்ளவர்களாக அவர்களுடைய சூழ்நிலைகளையும் துன்பங்களையும் குறித்து கருத்துள்ளவர்களாயிருக்கிறோம். நாம் அவர்களுடைய நோக்கங்களையும் ஆளத்துவங்களையும் அறிந்துகொள்ளத் தொடங்குகிறோம். நாம் அவர்களுடன் நேரம் செலவுசெய்து, அவர்களுடைய பிரச்சனைகளுக்குத் தீர்வைக் கண்டுபிடித்து, அவர்களுக்கு நம்மாலான உதவிகளைச் செய்கிறோம். அவர்கள் தவறு செய்யும்போது அவர்களை மன்னித்து, அவர்களுடைய தவறுகளையும் தோல்விகளையும் பெரிதுபடுத்தாமல் இருக்கிறோம்.

இயேசு அன்பின் உச்சத்தை இவ்வுலகில் வெளிப்படுத்தினார். அவர் வெறுமனே பேசியதுடன் அல்லது உதவி செய்ததுடன் நின்று விடாமல், பாவிகளுக்காக தம்மையே அவர் பலியாக ஒப்புக்கொடுத்தார். இறைவனுடைய அன்பை நமக்கு வெளிப்படுத்தும் அன்பின் சிகரமே சிலுவைதான். நாம் இந்த இரட்சிப்பின் செய்தியைப் பரப்பவும் நம்முடைய நேரத்தையும் பணத்தையும் அதற்காகத் தியாகம் செய்யவும் வேண்டும் என்று அவர் விரும்புகிறார். நாம் மற்றவர்களோடு நற்செய்தியைப் பகிர்ந்துகொள்ள வேண்டுமானால், நமக்குக் கிறிஸ்து செய்ததைப்போல நாமும் அவர்களுக்காக நம்முடைய பணத்தையும் பெலத்தையும் செலவு செய்ய வேண்டும். அவர் தமக்குத் தீமைசெய்தவர்களுக்காக விண்ணப்பித்து, அவர்களை நண்பர்களைப்போல நடத்துகிறார். “பிதாவே, இவர்கள் செய்கிறது இன்னதென்று அறியாதிருக்கிறார்கள். இவர்களுக்கு மன்னியும்” என்ற அவர் தம்முடைய எதிரிகளுக்காக விண்ணப்பித்தார். அவர் அவர்களை வெறுமனே சகோதரர்களே என்றோ, இறைவனுடைய மக்களே என்றோ அழைக்கவில்லை. அவர்களை “எனக்குப் பிரியமானவர்கள்” என்று அழைத்தார். தம்முடைய அன்புக்குத் தகுதியில்லாதவர்களை மீட்கும்படியாகவே அவர் தம்முடைய உயிரைக் கொடுத்தார்.

யோவான் 15:14-15
14 நான் உங்களுக்குக் கற்பிக்கிற யாவையும் நீங்கள் செய்வீர்களானால், என் சிநேகிதராயிருப்பீர்கள். 15 இனி நான் உங்களை ஊழியக்காரரென்று சொல்லுகிறதில்லை, ஊழியக்காரன் தன் எஜமான் செய்கிறதை அறியமாட்டான். நான் உங்களைச் சிநேகிதர் என்றேன், ஏனெனில் என் பிதாவினிடத்தில் நான் கேள்விப்பட்ட எல்லாவற்றையும் உங்களுக்கு அறிவித்தேன்.

“பிரியமானவனே” என்று இறைவன் உங்களை அழைக்கிறார். ஒவ்வொருவரையும் தனிப்பட்ட முறையில் அவர் அவ்விதமாகவே அழைக்கிறார். நீங்கள் யாருமற்ற அனாதையாக இருக்கலாம். உங்களுக்காக மரித்து, உங்களுக்காக வாழும் இயேசுவை நோக்கிப்பாருங்கள். எப்போதும் உங்களுக்கு உதவ ஆயத்தமாயிருக்கும் உங்கள் உற்ற நண்பன் அவரே. அவர் உங்கள் சிந்தனைகளை அறிந்தவராக உங்கள் பதிலுக்காகக் காத்திருக்கிறார். அவர் எல்லாரையும் நேசிப்பதைப்போல நாமும் எல்லாரையும் நேசித்து அவருடைய அன்பில் நிலைத்திருந்தால், நாம் அவரில் நிலைத்திருப்போம். கிறிஸ்துவை நேசிக்கிறோம் என்று சொல்லுகிற இருவர் தங்களுக்குள் ஒருபோதும் பிரிந்திருக்க முடியாது. நாம் அவரை நேசித்தால் நாம் ஒருவரை ஒருவர் நேசிக்க வேண்டும் என்று அவர் கோருகிறார். அவர் நம்மைப் பிரியமானவர்கள் என்று அழைக்கிறார். அவர் நம்மைப் படைத்த காரணத்தினால் நாம் அவருக்குச் சொந்தமானவர்களாயிருக்கிறோம். நம்மை அடிமைகளாக நடத்துவதற்கும் அவருக்கு உரிமையிருக்கிறது. அவர் நம்முடைய அடிமைத்தளையை முறித்து நம்மை உயிருடன் எழுப்பியிருக்கிறார். அவருடைய தெய்வீகச் செயல்களைப் பற்றி நமக்கு அறிவிக்கிறார். அவர் நம்மை அறிவீனர்களாக விட்டுவிடாமல், பிதாவின் அன்பையும், சிலுவையின் வல்லமையையும், பரிசுத்த ஆவியின் அன்பையும் அவர் நமக்குப் போதிக்கிறார். அவர் பரிசுத்த திரித்துவத்தின் இரகசியத்தை நமக்குப் போதித்திருப்பதால் நித்தியத்தின் மறைவான சத்தியங்களை நமக்கு வெளிப்படுத்தியிருக்கிறார். அவற்றை நமக்கு வெளிப்படுத்தும்படி பிதா அவற்றை அவரிடம் ஒப்படைத்திருக்கிறார். அவருடைய பணியிலும், ஆதரவிலும், கனத்திலும், வல்லமையிலும் வாழ்விலும் பங்குபெற நம்மை அனுமதிக்குமளவுக்கு அவருடைய நட்பு மிகவும் பெரியதாயிருக்கிறது. அவர் நமக்குப் புத்திர சுவிகாரத்தையும் கொடுத்து, தம்முடைய பிள்ளைகளாக நம்மை மாற்றுகிறார்.

யோவான் 15:16-17
16 நீங்கள் என்னைத் தெரிந்துகொள்ளவில்லை, நான் உங்களைத் தெரிந்துகொண்டேன்; நீங்கள் என் நாமத்தினாலே பிதாவைக் கேட்டுகொள்ளுவது எதுவோ, அதை அவர் உங்களுக்குக் கொடுக்கத்தக்கதாக நீங்கள் போய்க் கனிகொடுக்கும்படிக்கும், உங்கள் கனி நிலைத்திருக்கும்படிக்கும், நான் உங்களை ஏற்படுத்தினேன். 17 நீங்கள் ஒருவரிலொருவர் அன்பாயிருக்கவேண்டுமென்றே இவைகளை உங்களுக்குக் கற்பிக்கிறேன்.

இயேசுவுடனான உங்களுடைய உறவு முதன்மையாக உங்களுடைய சித்தம், விருப்பம், அனுபவம் ஆகியவற்றைச் சார்ந்ததல்ல. அது அவருடைய அன்பு, அழைப்பு மற்றும் தெரிந்துகொள்ளுதலைச் சார்ந்தது. நீங்கள் உங்கள் பாவத்திற்கு அடிமைகளாகவும், சாத்தானுடைய கட்டுப்பாட்டுக்கு உட்பட்டவர்களாகவும், மரணத்தின் ஆளுகைக்குள்ளாகவும் இருந்தீர்கள். நீங்கள் அந்தச் சிறைச்சாலையிலிருந்து வெளிவர முடியாதவர்களாயிருந்தீர்கள். ஆனால் இயேசு உலகத் தோற்றத்திற்கு முன்பாகவே உங்களைத் தெரிந்துகொண்டு, தம்முடைய விலையேறப்பெற்ற இரத்தத்தினால் உங்களை மீட்டுக்கொண்டார். அவர் உங்களைத் தம்முடைய நண்பராக்கி, தம்முடைய குமாரத்துவத்தின் உரிமைப்பேறுகளை உங்களுக்குக் கொடுத்தார். முழுவதும் கிருபையினால் அவர் உங்களைத் தெரிந்துகொண்டார். நீங்கள் ஒன்று அவரைத் தெரிந்துகொள்கிறீர்கள் அல்லது புறக்கணிக்கிறீர்கள். கிறிஸ்து சிலுவையில் பாவப்பரிகாரம் செய்தபோது அவர் எல்லா மனிதரையும் தெரிந்துகொண்டார். ஆனால் அனைவரும் அவருடைய சத்தத்தைக் கேட்காமல் தங்கள் பாவச் சேற்றில் நிலைத்திருப்பதைத் தெரிந்துகொள்கிறார்கள். அவர்கள் இறைவனுடைய பிள்ளைகள் பெறும் விடுதலையை அறியார்கள். நீங்கள் பாவத்திலிருந்து விடுவிக்கப்படவும் இறைவனோடு ஐக்கியம் கொள்ளவுமே அவர் உங்களை அழைத்திருக்கிறார். உங்களை அன்பில் பயிற்றுவியுங்கள். கர்த்தருக்கும் இவ்வுலக மனிதருக்கும் மனப்பூர்வமாக சேவை செய்ய வேண்டும் என்பது மட்டுமே உங்கள் வாழ்வின் ஒரே குறிக்கோளாயிருக்க வேண்டும். நீங்கள் அடிமைகளைப் போல கட்டாயப்படுத்தப்படுவதில்லை. இயேசு அன்பினிமித்தமாக மனப்பூர்வமாக வேலைக்காரனானார். அவர் தம்மைக் குறித்துக் கவலைப்படாமல் தாம் நேசிக்கிறவர்களைக் குறித்துக் கவலைப்படுவதால் அவரே நமக்கு மாதிரியானார்.

ஆகவே, நீங்கள் ஒரு மேய்ப்பன் தன் மந்தைமீது கரிசனைப்படுவதைப் போல உங்கள் நண்பர்கள் மீது கரிசனைகொள்ள வேண்டும் என்று அவர் உங்களுக்காக ஏங்குகிறார். நம்முடைய திறமைகள் மட்டுப்பட்டவைகளாயிருப்பதால் மனிதன் பாவத்தின் அடிமைத்தனத்திலிருந்து மற்றொருவனை விடுவிக்க முடியாது. அதனால்தான் இயேசு அவருடைய நாமத்தினால் நாம் விண்ணப்பிக்க வேண்டும் என்று நம்மிடம் கூறுகிறார். விடுவிக்கப்பட்டவர்களை இயேசு ஒழுக்கத்திலும் ஆவிக்குரிய வாழ்விலும் கட்டி எழுப்பி, அவர்களுடைய ஆவி, ஆத்துமா, சரீரம் ஆகியவற்றிற்குத் தேவையான எல்லாவற்றையும் கொடுக்கும்படி அவர்களுக்காக விண்ணப்பித்தால், கர்த்தர் தம்முடைய நல்ல சித்தத்தின்படி நமக்கு பதில்தருவார். அன்பே பதிலளிக்கப்படும் விண்ணப்பத்தின் இரகசியமாகும். இந்த ஆவியில் நீங்கள் உங்கள் நண்பர்களுக்காக விண்ணப்பீர்களானால், அவர் உங்கள் சாதாரண பாவங்களையும் உங்களுக்குக் காண்பித்து, உங்களை ஒரு பயனுள்ள மற்றும் சரியான ஒரு ஜெப வாழ்க்கைக்குள் நடத்தி, தாழ்மையை உங்களுக்குக் கொடுப்பார். உங்கள் நண்பர்களுடைய பரிசுத்தத்திற்காகவும் இரட்சிப்பிற்காகவும் கேட்பீர்களானால் கர்த்தர் நிச்சயமாக பதிலளிப்பார். நீங்கள் விண்ணப்பத்தில் நிலைத்திருக்கும்படி உங்களை அழைக்கிறோம். மங்கிப்போகும் பணியை அல்ல, நிலைத்திருக்கும் கனியையே அவர் உங்களுக்கு வாக்களிக்கிறார். உங்கள் விண்ணப்பத்தின் மூலமாகவும் சாட்சியின் மூலமாகவும் விசுவாசிப்பவர்கள் மரணத்திலிருந்து ஜீவனுக்குட்பட்டு நித்திய காலமாக வாழ்வார்கள்.

உங்கள் விசுவாசம், விண்ணப்பம் மற்றும் சாட்சி இவைகளுக்கும் மேலாக நீங்கள் உங்கள் நண்பர்களை உள்ளபூர்வமாகவும் தூய அன்புடனும் நேசிக்க வேண்டும் என்று இயேசு உங்களுக்குக் கட்டளையிடுகிறார். இறைவன் உங்களை பெருந்தன்மையுடன் நடத்துவதைப்போல நீங்களும் அவர்களுடன் பெருந்தன்மையுடன் நடந்துகொள்ளுங்கள். அவர்களுடைய கடினமான குணாதிசயங்களைக்கூட சகித்துக்கொண்டு பொறுமையுடன் நடந்துகொள்ளுங்கள். கறைபட்டு அழுக்காயிருக்கும் இந்த உலகத்தை இறைவனுடைய அன்பின் ஒளியினால் பிரகாசிப்பியுங்கள். சேவைசெய்தல், செவிகொடுத்தல், தியாகம் செய்தல், மற்றவர்களின் தேவைக்கேற்ப நடந்துகொள்ளுதல் போன்ற காரியங்களில் உங்களைப் பயிற்றுவியுங்கள். கிறிஸ்துவின் அன்பு உங்களில் பிரகாசிக்கட்டும்.

3. உலகம் கிறிஸ்துவையும் அவரது சீஷர்களையும் வெறுக்கிறது (யோவான் 15:18 – 16:3)

---

யோவான் 15:18-20
18 உலகம் உங்களைப் பகைத்தால், அது உங்களைப் பகைக்கிறதற்குமுன்னே என்னைப் பகைத்ததென்று அறியுங்கள். 19 நீங்கள் உலகத்தாராயிருந்தால், உலகம் தன்னுடையதைச் சிநேகித்திருக்கும்; நீங்கள் உலகத்தாராயிராதபடியினாலும், நான் உங்களை உலகத்திலிருந்து தெரிந்துகொண்டபடியினாலும், உலகம் உங்களைப் பகைக்கிறது. 20 ஊழியக்காரன் தன் எஜமானிலும் பெரியவனல்லவென்று நான் உங்களுக்குச் சொன்ன வார்த்தையை நினைத்துக்கொள்ளுங்கள். அவர்கள் என்னைத் துன்பப்படுத்தினதுண்டானால், உங்களையும், துன்பப்படுத்துவார்கள்; அவர்கள் என் வசனத்தைக் கைக்கொண்டதுண்டானால், உங்கள் வசனத்தையும் கைக்கொள்ளுவார்கள்.

இயேசு இறைவனுக்கும் தனக்கும் உள்ள பரிபூரண ஒற்றுமையை தம்முடைய சீஷர்களுக்கு விளக்கிக்காண்பித்து, தேற்றரவாளனாகிய ஆவியானவரின் வருகையை முன்னறிவித்த பிறகு, உலகத்தின் வெறுப்பை அவர்கள் எதிர்கொள்ளும்படி அவர்களை ஆயத்தப்படுத்துகிறார்.

இவ்வுலகம் கிறிஸ்தவ ஐக்கியத்திற்கு எதிரானது. இவ்வுலகத்தை வெறுப்பு ஆளுகை செய்கிறது, ஆனால் கிறிஸ்தவ ஐக்கியத்தையோ அன்பு கட்டிக்காக்கிறது. பிரச்சனைகள் நிறைந்த உலகத்திலிருந்து இயேசு தம்முடைய சீஷர்களை சந்தோஷத்தின் தீவிற்கு இடமாற்றம் செய்வதில்லை. அவருடைய அன்பு கடுமையான தீமையை மேற்கொள்ளும்படி அவர் தம்முடையவர்களை தீமையான சூழ்நிலைகளுக்குள் அனுப்புகிறார். இது பயப்பட வேண்டிய பணியல்ல, மாறாக ஆவிக்குரிய போராட்டம். அன்புக்காகக் குரல்கொடுப்பவர்கள் புறக்கணிப்பையும், சேவை செய்யும்போது கடுமையான எதிர்ப்பையும் சந்திக்க நேரிடுகிறது. இவை அவர்களுடைய தவறுகளினிமித்தமாக ஏற்படாமல், இயேசுவின் வார்த்தைகளுக்கு எதிராக தீய ஆவிகள் மக்களைத் தூண்டிவிடுவதால் ஏற்படுகிறது. அன்பிலும் ஞானத்திலும் பரிபூரணராயிருந்த அவர்களுடைய கர்த்தரே மரணம்வரை அந்த வெறுப்பைச் சந்திக்க நேர்ந்தது. அவர் அனுபவித்த துன்பம் மிகவும் கடுமையாக இருந்தபோதிலும், அவர் போர்க்களத்தைவிட்டு ஓடாமலும், இவ்வுலகத்தைவிட்டுப் போகாமலும், அவரை வெறுத்தவர்களை நேசித்தவாறே மரித்தார்.

நம்மில் யாரும் தேவதூதர்கள் அல்ல. நம்முடைய இருதயத்திலிருந்து தீய எண்ணங்கள் புறப்பட்டு வருகிறது. கிறிஸ்துவின் கிருபையினால் புதிய ஆவியானவர் நம்மீது வந்திருக்கிறார். மனந்திரும்புதல் என்றால் மனதில் ஏற்படும் மாற்றமாகும். ஆவியினால் பிறந்தவன் இவ்வுலகத்திற்குரியவனாக இல்லாமல் கர்த்தருக்குரியவனாக இருக்கிறான். அவர் நம்மை உலகத்திலிருந்து தெரிந்துகொண்டார். “சபை” என்பதற்கான கிரேக்க வார்த்தையின் பொருள் தெரிந்துகொள்ளப்பட்டு, உலகத்திலிருந்து அழைக்கப்பட்டு, சில பொறுப்புகளை நிறைவேற்றுவதற்காக கூடும் கூட்டம் என்று பொருள். ஆகவே உலகம் திருச்சபையை ஒரு அந்நிய காரியமாகப் பார்க்கிறது. இந்தப் பிரிவினை ஒரு குடும்பத்தில் இயேசு சந்தித்ததைப்போல ஆழமான துக்கத்தையும் பிரிவினையையும் உண்டுபண்ணுகிறது (யோவான் 7:2-9). இந்த நிலையில் உலகத்தின் பரியாசத்தையும் உபத்திரவத்தையும் எதிர்கொள்வதற்கு கிறிஸ்துவில் நிலைத்திருக்கும் விசுவாசிகளுக்கு அதிகமான ஞானமும் தாழ்மையும் தேவைப்படுகிறது. நீங்களும் இப்படிப்பட்ட சூழ்நிலைகளில் இருப்பீர்களானால், இயேசுவும் இவ்விதமாகவே காரணமில்லாமல் பாடுபட்டார் என்பதை நினைத்துக்கொள்ளுங்கள். அவர் அந்த மக்களை நேசித்து அவர்களைச் சுகப்படுத்தியதற்காக ஒரு குற்றவாளியைப்போல அவர் கொல்லப்பட்டார்.

மனிதர்கள் உங்களை உபத்திரவப்படுத்தி உங்களுடன் போராடினாலும் சிலர் இயேசுவுக்குச் செவிகொடுத்ததுபோல உங்களுக்கும் செவிகொடுப்பார்கள் என்ற மாபெரும் வாக்குத்தத்தத்தை இயேசு அருளுகிறார். பரிசுத்த ஆவியினால் பயன்படுத்தப்படும் வார்த்தை எவ்வாறு மனிதர்களுடைய வாழ்வில் அன்பையும் விசுவாசத்தையும் உருவாக்குகிறதோ, அதுபோலவே உங்களுடைய சாட்சியின் மூலமாக சிலருக்க நித்திய ஜீவன் அருளப்படும். இந்த எதிர்ப்பு நிறைந்த உலகத்தில் ஒவ்வொரு கிறிஸ்தவனும் கிறிஸ்துவின் ஸ்தானாபதியாயிருக்கிறான். ஆகவே உங்கள் பரம அழைப்புக்குப் பாத்திரராக நடந்துகொள்ளுங்கள்.

யோவான் 15:21-23
21 அவர்கள் என்னை அனுப்பினவரை அறியாதபடியினால் என் நாமத்தினிமித்தமே இவைகளையெல்லாம் உங்களுக்குச் செய்வார்கள். 22 நான் வந்து அவர்களிடத்தில் பேசாதிருந்தேனானால் அவர்களுக்குப் பாவமிராது; இப்பொழுதோ தங்கள் பாவத்தைக்குறித்துப் போக்குச்சொல்ல அவர்களுக்கு இடமில்லை. 23 என்னைப் பகைக்கிறவன் என் பிதாவையும் பகைக்கிறான்.

இயேசு தம்முடைய பரமேறுதலுக்குப் பிறகு சீஷர்கள் அவருடைய நாமத்தினிமித்தமாக கடுமையான உபத்திரவத்தை சந்திக்க நேரிடும் என்று அவர்களை எச்சரித்தார். யூதர்கள் ஒரு தாழ்மையான ஆட்டுக்குட்டியாகிய மேசியாவை எதிர்பார்க்கவில்லை. தங்களை ரோமர்களுடைய காலனியாதிக்கத்திலிருந்து விடுவிக்கும் ஒரு அரசியல் மேசியாவையே அவர்கள் எதிர்பார்த்திருந்தார்கள். இறைவனுடைய மெய்யான மகத்துவத்தை அறியாததால்தான் அவர்கள் அரசியல் விடுதலையைக் குறித்த ஒரு மாயமான நம்பிக்கையில் வாழ்ந்தார்கள். அவர்களுக்கு இறைபக்தியையும் அரசியலையும் வேறுபடுத்திப் பார்க்கத் தெரியவில்லை. அவர்கள் ஒரு இராணுவத்தின் இறைவன் மீது நம்பிக்கையுள்ளவர்களாயிருந்தார்கள். சகல ஆறுதல் மற்றும் சமாதானத்தின் இறைவனாயிருக்கிற கர்த்தராகிய இயேசு கிறிஸ்துவின் பிதாவாகிய இறைவனை அவர்களுக்குத் தெரியவில்லை. அவர் போர்களை தண்டனையாக அனுமதித்தாலும், அந்தப் போர்களை வைத்து தம்முடைய அரசைக் கட்டுவதில்லை. அவர் தம்முடைய ஆவியினால் சத்தியத்திலும் தூய்மையிலும் தம்முடைய அரசைக் கட்டுகிறார்.

கிறிஸ்து தம்முடைய பிதாவின் கொள்கைகளைத் தெளிவாகப் பிரதிபலிக்கிறவராக வந்திருந்தார். ஆனால் யூதர்கள் அன்பு மற்றும் ஒப்புரவாகுதலின் ஆவியைப் புறக்கணித்தார்கள். அவர்கள் தீவிரவாதத்தையும் போரையுமே தேடினார்கள். சமாதான கர்த்தராகிய கிறிஸ்துவை ஏற்றுக்கொள்ளாத எந்த இனமும் யூதர்கள் விழுந்த அதே குழியில் விழுகிறார்கள். நம்முடைய பாவங்களை நாம் வெறும் ஒழுக்கரீதியான குறைபாடுகளாக மட்டும் கருதக்கூடாது. அவை இறைவனுக்கு எதிரானவையாகவும் அவருடைய சமாதானத்தின் ஆவியைப் புறக்கணிப்பதாகவும் அமைகிறது.

இயேசுவையும் அவருடைய இராஜ்யத்தையும் சமாதானத்தையும் மக்கள் புறக்கணிப்பதற்கான காரணம் அவர்கள் உண்மையான இறைவனைப் பற்றி அறியாதிருப்பதேயாகும். மக்கள் தங்களுடைய விருப்பப்படி இறைவனைக் கற்பனை செய்துகொள்கிறார்கள். ஆனால் இயேசு அன்பின் இறைவனை நமக்கு வெளிப்படுத்தியிருக்கிறார். அன்பை வெறுக்கிறவன் தீவிரவாதத்தின் பாதையைத் தெரிவுசெய்கிறான். கிறிஸ்துவைப் புறக்கணிக்கிறவன் உண்மையான இறைவனைப் புறக்கணிக்கிறான்.

யோவான் 15:24-25
24 வேறொருவரும் செய்யாத கிரியைகளை நான் அவர்களுக்குள்ளே செய்யாதிருந்தேனானால், அவர்களுக்குப் பாவமிராது; இப்பொழுது அவர்கள் என்னையும் என் பிதாவையும் கண்டும் பகைத்துமிருக்கிறார்கள். 25 முகாந்தரமில்லாமல் என்னைப்பகைத்தார்கள் என்று அவர்களுடைய வேதத்தில் எழுதியிருக்கிற வாக்கியம் நிறைவேறும்படிக்கு இப்படியாயிற்று.

இயேசு இறைவனைத் தம்முடைய பிதா என்று அறிவித்தது, அவருடைய ஆவியை எதிர்ப்பவர்கள் மீதான ஒரு நியாயத்தீர்ப்பாக இருந்தது. இதை அவர் பல அற்புதங்களோடு சேர்த்து செய்தார். இவ்வுலகில் யாரும் இயேசுவைப்போல சுகமளிக்கவோ, பிசாசுகளைத் துரத்தவோ, காற்றையும் கடலையும் அமைதிப்படுத்தவோ, இறந்தவர்களை எழுப்பவோ யாராலும் முடியாது. இறைவன் இந்த அற்புதங்கள் மூலமாகச் செயல்பட்டு, அவற்றைத் தம்முடைய புதிய படைப்பின் ஆதாரங்களாகக் காண்பித்தார். இந்த அற்புதங்களில் யூத இனத்திற்கு எதுவித அரசியல் அல்லது பொருளாதார ஆதாயம் எதுவும் இல்லாத காரணத்தினால் அவற்றின் முக்கியத்துவத்தை அவர்களால் காண முடியவில்லை. ஆனால் இயேசுவினுடைய அன்பின் அதிகாரத்தை அவர்கள் கண்ணுற்றபோது, இந்த அற்புதங்களே பிதாவை விசுவாசிக்காதபடி அவர்களுக்கு இடறலாயிருந்தது. பரிசுத்த ஆவியானவருக்கு யூதர்கள் எவ்வாறு தங்கள் ஆத்துமாக்களை அடைத்துக்கொண்டார்களோ, அவ்வாறே இன்றும் இலட்சக்கணக்கான மக்கள் இறைவனை எதிர்க்கும் ஆவியில் அடைபட்டிருக்கிறார்கள். கிறிஸ்து இறைவனுடைய குமாரன் என்று அறிக்கை செய்யாதவர்கள் அவருடைய சீஷர்களை வெறுக்கிறார்கள், தங்கள் பாவங்களில் வாழ்ந்து, பரிசுத்த திரித்துவத்திற்கு எதிராக தூஷணம் பேசி, உண்மையான இறைவனை அறியாதிருக்கிறார்கள். ஆயினும் இயேசு அவர்களைத் தண்டிக்காமல் தம்முடைய பணியாளர்கள் மூலம் அன்பின் செயலை தொடர்ந்து நடத்துகிறார். சகோதரர்களே, இந்த ஆவிக்குரிய போராட்டத்திற்கு ஆயத்தப்படுங்கள். துன்பம் அனுபவிப்பதற்கு வேண்டிய ஆயத்தத்தையும் பொறுமையையும் தரும்படி கர்த்தரிடம் மன்றாடுங்கள்.

யோவான் 15:26-27
26 பிதாவினிடத்திலிருந்து நான் உங்களுக்கு அனுப்பப்போகிறவரும், பிதாவினிடத்திலிருந்து புறப்படுகிறவருமாகிய சத்திய ஆவியான தேற்றரவாளன் வரும்போது, அவர் என்னைக்குறித்துச் சாட்சி கொடுப்பார். 27 நீங்களும் ஆதிமுதல் என்னுடனேகூட இருந்தபடியால் எனக்குச் சாட்சிகளாயிருப்பீர்கள்.

உலகம் இறைவனை வெறுத்து, அவருடைய ஒரே மகனைச் சிலுவையில் அறைந்ததற்கு பதிலாக இந்த திரித்துவ இறைவன் என்ன செய்தார்? தம்முடைய பரிசுத்த ஆவியானவரை அனுப்பினார். பரிசுத்த ஆவியானவரின் வருகை இந்நாட்களிலுள்ள அதிசயமாகும். அவர் பிதாவினிடத்திலிருந்து புறப்பட்டு வருகிறபடியினாலும் தன்மையிலும் எண்ணங்களிலும் முற்றிலும் இறைவனோடு ஒத்திருக்கிறபடியாலும் பரிசுத்த ஆவியின் வருகை இறைவன் இவ்வுலகத்திற்கு வருகிறார் என்பதையே குறிக்கிறது. அவர் படைப்பில் பங்குள்ளவராக உலகத்தின் மீட்பை விரும்புகிறார். ஆவியானவர் இவ்வுலகத்திலிருக்கும் தீமையை நியாயம்தீர்த்து, அனைத்து அசுத்தங்களையும் வெளிப்படுத்தவதால் நம்மைப் பரிசுத்தத்திற்கு நேராக நடத்துகிறார். இவ்வுலகம் பெருமையினாலும், பிடிவாதத்தினாலும், வஞ்சனையினாலும் திக்குமுக்காடிக்கொண்டிருக்கும்போது, பரிசுத்த ஆவியின் பிரசன்னம் சீஷர்களுடைய தாழ்மைக்கும் சுயவெறுப்புக்கும் தூண்டுகோலாக அமைகிறது. முதன்மையாக அவர் சத்திய ஆவியாக இருந்து உலகத்தின் தீமைகளைக் கண்டித்து உணர்த்துகிறார்.

அதேவேளையில் சீஷர்களுடைய இரட்சிப்பை முழுமைப்படுத்தும் இறைமகன் இயேசுவே என்று அவர்களைப் பரிசுத்த ஆவியானவர் ஆறுதல்படுத்துகிறார். இந்த ஆறுதலின் ஆவியானவர் குமாரனுடைய அன்பில் நாம் இறைவனையே காணும்படியாக நம்முடைய ஆவிகளில் இயேசுவுக்குச் சாட்சிகொடுக்கிறார். பரிசுத்த ஆவியானவரின்றி மெய்யான சத்தியத்தை நம்மால் உணர்ந்துகொள்ள முடியாது. பரிசுத்த ஆவியானவர் நம்மை நற்செய்தியின் மூலமாக அழைத்து, அவருடைய ஈவுகளினால் நம்மில் ஒளியேற்றி, மெய்யான விசுவாசத்தினால் நம்மைப் பரிசுத்தப்படுத்தாவிட்டால், நம்முடைய சொந்த முயற்சியினாலோ, செயல்பாடுகளினாலோ நாம் ஒருபோதும் இயேசு கிறிஸ்துவை நம்முடைய கர்த்தராக ஏற்றுக்கொண்டிருக்கவும் முடியாது அவரிடம் நாம் வந்திருக்கவும் முடியாது என்பதை நாம் அனைத்து விசுவாசிகளுடனும் சேர்ந்து அறிக்கை செய்கிறோம். அவரே நம்மை ஒரே விசுவாசத்தில் காத்துக்கொள்கிறார். பரிசுத்த ஆவியானவரே நம்முடைய சாட்சியை வலுவுள்ளதாக்குகிறார். நீங்கள் கிறிஸ்துவை மற்றவர்களுக்கு அறிமுகம் செய்ய விரும்பினால் உங்களுடைய சொந்த அறிவையோ அனுபவத்தையோ சார்ந்திருக்க வேண்டாம். ஞானத்தின் ஆவியானவரிடம் உங்களை முழுவதுமாக ஒப்புக்கொடுங்கள். இயேசுவை எவ்வாறு கனப்படுத்தலாம் என்பதை அறிந்துகொள்ளும்படி அவருடைய வார்த்தைகளுக்குச் செவிகொடுங்கள். இவ்வாறு நீங்கள் பரிசுத்த ஆவியானவருடைய சத்தத்திற்கு உள்ளபூர்வமாகச் செவிகொடுத்தால், அது கர்த்தராகிய இயேசுவின் திறமையான அப்போஸ்தலனாக அவருக்காக பேசவும் சாட்சிபகரவும் உங்களுக்குத் துணைசெய்யும்.

இயேசு தம்முடைய பன்னிரெண்டு அப்போஸ்தலர்களையும் தம்முடைய சாட்சிகளாகத் தெரிந்துகொண்டார். அது அவர்களுக்கே உரிய தனிச்சிறப்பான ஆசீர்வாதம். அவர் இயேசுவின் இவ்வுலக வாழ்க்கைக்கும் ஊழியத்திற்குமான கண்கண்ட சாட்சிகள். அவர்கள் கண்டும், கேட்டும், தொட்டும் இருக்கிறதைக் குறித்துச் சாட்சி கொடுக்கிறார்கள். அவர்களுடைய வார்த்தைகள் இறைவன் இவ்வுலகத்தில் இருக்கிறார் என்பதை நியாயப்படுத்துவதாக உள்ளது. நம்முடைய விசுவாசம் அந்த சாட்சியையே சார்ந்திருக்கிறது. இயேசு ஒரு புத்தகத்தையோ, ஒரு நிருபத்தையோ எழுதவில்லை. மாறாக தம்முடைய மீட்பளிக்கும் செய்தியை பரிசுத்த ஆவியானவருடைய சாட்சிக்கும், தம்முடைய சீஷர்களுடைய நடத்தைக்கும் பேச்சுக்கும் ஒப்புக்கொடுத்தார். சத்திய ஆவியானவர் பொய் சொல்ல மாட்டார். கிறிஸ்தவினுடைய சீஷரடகளின் வாயின் மூலமாக அவருடைய அன்பின் வல்லமையை நோயுற்ற இந்த உலகத்திற்கு நிரூபித்துக் காண்பிக்கிறார். “பரிசுத்த ஆவி உங்களில் வரும்போது, நீங்கள் பெலனடைந்து எனக்குச் சாட்சிகளாயிருப்பீர்கள்” என்று இயேசு தாமே கூறியிருக்கிறார்.

By

Wateroflife.org