சங்கீதம்
17 விளக்கம்
(தாவீதின் விண்ணப்பம்.)
ஆறாவது நெருக்கத்தின் ஜெபம்
பொருளடக்கம்
1. தேவன் கேட்கவேண்டுமென்று ஏறெடுக்கப்பட்ட எட்டு விண்ணப்பங்கள் - தாவீதின் சோதனையும் நேர்மையும் - (17:1-6)
2. துன்மார்க்கனிடமிருந்து பாதுகாக்கப்பட வேண்டும் என்று ஏறெடுக்கப்பட்ட மூன்று விண்ணப்பங்கள் - துன்மார்க்கனின் ஐந்து பாவங்கள் - (17:7-12)
3. துன்மார்க்கனிடமிருந்து மீட்கப்பட வேண்டும் என்பதற்காக - (17:13-14)
4. தாவீதின் மூன்று விதமான நம்பிக்கை - (17:15)
தாவீது மிகுந்த நெருக்கத்திலிருக்கிறார். அவருடைய சத்துருக்கள் மூலமாய் மிகப்பெரிய ஆபத்துக்கள் அவரை நெருங்கி வந்துகொண்டிருக்கிறது. தாவீது இப்படிப்பட்ட சமயத்தில் இந்த சங்கீதத்தைப் பாடுகிறார். இந்த சங்கீதம் கர்த்தருடைய சமுகத்தில் தாவீது ஜெபம்பண்ணுகிற சங்கீதமாகும். கர்த்தரே தனக்கு அடைக்கலமானவர் என்பதை விசுவாசித்து, தாவீது அவருடைய சமுகத்தில் அடைக்கலம் தேடுகிறார்.
கர்த்தர் தன்னுடைய நியாயத்தையும், கூப்பிடுதலையும் கேட்டறிய வேண்டுமென்று தாவீது பயபக்தியோடு விண்ணப்பம்பண்ணுகிறார் (சங் 17:1-4). கர்த்தர் தம்முடைய வழிகளில் தன்னுடைய நடைகளை ஸ்திரப்படுத்துமாறும், தன்னுடைய சத்துருக்களிடமிருந்து தன்னை இரட்சிக்குமாறும் தாவீது ஜெபிக்கிறார் (சங் 17:5-8).
தாவீது கர்த்தரிடத்தில் தன்னுடைய சத்துருக்களின் சுபாவங்களைப்பற்றி முறையிடுகிறார். அவர்களிடமிருந்து கர்த்தர் தன்னை பாதுகாக்கவேண்டுமென்று விண்ணப்பம்பண்ணுகிறார் (சங் 17:9-12). தாவீது கர்த்தருடைய முகத்தைத் தரிசிப்பதாக விசுவாசித்து தன்னுடைய இருதயத்தில் ஆறுதலும் சந்தோஷமும் பெற்றிருக்கிறார் (சங் 17:15).
தாவீதின் ஜெபம்
சங் 17 : 1-7
என் விண்ணப்பத்திற்குச் செவிகொடும்
கர்த்தாவே, நியாயத்தைக் கேட்டருளும், என் கூப்பிடுதலைக் கவனியும்; கபடமில்லாத உதடுகளினின்று பிறக்கும் என் விண்ணப்பத்திற்குச் செவிகொடும் (சங் 17:1).
பதினேழாவது சங்கீதம் ஒரு ஜெபகீதமாகும். கர்த்தருடைய சமுகத்தில் அவரைத் துதிப்பதற்கும் ஒரு காலமுண்டு. அவரிடத்தில் ஜெபிப்பதற்கும் ஒரு காலமுண்டு. சவுல் தாவீதைத் துன்பப்படுத்துகிறார். தாவீது அதிகமாய் நெருக்கப்பட்டிருக்கிறார். இப்படிப்பட்ட சூழ்நிலையில் தாவீது கர்த்தரிடத்தில் விண்ணப்பம்பண்ணுகிறார். ""கர்த்தாவே என் நியாயத்தை கேட்டருளும், என் கூப்பிடுதலை கவனியும்'' என்று பயபக்தியாய் ஜெபம்பண்ணுகிறார்.
தாவீதினிடத்தில் ஒரு அநியாயமும் இல்லை. கர்த்தர் தம்முடைய நியாயசனத்தில் அமர்ந்து, நீதியாய் விசாரிக்கும்போது, தன்னிடத்தில் ஒரு அநியாயமும் இராது என்பதில் தாவீது உறுதியாயிருக்கிறார். ஆகையினால்தான், விசுவாசத்தோடு, ""கர்த்தாவே என் நியாயத்தைக் கேட்டருளும்'' என்று ஜெபம் பண்ணுகிறார்.
கர்த்தர் நியாயசனத்தில் அமர்ந்திருக்கும்போது தம்முடைய நீதியினால் நம்மை நியாயம் விசாரிப்பார். அவர் தம்முடைய கிருபாசனத்தில் அமர்ந்திருக்கும்போது, நமக்கு தம்முடைய கிருபையையும், இரக்கத்தையும் காண்பித்து உதவி செய்வார். கர்த்தர் நியாயசனத்தில் அமர்ந்திருக்கும்போது, தாவீதைப்போல நாமும், ""கர்த்தாவே என் நியாயத்தைக் கேட்டருளும்'' என்று விண்ணப்பம்பண்ணலாம். கர்த்தர் தம்முடைய கிருபாசனத்தில் அமர்ந்திருக்கும்போது, ""என் கூப்பிடுதலைக் கவனியும்'' என்று அவருடைய கிருபைக்காகவும், இரக்கத்திற்காகவும் அவரிடத்தில் ஜெபம்பண்ணலாம்.
தாவீது கர்த்தரிடத்தில் விண்ணப்பம்பண்ணும்போது ""கபடமில்லாத உதடுகளினின்று பிறக்கும் என் விண்ணப்பத்திற்கு செவிகொடும்'' என்று ஜெபம்பண்ணுகிறார். இதே ஜெபத்தை மறுபடியுமாக, ""என்னிடத்தில் உம்முடைய செவியைச் சாய்த்து, என் வார்த்தையைக் கேட்டருளும்'' (சங்17:6) என்று கர்த்தரிடத்தில் விண்ணப்பம்பண்ணுகிறார்.
தாவீது கர்த்தருடைய சமுகத்தில் பயபக்தியோடு விண்ணப்பம்பண்ணுகிறார். அவருடைய ஜெபத்தில் உண்மையிருக்கிறது. அவர் மாய்மாலமான வார்த்தைகள் எதையும் பயன்படுத்தவில்லை. தாவீது தன்னுடைய வார்த்தைகளினால் கர்த்தரிடத்தில் பொய் சொல்லவில்லை. கர்த்தரை வஞ்சிக்க முயற்சி செய்யவுமில்லை. தன்னுடைய உதடுகள் கபடமில்லாத உதடுகள் என்று தாவீது அறிக்கை செய்கிறார். கபடமுள்ள ஜெபங்களுக்கு கர்த்தருடைய சமுகத்திலிருந்து பதில் வராது.
கர்த்தர் தன்னுடைய விண்ணப்பத்திற்குச் செவிகொடுக்குமாறு தாவீது வேண்டிக்கொள்கிறார். தாவீதைப்போலவே நமக்கும் நெருக்கங்களும், பாடுகளும், வேதனைகளும் வரலாம். இப்படிப்பட்ட சூழ்நிலைகளில் நம்முடைய ஜெபசக்கரம் சுழன்றுகொண்டிருக்கவேண்டும். நமக்கு துன்பங்களும், வேதனைகளும் வரும்போது, நாம் கர்த்தருடைய சமுகத்தில் ஜெபிக்கிறவர்களாக இருக்கவேண்டும். துன்பங்களையும், பாடுகளையும், நமக்கு விரோதமான சூழ்நிலைகளையும் பார்த்து நாம் பயந்துவிடக்கூடாது.
கர்த்தருடைய கிருபாசனத்தண்டையில் தைரியமாய்க் கிட்டிச் சேருகிற சிலாக்கியத்தை நாம் பெற்றிருக்கிறோம். இது கர்த்தருடைய பிள்ளைகளுக்குக் கிடைத்திருக்கிற மேன்மையான சிலாக்கியம். நாம் அவருடைய கிருபாசனத்தண்டையில் விசுவாசத்தோடும், தைரியமாயும் கிட்டிச் சேரவேண்டும். தாவீது கர்த்தரை நம்புகிறார். கர்த்தரிடத்தில் உறுதியான விசுவாசம் வைத்திருக்கிறார். அவருடைய விசுவாசமே அவரை உற்சாகப்படுத்துகிறது. கர்த்தர் தன்னுடைய விண்ணப்பத்தைக் கேட்பார் என்று தாவீது முழுநிச்சயத்தோடிருக்கிறார். ""தேவனே நான் உம்மை நோக்கி கெஞ்சுகிறேன், எனக்குச் செவிகொடுக்கிறீர்'' (சங் 17:6) என்று விசுவாசத்தோடு சொல்லுகிறார்.
நாமும் ஜெபிக்கும்போது, நாம் கர்த்தரை நோக்கி கெஞ்சுகிறோம். கர்த்தருடைய கிருபையும் இரக்கமும் நமக்கு வேண்டுமென்று அவருடைய சமுகத்தில் விண்ணப்பம்பண்ணுகிறோம். நம்முடைய வேண்டுதல்களுக்கும் விண்ணப்பங்களுக்கும் கர்த்தர் செவிகொடுக்கிறார் என்னும் விசுவாசம் நமக்குள் நிரம்பியிருக்கவேண்டும். விசுவாசமில்லாமல் தேவனுக்குப் பிரியமாயிருப்பது கூடாத காரியம். விசுவாசமில்லாத ஜெபம் பிரயோஜனமற்றது.
தாவீதைக் குறித்த காரியங்கள்
1. நீதியானவன் (சங் 17:1)
2. ஜெபத்தில் கூப்பிடுகிறவன்
3. கபடமில்லாத உதடுகளுடையவன்
4. பரிசோதிக்கப்பட்டு புடமிடப்பட்டவன் (சங் 17:3)
5. தீங்கொன்றும் காணப்படாதவன்
6. வாய் மீறாதபடிக்கு காத்துக் கொண்டவன்
7. மீறுதல் இல்லாதவன்
8. துஷ்டனுடைய பாதைகளுக்கு விலக்கி தன்னைக் காத்துக் கொண்டவன் (சங் 17:4)
9. தேவன் தன் ஜெபத்திற்குப் பதில் கொடுப்பார் என்ற நம்பிக்கையுடையவன் (சங் 17:6)
10. தேவனை நம்புகிறவன் (சங் 17:7)
என் நியாயம் வெளிப்படுவதாக
உம்முடைய சந்நிதியி-ருந்து என் நியாயம் வெளிப்படுவதாக; உம்முடைய கண்கள் நியாயமானவைகளை நோக்குவதாக (சங் 17:2).
தாவீது தன்னுடைய விண்ணப்பத்தை பரலோகத்திலுள்ள நீதிமன்றத்திற்கு நேராக அபயமிடுவதுபோல ஏறெடுகிறார். தனக்கும் சவுலுக்கும் இடையே ஏற்பட்டிருக்கிற வழக்குகளை கர்த்தர்தாமே விசாரித்து தீர்த்து வைக்குமாறு விண்ணப்பம்பண்ணுகிறார். கர்த்தர் சவுலின் இருதயத்தையும் அறிந்திருக்கிறார். தாவீதின் இருதயத்தையும் அறிந்திருக்கிறார். கர்த்தருடைய கண்கள் எப்போதும் நியாயமாவைகளை நோக்கிப் பார்க்கும்.
சவுலிடத்தில் நியாயமில்லை. அவன் நீதியாய் கிரியை நடப்பிக்கவில்லை. அவன் கர்த்தருடைய வார்த்தைக்குச் செவிகொடுக்கவுமாட்டான். அவனிடத்தில் நீதியான காரியங்களைச் சொன்னாலும் அவன் அதை கேட்க விரும்பாமல் தன்னுடைய செவிகளை அடைத்துக்கொள்வான். தன்னுடைய சுயசித்தத்தையும், சுயவிருப்பத்தையும், சுயஆசைகளையும் நிறைவேற்றுவதற்கே சவுல் பிரயாசப்படுகிறான். ஆனால் தாவீதோ கர்த்தருடைய சமுகத்தில் உண்மையுள்ளவராயிருக்கிறார். ஆகையினால் விசுவாசத்தோடு, ""உம்முடைய சந்நிதியிலிருந்து என் நியாயம் வெளிப்படுவதாக'' என்று விண்ணப்பம்பண்ணுகிறார்.
மனுஷர் தாவீதை துன்மார்க்கன் என்று நியாயம் தீர்த்திருக்கிறார்கள். தாவீது தன்னுடைய சத்துருக்களின் விசாரணையில் தீங்கு செய்கிறவராகயிருக்கிறார். ஆனால் தன்னிடத்தில் ஒரு குற்றமும் இல்லையென்பது தாவீதுக்குத் தெரியும். தன்னுடைய நியாயத்தை மனுஷரிடத்தில் எடுத்துச் சொன்னார். அவர்கள் மத்தியிலே தாவீதின் நியாயம் வெளிப்படவில்லை. அவர்கள் தாவீதுக்கு செவிகொடுக்க மறுத்துவிடுகிறார்கள்.
தாவீதின் நியாயம் மனுஷர் மத்தியிலே வெளிப்படாதபோது, கர்த்தர் தன்னுடைய நியாயத்தைக் கேட்பார் என்று விசுவாசித்து, ""கர்த்தாவே உம்முடைய சந்நிதியிலிருந்து என் நியாயம் வெளிப்படுவதாக'' என்று விண்ணப்பம்பண்ணுகிறார். கர்த்தர் இப்போது நியாயசனத்தில் அமர்ந்திருக்காமல், கிருபாசனத்தில் அமர்ந்திருக்கிறார். அவர் எந்த ஆசனத்தில் அமர்ந்திருந்தாலும், அவருடைய கண்கள் நியாயமானவைகளை நோக்கிப் பார்க்கும். கர்த்தருடைய சமுகத்தில் பட்சபாதம் எதுவுமில்லை. நாம் தேவனோடு கிருபையின் உடன்படிக்கையில் இணைக்கப்பட்டிருக்கிறோம். கர்த்தர் கிருபையும் நீதியுமுள்ளவர்.
என் இருதயத்தை பரிசோதித்துப் பாரும்
நீர் என் இருதயத்தைப் பரிசோதித்து, இராக்காலத்தில் அதை விசாரித்து, என்னைப் புடமிட்டுப்பார்த்தும் ஒன்றும் காணாதிருக்கிறீர்; என் வாய் மீறாதபடிக்குத் தீர்மானம்பண்ணினேன் (சங் 17:3).
கர்த்தர் தாவீதின் இருதயத்தை பரிசோதித்துப் பார்த்திருக்கிறார். மனுஷன் முகத்தைப் பார்க்கிறான். கர்த்தரோ மனுஷருடைய இருதயத்தைப் பார்க்கிறார். நம்முடைய இருதயத்தை ஆராய்ந்து, பரிசோதித்துப் பார்க்கிறார்.
கர்த்தர் தன்னுடைய இருதயத்தை ஏற்கெனவே பரிசோதித்துப் பார்த்திருக்கிறார் என்று தாவீது நம்புகிறார். தன்னுடைய இருதயத்தில் கபடம் எதுவுமில்லை என்று தாவீதின் மனச்சாட்சி உறுதியாய் நம்புகிறது. கர்த்தர் நம்முடைய ஆத்துமாவில் நம்முடைய மனச்சாட்சிக்கு முக்கியத்துவம் கொடுக்கிறார். நம்முடைய மனச்சாட்சி தேவனுடைய சார்பாக நம்முடைய இருதயத்தில் பேசும்.
மனுஷருடைய ஆவி கர்த்தருடைய விளக்காயிருக்கிறது. கர்த்தர் இந்த விளக்கின் வெளிச்சத்தில் ஒவ்வொரு மனுஷனையும் பரிசோதித்துப் பார்க்கிறார். இராக்காலத்திலே கர்த்தர் நம்முடைய இருதயத்தை விசாரிக்கிறார். தாவீது படுக்கையிலிருக்கும்போதுகூட கர்த்தர் அவருடைய இருதயத்தோடு பேசினார். கர்த்தருடைய ஆவியானவர் ஒவ்வொரு சூழ்நிலையிலும் தாவீதைச் சோதித்துப் பார்த்தார்.
சவுலைக் கொல்லுவதற்கு தாவீதுக்கு ஒன்றுக்கும் மேற்பட்ட வாய்ப்புக்கள் உண்டாயிற்று. ஆனால் தாவீதோ அந்த வாய்ப்புக்களை தனக்குச் சாதகமாக பயன்படுத்தி சவுலைக் கொன்றுபோடவில்லை. கர்த்தர் அபிஷேகம்பண்ணின மனுஷனை தான் தொடக்கூடாது என்று தாவீது தன்னுடைய இருதயத்தில் நிச்சயம்பண்ணியிருந்தார். அந்த நிச்சயத்தில் தாவீது உறுதியாயிருந்தார். சவுலைக் கொல்லுவதற்கு கர்த்தர் தாவீதுக்கு நல்ல வாய்ப்புக்களைக் கொடுத்தார். அந்த வாய்ப்புக்கள் மூலமாக கர்த்தர் தாவீதின் இருதயத்தைப் பரிசோதனை செய்தார். தாவீதோ தன்னுடைய வாய் மீறாதபடிக்கு தீர்மானம்பண்ணினார். எல்லா பாவங்களுக்கும், எல்லா மீறுதல்களுக்கும் தாவீது தன்னை விலக்கிக் காத்துக்கொண்டார். கர்த்தரை விசுவாசித்து தன்னுடைய தீர்மானத்தில் உறுதியாய் நிலைத்திருந்தார்.
கர்த்தர் தாவீதை இராக்காலத்திலே பரிசோதித்துப் பார்த்தார். அவரைப் புடமிட்டுப் பார்த்தார். தாவீதின் இருதயத்தை எப்படி பரிசோதித்துப் பார்த்தாலும் அந்த இருதயத்தில் கபடம் ஒன்றுமில்லை. கர்த்தர் தன்னை புடமிட்டுப் பார்த்தும், தன்னிடத்தில் கர்த்தருக்கு விரோதமான காரியம் ஒன்றுமில்லை என்று தாவீது நிச்சயத்தோடு சொல்லுகிறார். ""என்னைப் புடமிட்டுப் பார்த்தும் ஒன்றும் காணாதிருக்கிறீர்'' என்று விசுவாசத்தோடு அறிக்கை செய்கிறார்.
தாவீது கர்த்தருடைய கிருபையை நம்புகிறார். அவருடைய கிருபையினால் தனக்கு உண்டாயிருக்கிற பலத்தை நம்புகிறார். கர்த்தர் தம்முடைய கிருபையினால் தான் எடுத்திருக்கிற தீர்மானத்தில் உறுதியாய் நிற்பதற்கு உதவிசெய்வார் என்பதே தாவீதின் விசுவாசம். அந்த விசுவாசத்தோடு தன் வாய் மீறாதபடிக்கு வாக்குப்பண்ணுகிறார். பாவமான கிரியைகளிலிருந்தும், பாவமான வார்த்தைகளிலிருந்தும் தாவீது மிகுந்த கவனமாய் விலகி ஜீவிக்கிறார். தன்னிடத்தில் இப்படிப்பட்ட நியாயம் இருப்பதினால், ""உம்முடைய சந்நிதியிலிருந்து என் நியாயம் வெளிப்படுவதாக'' என்று தாவீது விசுவாசத்தோடு விண்ணப்பம்பண்ணுகிறார்.
மனுஷரின் செய்கைகள்
மனுஷரின் செய்கைகளைக்குறித்து, நான் உம்முடைய உதடுகளின் வாக்கினாலே துஷ்டனுடைய பாதைகளுக்கு விலக்கமாய் என்னைக் காத்துக்கொள்ளுகிறேன் (சங் 17:4).
மனுஷருடைய அன்றாட ஜீவியம், அவர்களுடைய சிந்தனைகள், செய்கைகள் ஆகியவற்றைப்பற்றி தாவீது தேவனிடத்திலே விண்ணப்பம்பண்ணுகிறார். தாவீது, கர்த்தருடைய வார்த்தையினால், துஷ்டனுடைய பாதைகளுக்குத் தன்னை விலக்கிக் காத்துக்கொள்கிறார். தாவீது ஒருபோதும் சவுலை அழிக்கிறவரல்ல. தாவீது சொல்லுகிற இந்த வாக்கியத்தை ஒரு சிலர் சவுலோடு மாத்திரம் தொடர்புபடுத்தி வியாக்கியானம் செய்கிறார்கள். வேறு சிலரோ இந்த வாக்கியத்தை பொதுவான வியாக்கியானமாகச் சொல்லுகிறார்கள். தாவீது எல்லாவிதமான தீயகாரியங்களுக்கும் தன்னை விலக்கி காத்துக்கொள்கிறார்.
சவுல் தேவனால் அபிஷேகம்பண்ணப்பட்டவர். சவுலைக் கொல்லுவது தனக்குத் தகாத செயல் என்று தாவீது தீர்மானம் செய்திருக்கிறார். சவுலைக் கொல்வது மாத்திரமல்ல, வேறு எந்த துர்ச்செய்கைகளையும் செய்யக்கூடாது என்றும் தாவீது தீர்மானம் செய்திருக்கிறார். தாவீது மாத்திரம் துஷ்டனுடைய பாதைகளுக்கு விலகிச்சென்றால் போதுமானதல்ல. தாவீதோடு கூடயிருக்கிறவர்களும் கர்த்தருடைய அடிச்சுவடுகளைப் பின்பற்றவேண்டும். அவர்களும் துஷ்டனுடைய பாதைகளுக்குத் தங்களை விலக்கிக் காத்துக்கொள்ளவேண்டும். தனக்குக் கீழ் உள்ளவர்களை செம்மையான பாதையில் வழிநடத்துவது தாவீதின் கடமை. தாவீதும் செம்மையான வழியில் நடக்கவேண்டும். அவர் தன்னுடைய ஜனங்களையும் செம்மையான வழியில் வழிநடத்தவேண்டும்.
தாவீது தன்னுடைய நடைகளிலெல்லாம் கர்த்தருடைய வார்த்தையை நினைவுகூருகிறார். கர்த்தருடைய உதடுகளின் வாக்கு நீதியானது. செம்மையானது. கர்த்தருடைய வார்த்தை நித்தியமானது. அது சத்தியமானது. தாவீது தான் செல்லும் பாதையில் கர்த்தருடைய வார்த்தையைத் தியானித்துப் பார்க்கிறார். தன்னுடைய நடைகளை தேவனுடைய வார்த்தையினால் நியாயந்தீர்க்கிறார். தாவீது துஷ்டனுடைய பாதைகளுக்கு நேராக நடக்கும்போது கர்த்தருடைய வார்த்தை அவரை எச்சரிக்கிறது. தாவீது தேவனுடைய வார்த்தைக்கு உடனே கீழ்ப்படிந்து, துஷ்டனுடைய பாதைகளுக்குத் தன்னை விலக்கிக் காத்துக்கொள்கிறார்.
என் காலடிகள்
என் காலடிகள் வழுவாதபடிக்கு, என் நடைகளை உமது வழிகளில் ஸ்திரப்படுத்தும் (சங் 17:5).
கர்த்தர் தாவீதின் ஜீவியத்திலே நன்மைகளைச் செய்திருக்கிறார். கர்த்தர் தனக்குள் செய்த நற்கிரியைகளை, தான் பரிசுத்தமாய் அனுபவிக்கவேண்டுமென்று, தாவீது தேவனிடத்தில் விண்ணப்பம்பண்ணுகிறார். கர்த்தருடைய நன்மைக்கு தாவீது பாத்திரவானாய் நடந்துகொள்ளவேண்டும். கர்த்தர் தாவீதினிடத்தில் நற்கிரியைகளைச் செய்யும்போது, தாவீது கர்த்தருக்கு உண்மையுள்ளவராக, நற்சாட்சியுள்ளவராக ஜீவிக்கவேண்டும். தாவீதின் ஜீவியத்தில் ஆவியின் கனிகள் வெளிப்படவேண்டும்.
நம்முடைய சுயமுயற்சியினால் நம்மால் நன்மை செய்ய முடியாது. நம்முடைய சுயபலத்தினால் நம்மால் ஆவியின் கனிகளை வெளிப்படுத்த முடியாது. ஆவியின் கனி தேவனால் உண்டாகும். தேவன் தாமே தம்முடைய கிருபையினால் நமக்குள்ளே ஆவியின் கனிகளை வெளிப்படுத்துகிறார். ஆவியின் வரங்களும், ஆவியின் கனிகளும் தேவனுடைய ஈவு. பிதாவாகிய தேவன் தம்முடைய பிள்ளைகளுக்கு தம்முடைய கிருபையையும், தெய்வீக சமாதானத்தையும் தம்முடைய ஈவாகக் கொடுக்கிறார்.
தன்னுடைய ஜீவியத்தில் தேவனுடைய கிருபைகள் கிரியை நடப்பிக்கவேண்டுமென்று தாவீது ஜெபம்பண்ணுகிறார். தன்னுடைய நடைகளை தேவன் தாமே தம்முடைய வழிகளில் ஸ்திரப்படுத்த வேண்டுமென்பதே தாவீதின் விண்ணப்பம். தன்னுடைய காலடிகள் வழுவாதபடிக்கு தேவன் தாமே தன்னை ஸ்திரப்படுத்திக் காத்துக்கொள்ள வேண்டுமென்று தாவீது விண்ணப்பம்பண்ணுகிறார்.
தாவீது தேவனுடைய கிருபையினால், தன்னை துஷ்டனுடைய பாதைகளுக்கு விலக்கமாய்க் காத்துக்கொண்டார். இப்போது அதே தேவகிருபையினால், அவர் தன்னுடைய நடைகளை, அவருடைய வழிகளில் ஸ்திரப்படுத்தவேண்டும் என்று தாவீது ஜெபம்பண்ணுகிறார். நம்முடைய நடைகளைத் துஷ்டனுடைய பாதைகளுக்கு நாம் விலக்கிக் காத்துக்கொள்ளும்போது, கர்த்தர் நம்முடைய நடைகளை, தமது வழிகளில் ஸ்திரப்படுத்துவார்.
நான் உம்மை நோக்கி கெஞ்சுகிறேன்
தேவனே, நான் உம்மை நோக்கிக் கெஞ்சுகிறேன், எனக்குச் செவிகொடுக்கிறீர்; என்னிடத்தில் உம்முடைய செவியைச் சாய்த்து, என் வார்த்தையைக் கேட்டருளும் (சங் 17:6).
தாவீது தேவனுடைய சமுகத்தில் பயபக்தியாய் விண்ணப்பம்பண்ணுகிறார். ""கர்த்தாவே, நியாயத்தைக் கேட்டருளும், என் கூப்பிடுதலைக் கவனியும்'' என்று ஜெபம்பண்ணுகிறார். தாவீதின் வார்த்தைகள் வெறும் வார்த்தைகளல்ல. இவையெல்லாம் தாவீது தேவனை நோக்கி கெஞ்சுகிற வார்த்தைகளாகும். தாவீது மிகுந்த பயபக்தியோடும், மிகுந்த பணிவோடும், தன்னைத் தாழ்த்தி, தேவனுடைய சமுகத்தில் கெஞ்சுகிறார்.
தாவீது இதற்கு முன்பு கர்த்தரிடத்தில் விண்ணப்பம்பண்ணியபோது, ""கபடமில்லாத உதடுகளினின்று பிறக்கும் என் விண்ணப்பத்திற்கு செவிகொடும்'' (சங் 17:1) என்று ஜெபம்பண்ணினார். இப்போது விசுவாசத்தோடு ""கர்த்தர் எனக்குச் செவிகொடுக்கிறார்'' என்று மிகுந்த நம்பிக்கையோடு சொல்லுகிறார். கர்த்தர் தாமே தம்முடைய செவியை தன்னிடத்தில் சாய்த்து, தன்னுடைய வார்த்தைகளைக் கேட்டருள வேண்டும் என்பதே தாவீது கர்த்தருடைய சமுகத்தில் கெஞ்சி ஏறெடுக்கிற விண்ணப்பமாகும்.
கர்த்தருடைய வலதுகரம்
உம்மை நம்புகிறவர்களை அவர்களுக்கு விரோதமாய் எழும்புகிறவர்களினின்று உமது வலதுகரத்தினால் தப்புவித்து இரட்சிக்கிறவரே! உம்முடைய அதிசயமான கிருபையை விளங்கப்பண்ணும் (சங் 17:7).
தேவனுடைய கிருபை தன்னிடத்தில் பிரத்தியட்சமாய் வெளிப்படவேண்டுமென்று தாவீது விண்ணப்பம்பண்ணுகிறார். தம்மை நம்புகிறவர்களை கர்த்தர் தம்முடைய வலக்கரத்தினால் தப்புவித்து இரட்சிக்கிறார். கர்த்தருடைய வலதுகரம் என்பது அவருடைய சர்வவல்லமையைக் குறிக்கிற வார்த்தை. தம்முடைய பிள்ளைகளை இரட்சிப்பதற்கு கர்த்தருக்கு யாருடைய உதவியும், ஒத்தாசையும் தேவையில்லை.
கர்த்தரை நம்புகிறவர்களுக்கு விரோதமாய் ஒரு சிலர் எழும்பி வரலாம். கர்த்தரை நம்புகிறவர்களுக்கு சத்துருக்கள் அநேகராயிருப்பார்கள். அவர்களுக்கு விரோதமாய் எழும்புகிறவர்களினின்று கர்த்தர் அவர்களை தப்பிவித்து இரட்சிக்கிறார். கர்த்தருடைய பிள்ளைகளுக்கு சத்துருக்கள் அநேகம்பேராயிருக்கலாம். ஆனாலும் அவர்களுக்கு ஒரு உண்மையான சிநேகிதர் இருக்கிறார். நம்முடைய சத்துருக்கள் எத்தனை பேராகயிருந்தாலும், அத்தனை பேரையும் நம்முடைய மெய்யான நண்பராகிய இயேசுகிறிஸ்து கவனித்துக்கொள்வார். அவர்களிடமிருந்து நம்மைத் தப்புவித்து இரட்சிப்பார்.
தம்முடைய பிள்ளைகளை இரட்சிப்பதற்கு கர்த்தர் தம்முடைய வலதுகரத்தைப் பயன்படுத்துகிறார். கர்த்தருடைய பிள்ளைகளுக்கு சத்துருக்களாக இருக்கிறவர்கள் கர்த்தருக்கு விரோதமாகக் கலகம்பண்ணுகிறார்கள். கர்த்தருடைய வலதுகரத்திற்கு விரோதமாக அவர்கள் முரட்டாட்டம் பண்ணுகிறார்கள். கர்த்தருடைய வலதுகரத்திற்கு முன்பாக அவர்களால் எதிர்த்து நிற்கமுடியாது.
கர்த்தர் தம்முடைய அதிசயமான கிருபையை விளங்கப்பண்ணுமாறு தாவீது ஜெபம்பண்ணுகிறார். சத்துருக்களுக்கு தம்முடைய வலதுகரத்தின் வல்லமையையும், தனக்கு தம்முடைய அதிசயமான கிருபையையும் கர்த்தர் விளங்கப்பண்ணவேண்டும் என்பது தாவீதின் ஜெபவார்த்தைகள். தம்மை நம்புகிறவர்களுக்கு கர்த்தர் அதிசயமான கிருபைகளை விளங்கப்பண்ணுகிறார். அந்தக் கிருபைகளைத் தான் பெற்றுக்கொள்ள முடியாதவாறு, கர்த்தர் தன்னை விலக்கித் தள்ளிவிடாதிருக்குமாறு தாவீது பயபக்தியோடு ஜெபம்பண்ணுகிறார். தம்மை நம்புகிறவர்களுக்கு கர்த்தர் கொடுக்கிற பொதுவான கிருபைகளையும், பொதுவான சிலாக்கியங்களையும் கர்த்தர் தனக்கும் கொடுத்து தன்னை ஆசீர்வதிக்குமாறு தாவீது தேவனுடைய சமுகத்தில் விண்ணப்பம்பண்ணுகிறார்.
தேவனிடமிருந்து வரும் ஆசீர்வாதங்கள்
1. அதிசயமான கிருபையை விளங்கப் பண்ணுவார்
2. தீமையினின்று விலக்கிக் காப்பார் (சங் 17:8)
3. தம்முடைய செட்டைகளின் நிழலிலே காப்பாற்றுவார் (சங் 91:1-10)
தாவீதின் சத்துருக்கள்
சங் 17 : 8-15
என்னைக் காத்தருளும்
கண்மணியைப்போல என்னைக் காத்தருளும்(சங் 17:8).
தாவீது கர்த்தரிடத்தில் ஏறெடுக்கிற ஜெபம், குமாரனாகிய கிறிஸ்து பிதாவாகிய தேவனிடத்தில் ஏறெடுக்கும் ஜெபத்திற்கு முன்னறிவிப்பாக இருக்கிறது. இயேசுகிறிஸ்து இந்தப் பூமியிலே மனிதனாக அவதரித்து பல துன்பங்களை சகித்துக்கொண்டார். பல பாடுகளையும், வேதனைகளையும், உபத்திரவங்களையும் சந்தித்து, அவற்றின் நடுவாக கடந்து வந்தார். பிதாவாகிய தேவன் தம்மை கண்மணியைப்போல காத்தருளுமாறு கிறிஸ்துவானவர் விண்ணப்பம்பண்ணுவதுபோல, தாவீதும் விண்ணப்பம்பண்ணுகிறார்.
தாவீதுக்கு பல பாடுகளும், நெருக்கங்களும், வேதனைகளும் உண்டாயிற்று. தாவீதோ தன்னுடைய சத்துருக்களை நினைத்துப் பயப்படாமல், தன்னுடைய ஆத்துமாவை கர்த்தரிடத்தில் ஒப்புக்கொடுக்கிறார். தாவீதைப்போலவே விசுவாசிகளாகிய நாமும், நம்முடைய ஆத்துமாக்களை கர்த்தருடைய சமுகத்தில் ஒப்புக்கொடுக்கவேண்டும். கர்த்தர் தாமே நம்மை தம்முடைய கண்மணியைப்போல காத்தருளவேண்டுமென்று நாம் ஜெபம்பண்ணவேண்டும். கர்த்தர் நம்மை தம்முடைய பரலோகராஜ்யத்திற்குள் பிரவேசிக்கச் செய்வார் என்று கர்த்தருக்குள் விசுவாசமாயிருக்கவேண்டும்.
தாவீதுக்கு சத்துருக்கள் அநேகராயிருக்கிறார்கள். அவருக்கு தேவனுடைய பாதுகாப்பும் பராமரிப்பும் தேவைப்படுகிறது. சத்துருக்கள் தன்னை கண்டுகொள்ள முடியாதவாறு, தேவன் தாமே தன்னை மறைத்துக்கொள்ளவேண்டுமென்று தாவீது விண்ணப்பம்பண்ணுகிறார். கர்த்தர் தாவீதை மறைக்கும்போது, அவர் தேவனுடைய மறைவிலிருந்து வெளியே வரமாட்டார். தாவீதுக்கு விரோதமாக எழும்பி வந்தவர்களால் இனிமேல் தாவீதை பார்க்க முடியாது. அவரை மறைவாகப் பாதுகாக்கும் கர்த்தரை மாத்திரமே பார்க்க முடியும்.
அவர்களால் இனிமேல் தாவீதுக்கு விரோதமாக தீங்குசெய்ய முடியாது. கர்த்தர் தாமே தாவீதை பாதுகாக்கிறார். ஆகையினால் தாவீதின் சத்துருக்கள் இனிமேல் கர்த்தருக்கு விரோதமாக மாத்திரமே எழும்பி வரவேண்டும். அவர்கள் யுத்தம் செய்யவேண்டுமானால் அவர்கள் கர்த்தரோடுதான் யுத்தம்பண்ணவேண்டும். கர்த்தர் தம்முடைய பிள்ளைகளுக்காக யுத்தம்பண்ணுவார். யுத்தம் கர்த்தருடையது. நாம் தேவனுடைய சமுகத்தில் மறைந்திருந்து, அவர் செய்கிற அதிசயமான பலத்த கிரியைகளை பிரத்தியட்சமாய்க் காண்போம்.
கர்த்தர் தாமே தன்னுடைய ஆத்துமாவையும் காத்தருளவேண்டுமென்று தாவீது விண்ணப்பம்பண்ணுகிறார். கர்த்தர் தன்னுடைய சரீரத்தை மரணத்திலிருந்து பாதுகாத்துக்கொள்வது மாத்திரம் தாவீதுக்குப் போதுமானதாயில்லை. கர்த்தர் தன்னுடைய ஆத்துமாவையும் அழிவுக்கு விலக்கிக் காத்துக்கொள்ளவேண்டும். பாவங்களுக்கு விலக்கிக் காத்துக்கொள்ளவேண்டும். பாவம் செய்யாத ஆத்துமா பிழைக்கும். பரிசுத்த ஆவியானவர் நம்மை பாவங்களிலிருந்து விலக்கிக் காத்து வழிநடத்துவார். நமக்கு சரீரத்தின் பாதுகாப்பு தேவைப்படுவதுபோல, நமக்கு ஆத்துமாவின் பாதுகாப்பும் தேவைப்படுகிறது.
கர்த்தர் தம்முடைய பிள்ளைகளை கண்மணியைப்போல காத்தருளுகிறார். இயற்கையாகவே கண்மணி கண்ணைப் பாதுகாக்கும். கர்த்தர் கண்ணுக்கு கண்மணியை பாதுகாப்பான அரண்போல சிருஷ்டித்திருக்கிறார். ஒருவருடைய கண்ணை நாம் தொட முயற்சிபண்ணும்போது, கண்மணி உடனே கண்ணை மூடி பாதுகாத்துக்கொள்ளும். அதுபோலவே சத்துருக்கள் நம்மை தொடமுயற்சி பண்ணும்போது, கர்த்தர் நம்மை தம்முடைய வல்லமையினாலும், பலத்த கரத்தினாலும் மூடிபாதுகாத்துக்கொள்கிறார்.
நீதிமொழிகள் புஸ்தகத்திலே, ""என் கட்டளைகளையும் என் போதகத்தையும் உன் கண்மணியைப்போல் காத்துக்கொள். அப்பொழுது பிழைப்பாய்'' என்று எழுதப்பட்டிருக்கிறது (நீதி 7:2). நம்மைப் பாதுகாப்பது தேவனுடைய சித்தம். இதை நாம் நம்பவேண்டும். தேவன் நம்மை பாதுகாப்பார் என்று விசுவாசிக்கவேண்டும்.
கர்த்தர் தம்முடைய பிள்ளைகளை எவ்வாறு பாதுகாக்கிறார் என்று சகரியா தீர்க்கதரிசனமாகச் சொல்லியிருக்கிறார். ""பிற்பாடு மகிமையுண்டாகும் என்று சேனைகளின் கர்த்தர் சொல்லுகிறார். உங்களைக் கொள்ளையிட்ட ஜாதிகளிடத்துக்கு என்னை அனுப்பினார்; உங்களைத் தொடுகிறவன் அவருடைய கண்மணியைத் தொடுகிறான்'' (சக 2:8).
நாம் கர்த்தருக்கு விசேஷமானவர்கள். கர்த்தர் நம்மை தம்முடைய விசேஷித்த பாதுகாப்புக்களினாலும், பராமரிப்புக்களினாலும், ஆதரிக்கிறார். கர்த்தருடைய பாதுகாப்பு நமக்குக் கிடைத்திருப்பது, நமக்குக் கிடைத்திருக்கிற மெய்யான சிலாக்கியம். கர்த்தருடைய சமுகத்தில் நாம் ஜெபத்தோடு வரும்போது கர்த்தர் நம்மை தம்முடைய கண்மணியைப்போல காத்தருளுவதை நினைவுகூர்ந்து, அவரை நன்றியோடு துதிக்கவேண்டும்.
எபிரெய மொழியில் கண்மணியைப் போல பாதுகாப்பது என்பது அதிகக் கவனத்துடன் பாதுகாப்பதைக் குறிக்கும். கண்ணுக்குப் பாதுகாப்பு அவசியம். தேவன் கண்ணை பாதுகாப்பாக சிருஷ்டித்திருக்கிறார். மண்டை ஓட்டிற்குள் இருந்தாலும் கண்களை நமது கரங்களாலும் மூடிப் பாதுகாக்கலாம். கண் இமையும் கண்ணைப் பாதுகாக்கும் (உபா 32:10; நீதி 7:2)
கர்த்தருடைய செட்டைகளின் நிழல்
என்னை ஒடுக்குகிற துன்மார்க்கருக்கும், என்னைச் சூழ்ந்துகொள்ளுகிற என் பிராணப்பகைஞருக்கும் மறைவாக, உம்முடைய செட்டைகளின் நிழ-லே என்னைக் காப்பாற்றும் (சங் 17:9).
ஒரு கோழி தன்னுடைய குஞ்சுகளை, தன்னுடைய செட்டைகளின் கீழ் மறைவாக அடைத்துக் காத்துக்கொள்ளும். கோழிகுஞ்சுகளுக்கு செட்டைகளின் மறைவு பாதுகாப்பாகவும், இதமாகவும் இருக்கும். அதுபோலவே கர்த்தர் தன்னை தம்முடைய செட்டைகளின் நிழலிலே காப்பாற்றுமாறு தாவீது விண்ணப்பம்பண்ணுகிறார்.
புதிய ஏற்பாட்டுக்காலத்திலே கர்த்தராகிய இயேசுகிறிஸ்துவும் இந்த உவமையை தம்முடைய வார்த்தையில் பயன்படுத்தியிருக்கிறார். ""எருசலேமே, எருசலேமே, தீர்க்கதரிசிகளைக் கொலைசெய்து, உன்னிடத்தில் அனுப்பப்பட்டவர்களைக் கல்லெறிகிறவளே! கோழி தன் குஞ்சுகளைத் தன் சிறகுகளின் கீழே கூட்டிச் சேர்த்துக் கொள்ளும் வண்ணமாக நான் எத்தனைதரமோ உன் பிள்ளைகளைக் கூட்டிச் சேர்த்துக்கொள்ள மனதாயிருந்தேன்; உங்களுக்கோ மனதில்லாமற்போயிற்று'' (மத் 23:37).
கர்த்தருடைய செட்டைகளின் நிழல் என்னும் வாக்கியம், அவருடைய கிருபாசனத்தையும் குறிக்கலாம். கேரூபீன்கள் தங்கள் செட்டைகளினால் கிருபாசனத்தை மூடிற்று. செட்டைகளின் மறைவு நிழல் என்பது, கேரூபீன்களின் செட்டைகளினால் •மூடி மறைக்கப்பட்டு நிழலாயிருக்கிற உடன்படிக்கை பெட்டியின் கிருபாசனத்தைக் குறிக்கலாம் என்று வேதபண்டிதர்கள் வியாக்கியானம் சொல்லுகிறார்கள். தேவனுடைய கிருபாசனத்தண்டையிலே அவருடைய பிள்ளைகளுக்கு கிருபையும் இரக்கமும் உண்டு.
தேவன் இஸ்ரவேல் புத்திரருக்கு தம்முடைய விசேஷித்த கிருபைகளை வெளிப்படுத்தியிருக்கிறார். இஸ்ரவேல் ஜனத்தார் தேவனுடைய உடன்படிக்கையின் ஜனமாகயிருக்கிறார்கள். கர்த்தர் தம்முடைய உடன்படிக்கையில் உண்மையுள்ளவர். தம்முடைய உடன்படிக்கையின் பிரகாரம் அவர் இஸ்ரவேல் புத்திரரை எல்லா சத்துருக்களுக்கும் விலக்கி பாதுகாத்துக்கொள்கிறார். அப்படிப்பட்ட பாதுகாப்பு தனக்கும் வேண்டும் என்று தாவீது தேவனுடைய சமுகத்தில் விண்ணப்பம்பண்ணுகிறார்.
தாவீதை துன்மார்க்கர் ஒடுக்குகிறார்கள். அவருடைய பிராணப்பகைஞர் அவரை சூழ்ந்துகொள்கிறார்கள். இவர்களிடமிருந்து தாவீதுக்குப் பாதுகாப்பு தேவைப்படுகிறது. கர்த்தர் தாமே தாவீதை அவருடைய சத்துருக்களின் கண்களில் தென்படாதவாறு மறைவாக பாதுகாக்கவேண்டும். தாவீதுக்கு உலகப்பிரகாரமான பாதுகாப்பு போதுமானதல்ல. மனுஷருடைய பாதுகாப்பு அவருக்கு வீணாய்ப்போயிற்று. தான் நெருக்கப்படுகிற வேளையில் தாவீது மனுஷரை நம்பாமல், தேவனை நம்புகிறார். தேவனுடைய பாதுகாப்பை நம்புகிறார். கர்த்தருடைய செட்டைகளின் நிழலில் தனக்குப் பூரண பாதுகாப்பு உண்டு என்று நம்பி, கர்த்தரிடத்தில் ""உம்முடைய செட்டைகளின் நிழலிலே என்னைக் காப்பாற்றும்'' என்று கெஞ்சுகிறார்.
நிணந்துன்னியிருக்கிறார்கள்
அவர்கள் நிணந்துன்னியிருக்கிறார்கள், தங்கள் வாயினால் வீம்பு பேசுகிறார்கள் (சங் 17:10).
தாவீதின் பகைஞர்கள் மிகவும் கொடியவர்கள். அவர்கள் தாவீதுக்கு பிராணப்பகைஞராயிருக்கிறார்கள். அவர்கள் கொடிய துன்மார்க்கர்கள். தாவீதின் சரீரத்திற்கும் பிராணனுக்கும் அவர்கள் பகைஞர்கள். இந்த வார்த்தைக்கு அவர்கள் தாவீதின் ஆத்துமாவுக்கு பகைஞர்கள் என்பது பொருளாகும்.
தாவீதின் சத்துருக்கள் நிணந்துன்னியிருக்கிறார்கள். அவர்களுடைய சரீரம் முழுவதும் கொழுப்பு நிரம்பியிருக்கிறது. அவர்களுடைய கொழுப்பு அவர்களுடைய சரீரத்தில் அங்கும் இங்குமாக துன்னியிருக்கிறது. அவர்களுடைய சரீரம் கொழுப்பினால் மூடப்பட்டிருக்கிறது. அவர்கள் தங்களைத் தாங்களே தழுவிக்கொள்கிறார்கள். அவர்களை வேறு யாரும் தழுவ முடியாதபடிக்கு அவர்கள் சரீரம் கனத்துப் பெருத்திருக்கிறார்கள்.
தாவீதின் சத்துருக்கள் நிணந்துன்னி தங்களைத் தாங்களே தழுவிக்கொள்கிறார்கள். தங்களுடைய சுயபெருமையினாலும், சுயவல்லமையினாலும், சுயசெழும்பினாலும் அவர்கள் தங்களைத் தாங்களே பெருமைப்படுத்துகிறார்கள். தேவனை அர்ப்பமாய் நினைக்கிறார்கள். தேவனுக்குக் கொடுக்கவேண்டிய கனத்தையும் மகிமையையும் கொடுக்காமல், தங்களைத் தாங்களே பெருமை பாராட்டிக்கொள்கிறார்கள்.
அவர்களுடைய வாய் தேவனைத் துதிக்கவில்லை. மனுஷரை மதிக்கவில்லை. அவர்கள் தங்கள் வாயினால் வீம்பு பேசுகிறார்கள். அவர்களுடைய சரீரம் நிணந்துன்னியிருப்பதுபோல, அவர்களுடைய நாவும் நிணத்தினால் அதாவது கொழுப்பினால் தடித்திருக்கிறது.
ஆசாப் என்னும் சங்கீதக்காரர் தன்னுடைய போதக சங்கீதத்திலே இவர்கள் மீது வரும் தேவனுடைய நியாயத்தீர்ப்பைப்பற்றி இவ்வாறு எழுதியிருக்கிறார். ""இனிப் பிறக்கும் பிள்ளைகளாகிய பின்சந்ததியார் அதை அறிந்துகொண்டு, அவர்கள் எழும்பித் தங்கள் பிள்ளைகளுக்கு அவைகளைச் சொல்லும்படிக்கும்; தேவன்மேல் அவர்கள் தங்கள் நம்பிக்கையை வைத்து, தேவனுடைய செயல்களை மறவாமல், அவர் கற்பனைகளைக் கைக்கொள்ளும்படிக்கும், இருதயத்தைச் செவ்வைப்படுத்தாமலும், தேவனை உறுதியாய்ப் பற்றிக்கொள்ளாமலும் இருந்த முரட்டாட்டமும் கலகமுமுள்ள சந்ததியாகிய தங்கள் பிதாக்களுக்கு அவர்கள் ஒப்பாகாதபடிக்கும், இவைகளைக் கட்டளையிட்டார்'' (சங் 78:6-8).
யோபுவின் சரித்திரப்புஸ்தகத்தில் தேமானியனாகிய எலிபாஸ் என்பவரும் துன்மார்க்கரைப்பற்றிச் சொல்லும்போது ""அவன் முகத்தை கொழுப்பு மூடியிருக்கிறது, அடிவயிறு தொந்திவிட்டிருக்கிறது'' என்று சொல்லுகிறார் (யோபு 15:27).
எங்களை வளைந்துகொண்டார்கள்
நாங்கள் செல்லும் பாதைகளில் இப்பொழுது எங்களை வளைந்துகொண்டார்கள்; எங்களைத் தரையிலே தள்ளும்படி அவர்கள் கண்கள் எங்களை நோக்கிக்கொண்டிருக்கிறது (சங் 17:11).
தாவீதின் சத்துருக்கள் அவரையும், அவரோடு கூடயிருக்கிறவர்களையும் எப்போதும் நோக்கிப் பார்த்துக்கொண்டிருக்கிறார்கள். அவர்களுக்கு எப்போது தீங்கு செய்யலாம் என்றும், அவர்களை எப்போது அழிக்கலாம் என்றும் அவர்களை துன்மார்க்கமான பார்வையினால் நோக்கிக் கொண்டிருக்கிறார்கள். அவர்கள் ஒருபோதும் தேவனை நோக்கிப் பார்ப்பதில்லை. அவர்கள் எப்போதுமே தாவீதையும் அவரோடு கூடயிருக்கிறவர்களையும் மாத்திரம் பார்க்கிறார்கள்.
தாவீது செல்லும் பாதைகள் எல்லாவற்றையும் அவருடைய சத்துருக்கள் அறிந்திருக்கிறார்கள். அவர்கள் செல்லும் பாதையில் சத்துருக்கள் அவர்களை வளைந்துகொண்டார்கள். சத்துருக்கள் தாவீதுக்கு விரோதமாக சதிஆலோசனை செய்திருக்கிறார்கள். கண்ணிகளை வைத்திருக்கிறார்கள். தாவீதும் அவரோடு கூடயிருக்கிறவர்களும் சத்துருக்களின் சதிஆலோசனைகளுக்கும், கண்ணிகளுக்கும் தப்பிவிடாபடிக்கு அவர்களை வளைந்து கொண்டிருக்கிறார்கள். அவர்களைக் கொன்று, அவர்களுடைய சரீரங்களை எப்படியும் தரையில் தள்ளிவிடவேண்டும் என்பதே அவர்களுடைய தீயநோக்கம். இதற்காகவே அவர்களுடைய கண்கள், கொலைவெறியோடு, தாவீதையும் அவரோடு கூடயிருக்கிறவர்களையும் நோக்கிக்கொண்டிருக்கிறது.
பீறுகிற சிங்கம்
பீறுகிறதற்கு ஆவலுள்ள சிங்கத்துக்கும், மறைவிடங்களில் பதிவிருக்கிற பால சிங்கத்துக்கும் ஒப்பாயிருக்கிறார்கள் (சங் 17:12).
தாவீது தன்னுடைய சத்துருக்களைப்பற்றி பொதுவாகச் சொன்னாலும், சவுலே அவருக்கு பிரதான சத்துருவாகயிருக்கிறார். சவுலிடத்தில் மனிதாபிமானம் சிறிதுமில்லை. அவர் ஒரு மிருகத்தைப்போல இரத்த வெறிபிடித்தவராக அலைகிறார். தாவீது சவுலைப்பற்றிச் சொல்லும்போது, அவர் பீறுகிறதற்கு ஆவலுள்ள சிங்கத்திற்கு ஒப்பாயிருப்பதாக சொல்லுகிறார்.
சிங்கத்தை யாரும் வீட்டில் வளர்க்கமாட்டார்கள். அது தன்னுடைய இரையை தானே பார்த்துக்கொள்ளவேண்டும். அதற்காக சிங்கம் மறைவிடங்களில் பதிவிருக்கும். தனக்கு எப்போது இரை கிடைக்கும் என்று ஆவலாய்க் காத்துக்கொண்டிருக்கும். தன்னுடைய இரை தனக்கு அருகாமையில் வந்தவுடன் உடனே அந்த இரையின்மீது பாய்ந்து, அதைப் பீறிப்போடும். இதற்காக பாலசிங்கம் மறைவிடங்களில் பதிவிருக்கும்.
சவுலும் ஒரு சிங்கத்தைப்போலவும், ஒரு பாலசிங்கத்தைப்போலவும் தாவீதைப் பீறுவதற்கு ஆவலுள்ளவராயிருக்கிறார். தாவீதைப் பிடிப்பதற்கு மறைவிடங்களில் பதிவிருக்கிறார். சிங்கம் வரையாடுகளை கன்மலையிலே தேடுவதுபோல சவுல், இஸ்ரவேல் அனைத்திலும் தெரிந்துகொள்ளப்பட்ட மூவாயிரம் பேரைக் கூட்டிக்கொண்டு, தாவீதையும், அவர் மனுஷரையும் வரையாடுகளுள்ள கன்மலைகளின்மேல் தேடப்போனார் (1சாமு 24:2).
சிங்கமும், பாலசிங்கமும் தன்னுடைய இரையை வனாந்தரத்திலே தேடிப்போகும். அதுபோலவே சவுல், சீப் வனாந்தரத்திலே, தாவீதைத் தேடும்படி எழுந்து, இஸ்ரவேலிலே தெரிந்துகொள்ளப்பட்ட மூவாயிரம் பேரோடுங்கூட சீப் வனாந்தரத்திற்கு புறப்பட்டுப் போனார் (1சாமு 26:2). சிங்கங்கள் தங்களுடைய இரைகளைப் பிடிப்பதற்கு எப்படி பதிவிருக்குமோ, பீறுகிறதற்கு எப்படி ஆவலாயிருக்குமோ, அப்படியே தாவீதின் சத்துருக்களும் அவரைப் பிடிப்பதற்கு பதிவிருக்கிறார்கள். அவரைப் பீறுவதற்கு ஆவலுள்ளவர்களாயிருக்கிறார்கள்.
என் ஆத்துமாவை தப்புவியும்
கர்த்தாவே, நீர் எழுந்திருந்து, அவனுக்கு எதிரிட்டு, அவனை மடங்கடியும்; கர்த்தாவே, என் ஆத்துமாவைத் துன்மார்க்கனுடைய கைக்கு உம்முடைய பட்டயத்தினால் தப்புவியும் (சங் 17:13).
சத்துரு சிங்கம்போல சுற்றித்திரிந்தாலும் கர்த்தரே சர்வவல்லமையுள்ளவர். தேவனுடைய வல்லமை சத்துருவின் வல்லமையை முறியடிக்கும். கர்த்தருடைய சர்வவல்லமை பிசாசானவனுடைய வல்லமையை அதமாக்கிப்போடும். கர்த்தர் தம்முடைய பிள்ளைகளுக்கு எதிராக எழும்பி வரும் சத்துருக்களின் அதிகாரத்தை அவமாக்கிப்போடுவார். சத்துருக்கள் நமக்கு முன்பாக பெலனற்றுப்போவார்கள். அவர்கள் நமக்கு விரோதமாக பதிவிருந்தாலும், நம்மைப் பீறிப்போடுவதற்கு அவர்கள் ஆவலாயிருந்தாலும், அவர்களுடைய விருப்பம் நிறைவேறாது. கர்த்தர் அவர்களுடைய விருப்பத்தை நிறைவேற்றாதபடி தடைபண்ணிப்போடுவார்.
தாவீது கர்த்தரிடத்தில், ""கர்த்தாவே நீர் எழுந்திரும்'' என்று விண்ணப்பம்பண்ணுகிறார். தாவீதுக்கு விரோதமாக சவுல் எழும்பி வந்திருக்கிறார். சவுலைக் கொல்லுவதற்கு தாவீதுக்கு மனமில்லை. தன்னுடைய நீதியை தாவீது கர்த்தருடைய சமுகத்தில் ஒப்புவிக்கிறார். தன்னுடைய நிலமையை கர்த்தரிடத்தில் சொல்லுகிறார். தாவீது தன்னுடைய பாதுகாப்புக்கு கர்த்தரையே நம்பியிருக்கிறார்.
தாவீது கர்த்தரிடத்தில், ""கர்த்தாவே, என் சத்துருவுக்கு எதிரிட்டு, அவனை மடங்கடியும்'' என்று விண்ணப்பம்பண்ணுகிறார். கர்த்தருடைய கரத்தில் பட்டயமுள்ளது. அது கர்த்தருடைய பட்டயம். கர்த்தர் தம்முடைய பட்டயத்தை தமக்குச் சித்தமான பிரகாரமாக பயன்படுத்துவார். கர்த்தருடைய சித்தமில்லாமல் அவருடைய பட்டயம் இயங்காது. கர்த்தர் தம்முடைய பட்டயத்தினால், தாம் நினைத்த காரியத்தை செய்து முடித்த பிறகு, அதைத்ƒதிரும்பவும் தம்முடைய உரையில் போட்டுவிடுவார்.
தாவீதின் சத்துரு துன்மார்க்கனாயிருக்கிறான். அவன் தாவீதின் ஆத்துமாவை கொல்லுவதற்கு வகைதேடிக்கொண்டிருக்கிறான். தாவீது தன்னுடைய சரீரத்தையும், தன்னுடைய ஆத்துமாவையும் கர்த்தருடைய பலத்த கரத்திற்குள் ஒப்புக்கொடுத்திருக்கிறார். அவருடைய கரத்தில் பட்டயம் இருக்கிறது. தாவீது கர்த்தரையும், கர்த்தருடைய கரத்திலுள்ள பட்டயத்தையும் நோக்கிப் பார்த்து, ""கர்த்தாவே, என் ஆத்துமாவைத் துன்மார்க்கனுடைய கைக்கு உம்முடைய பட்டயத்தினால் தப்புவியும்'' என்று பணிவோடு விண்ணப்பம்பண்ணுகிறார்.
தாவீதின் சத்துருவாகிய சவுலிடத்திலும் பட்டயம் இருக்கிறது. கர்த்தருடைய பட்டயத்திற்கு விரோதமாக சவுலின் பட்டயத்தினால் யுத்தம்பண்ண முடியாது. கர்த்தர் தம்முடைய சித்தத்தின் பிரகாரம் தம்முடைய பட்டயத்தைப் பயன்படுத்துவார். கர்த்தர் தாமே தனக்கு ஆதரவாக, தன்னைப் பாதுகாப்பதற்காக, தம்முடைய பட்டயத்தினால், தன்னுடைய ஆத்துமாவைத் துன்மார்க்கனுடைய கைக்கு தப்புவிக்குமாறு தாவீது விண்ணப்பபம்பண்ணுகிறார். கர்த்தர் தம்முடைய பட்டயத்தினால் தம்முடைய பிள்ளைகளைப் பாதுகாக்கிறார். தம்முடைய பிள்ளைகளுக்கு விரோதமாக யுத்தம்பண்ணுகிற சத்துருக்களோடு கர்த்தர் தம்முடைய பட்டயத்தினால் யுத்தம்பண்ணுகிறார்.
உலகமக்கள்
மனுஷருடைய கைக்கும், இம்மையில் தங்கள் பங்கைப் பெற்றிருக்கிற உலகமக்களின் கைக்கும் உம்முடைய கரத்தினால் என்னைத் தப்புவியும்; அவர்கள் வயிற்றை உமது திரவியத்தினால் நிரப்புகிறீர்; அவர்கள் புத்திரபாக்கியத்தினால் திருப்தியடைந்து, தங்களுக்கு மீதியான பொருளைத் தங்கள் குழந்தைகளுக்கு வைக்கிறார்கள் (சங் 17:14).
தாவீதின் சத்துருக்கள் உலகப்பிரகாரமாக ஐசுவரியவான்களாயிருக்கிறார்கள். அவர்கள் இந்த உலகத்தின் சம்பத்துக்களினால் செழித்திருக்கிறார்கள். இவர்கள் உலக மக்கள். கர்த்தருடைய பிள்ளைகளாகிய நாமோ பரலோகத்தின் மக்கள். உலக மக்களை இந்த உலகத்தின் ஆவி ஆளுகை செய்கிறது. இவர்கள் இந்த உலகத்தின்மீது சிநேகம் வைத்திருக்கிறார்கள். உலக சிநேகம் தேவனுக்கு விரோதமான பகை.
உலகமக்கள் தங்கள் உலக ஐசுவரியத்தை நேசிக்கிறார்கள். உலகப்பிரகாரமான சந்தோஷங்களில் பிரியப்படுகிறார்கள். அவர்கள் இம்மையில் தங்கள் பங்கைப் பெற்றிருக்கிறார்கள். இந்தப் பிரபஞ்சத்தில் அவர்களுக்கு அசையும் சொத்துக்களும், அசையா சொத்துக்களும் ஏராளமாயிருக்கிறது. அவர்களுடைய வயிற்றை கர்த்தர் தம்முடைய திரவியத்தினால் நிரப்புகிறார். இந்த உலகத்தின் ஐசுவரியங்களே இங்கு ""திரவியம்'' என்று அழைக்கப்படுகிறது. உலக மக்களுக்கு உலகத்தின் ஐசுவரியம் மாத்திரமே திரவியமாகத் தெரிகிறது.
மனுஷருடைய ஆத்துமாவுக்கு உலக ஐசுவரியம் தேவையற்றது. தேவன் கொடுக்கிற நித்திய ஆசீர்வாதமும், நித்திய ஜீவனுமே நம்முடைய ஆத்துமாவுக்கு விலையேறப்பெற்ற ஐசுவரியம். நித்திய ஜீவனுக்கு பிரயோஜனப்படாத உலக ஐசுவரியங்களெல்லாம் குப்பையைப்போல ஒன்றுக்கும் உதவாது. வயிற்றுக்குப் போஜனமும் போஜனத்திற்கு வயிறும் ஏற்கும். ஆனாலும் தேவன் இதையும் அதையும் அழியப்பண்ணுவார் (1கொரி 6:13).
உலகமக்களுக்கு தங்கள் ஆத்துமாவைக் குறித்து அக்கரையோ கவலையோ இல்லை. அவர்கள் தங்கள் வயிற்றைக் குறித்தே கவலைப்படுகிறார்கள். தங்களுடைய வயிற்றை உலகத்தின் ஐசுவரியத்தினால் நிரப்ப வேண்டுமென்று பிரயாசப்படுகிறார்கள். அவர்கள் தங்கள் ஆத்துமாவைக் குறித்து சிறிதும் கவலைப்படுவதில்லை. ஆத்துமா தாகத்தோடு இருந்தாலும், அதன் தாகத்தைத் தீர்த்துவைப்பதற்கு உலகமக்கள் ஒரு பிரயாசமும் எடுப்பதில்லை. ஆத்துமாவை உலகத்தின் திரவியத்தினால் நிரப்ப முடியாது. அதை கர்த்தருடைய வார்த்தையினால் மாத்திரமே நிரப்ப முடியும்.
உலகமக்களுக்கு ஏராளமான உற்றார் உறவினர்கள் இருக்கிறார்கள். அவர்களுடைய குடும்பத்தில் அநேக அங்கத்தினர்களும் இருக்கிறார்கள். தங்கள் குடும்பத்திலுள்ளவர்கள் எல்லோருக்கும் அவர்கள் சொத்துக்களைச் சேமித்து வைக்கிறார்கள். அவர்கள் புத்திர பாக்கியத்தினால் திருப்தியடைந்திருக்கிறார்கள். உலகமக்களுக்கு ஏராளமான பிள்ளைகள் உண்டு. உலகமக்கள் தங்கள் வயிற்றை உலகத்தின் ஐசுவரியத்தினால் நிரப்புகிறார்கள். இந்தப் பிரபஞ்சத்தில் ஆடம்பரமாய் ஜீவிக்கிறார்கள். பணத்தை சம்பாதிப்பதற்காக கடினமாய் உழைக்கிறார்கள். இந்த உலகத்தில் தங்களுக்கு தேவையானது எல்லாவற்றையும் தங்கள் ஐசுவரியத்தினால் பெற்றுக்கொள்கிறார்கள். இதனால் இவர்களுக்கு மாம்சப்பிரகாரமான திருப்தி மாத்திரமே உண்டாகிறது.
உலகமக்கள் தங்களுடைய திரவியத்தினால் திருப்தியடைந்து, தங்களுக்கு மீதியான பொருளை தங்களுடைய குழந்தைகளுக்கு சேமித்து வைக்கிறார்கள். தங்களுடைய பிள்ளைகளுக்கும், பேரப்பிள்ளைகளுக்கும், பௌத்திரர்களுக்கும் சொத்துக்களை சேகரித்து வைக்கிறார்கள். தாங்கள் மரித்த பிறகு, தங்களுடைய மீதியான சொத்துக்கள் அவர்களுக்குத் திரளாய்க் கிடைக்கவேண்டுமென்று ஆசைப்பட்டு, இம்மையிலே தங்கள் ஐசுவரியத்தை அதிகமாய் சேகரிக்கிறார்கள்.
இதுவே உலகமக்கள் இம்மையில் பெற்றிருக்கிற பங்கு. இவர்களுக்கு மறுமையில் பங்குமில்லை, பாத்தியமுமில்லை. ஏனெனில் இவர்கள் தங்கள் வயிற்றை மாத்திரமே உலக ஐசுவரியத்தினால் நிரப்பினார்கள். தங்களுடைய ஆத்துமாக்களைக் குறித்தோ கவலையில்லாமல் ஜீவித்தார்கள். இவர்களுடைய ஆத்துமா நித்திய ஜீவனைப் பெற்றுக்கொள்ளவில்லை. இதனால் இவர்களுக்கு நித்திய அழிவு உண்டாயிற்று.
நானோ, உமது சாயலால் திருப்தியாவேன்
நானோ நீதியில் உம்முடைய முகத்தைத் தரிசிப்பேன்; நான் விழிக்கும்போது உமது சாயலால் திருப்தியாவேன் (சங் 17:15).
தாவீதிடத்தில் உலகஐசுவரியம் இல்லை. அவருக்கு இம்மையிலே பங்கு இல்லை. தாவீது தன்னுடைய சந்தோஷத்திற்கு உலகத்தின் ஐசுவரியத்தை சார்ந்திருக்கவில்லை. உலகமக்கள் இம்மையில் தங்கள் பங்கைப் பெற்றிருக்கிறார்கள். தாவீதிடமோ இவை அதிகமாயில்லை. தாவீதுக்கு உலக ஐசுவரியம் மிகவும் குறைவாகயிருக்கிறது. உலக ஐசுவரியம் மிகுந்தவர்கள் தாவீதை அற்பமாக நினைத்து அவரை விரோதிக்கிறார்கள். அவர்கள் தாவீதுக்கு சத்துருக்களாக இருக்கிறார்கள். தாவீதை நெருக்கி ஒடுக்குகிறார்கள். உலகமக்களின் கைக்கு கர்த்தர் தாமே தன்னை தப்புவிக்குமாறு தாவீது பணிவோடு ஜெபம்பண்ணுகிறார்.
உலகமக்கள் உலகத்தின் ஐசுவரியத்தினால் தங்கள் வயிற்றை நிரப்புகிறார்கள். அவர்களுடைய ஆத்துமா இரட்சிக்கப்படவில்லை. அவர்கள் நித்திய ஜீவனைப் பெற்றுக்கொள்ளமாட்டார்கள். அவர்கள் நித்திய மரணத்திற்குள் பிரவேசிப்பார்கள். உலகமக்கள் இந்தப் பிரபஞ்சத்தில் ஜீவித்தபோது, இம்மையில் தங்கள் பங்கைப் பெற்றிருந்தார்கள். ஆனால் மறுமையிலோ அவர்களுக்கு பங்கு இல்லாமற்போயிற்று.
தாவீது இம்மையிலே தன்னுடைய பங்கை பெற்றுக்கொள்ளவில்லை. தாவீதின் ஆத்துமா இரட்சிக்கப்பட்டிருக்கிறது. தாவீது மரிக்கும்போது, அவர் நித்திய ஜீவனைப் பெற்றுக்கொள்வார். இந்த நம்பிக்கை தாவீதின் உள்ளத்தில் உறுதியாய் நிலைத்து நிற்கிறது. தாவீது மரித்துப்போவார். அது அவருக்கு ஒரு நித்திரையைப்போல இருக்கும். அவருடைய சரீரம் மரிக்கும்போது அவருடைய ஆத்துமா உயிர்த்தெழும்.
தாவீது உயிர்த்தெழும்போது, அவர் மூன்றுவிதமான ஆசீர்வாதங்களை எதிர்பார்க்கிறார். அவையாவன :
1. தாவீது உயிர்த்தெழுந்தவுடன் தேவனையும் அவருடைய மகிமையையும் தரிசிப்பார். ""நானோ நீதியில் உம்முடைய முகத்தைத் தரிசிப்பேன்'' என்று விசுவாசத்தோடு சொல்லுகிறார். நாம் இந்தப் பிரபஞ்சத்தில் கண்ணாடியில் பார்க்கிற வண்ணமாக கர்த்தரை மங்கலாகப் பார்க்கிறோம். நாம் உயிர்த்தெழுந்த பின்போ, கர்த்தருடைய முகத்தை நேருக்கு நேராகத் தரிசிப்போம். அவருடைய மகிமை பிரகாசத்தை நம்முடைய கண்களால் பிரத்தியட்சமாகப் பார்ப்போம்.
2. தாவீது உயிர்த்தெழும்போது அவர் தேவனுடைய மகிமைக்கு ஒப்பான மகிமையைப் பெற்றுக்கொள்வார். தேவனுடைய சாயலுக்கு ஒப்பான சாயலையும் பெற்றுக்கொள்வார். நம்முடைய கர்த்தராகிய இயேசுகிறிஸ்து பிரசன்னமாகும்போது நாம் அவருடைய சாயலுக்கு ஒப்பாகயிருப்போம். அவர் இருக்கிற வண்ணமாகவே நாம் அவரைத் தரிசிப்போம்.
3. தாவீது கர்த்தருடைய முகத்தைத் தரிசிப்பதினாலும், தான் தேவனுடைய சாயலைப் பெற்றிருப்பதினாலும் திருப்தியோடிருப்பார். இந்தத் திருப்தி பூரணமாயிருக்கும். தாவீது தன்னுடைய பூரண திருப்தியைப்பற்றிச் சொல்லும்போது, ""நான் விழிக்கும்போது உமது சாயலால் திருப்தியாவேன்'' என்று சொல்லுகிறார். தாவீதுக்கு உலக ஐசுவரியத்தினால் திருப்தி உண்டாகவில்லை. தன்னுடைய பலத்தினாலோ, பராக்கிரமத்தினாலோ, சுயபுத்தியினாலோ, சுயபக்தியினாலோ தாவீதுக்கு திருப்தி உண்டாகவில்லை. ஆனால் அவர் உயிர்த்தெழும்போது, கர்த்தருடைய முகத்தைத் தரிசிப்பதினால் அவர் திருப்தியடைவார். இந்த திருப்தி பூரண திருப்தியாயிருக்குமென்று தாவீது நம்பிக்கையோடு சொல்லுகிறார்.
